ខេត្តកណ្តាល៖ ប្រជាពលរដ្ឋជាច្រើនគ្រួសារ រស់នៅក្នុងភូមិស្តៅកន្លែង ៤ ឃុំដីឥដ្ឋ ស្រុកកៀនស្វាយ ខេត្តកណ្តាល បានប្រាប់អ្នកសារព័ត៌មាន កាលពីព្រឹកថ្ងៃទី៣ ខែមិថុនា…
ខេត្តកណ្តាល៖ ប្រជាពលរដ្ឋជាច្រើនគ្រួសារ រស់នៅក្នុងភូមិស្តៅកន្លែង ៤ ឃុំដីឥដ្ឋ ស្រុកកៀនស្វាយ ខេត្តកណ្តាល បានប្រាប់អ្នកសារព័ត៌មាន កាលពីព្រឹកថ្ងៃទី៣ ខែមិថុនា ឆ្នាំ២០២១ ថា ពួកគាត់បាននាំគ្នាផ្តិតមេដៃចំនួន ៩១គ្រួសារ ដាក់ពាក្យប្តឹងលោក ស៊ុត តូ បច្ចុប្បន្នមេឃុំដីឥដ្ឋ បានរួមគំនិតគ្នា អនុញ្ញាត ឈ្មោះ សុខ សេង ចាក់ដីលុបប្រឡាយសាធារណៈរបស់រដ្ឋ សាងសង់សំណង់រឹង (ធ្វើរបងថ្ម) រំលោភព័ទ្ធយកប្រវែងប្រហែលជាង ១០០ម៉ែត្រ ធ្វើជាកម្មសិទ្ធិបុគ្គលឯកជនម្នាក់ មានលុយមានអំណាច បង្កការប៉ះពាល់ដល់ប្រជាពលរដ្ឋមួយ។ បន្ទាប់ពីរំលោភយកដីប្រឡាយរំដោះទឹកហើយ ឈ្មោះ សុខ សេង មានបំណងបំរុង មកកាយដីផ្លូវសាធារណៈរបស់រដ្ឋ ដែលមានទទឹង ៤ម៉ែត្រ ធ្វើជាប្រឡាយរំដោះទឹកជំនួសទៅវិញ។
ពលរដ្ឋបន្តទៀតថា ចំពោះផ្លូវសាធារណៈ ដែលមានទទឹង ៤ម៉ែត្រ និងប្រឡាយទទឹង ៣ម៉ែត្រ រហូតដល់មាត់ស្ទឹង ក៏ត្រូវបានមន្ត្រីជំនាញភូមិបាលស្រុកកៀនស្វាយ ចុះបាញ់ម៉ាស៊ីនជីភីអេស ដកហូតរក្សាទុកជាសម្បត្តិសាធារណៈរបស់រដ្ឋ និងបានបាញ់គំនូសសម្គាល់ហើយនោះ ក៏តែលោក ស៊ុត តូ មេឃុំ អនុញ្ញាតអោយបុគ្គលអ្នកមានលុយមានអំណាច ឈ្មោះ សុខ សេង នេះ ធ្វើរបងថ្មរំលោភព័ទ្ធយកយ៉ាងគឃ្លើនដដែល។
ពលរដ្ឋ បញ្ជាក់ថា ប្រឡាយរំដោះទឹកសាធារណៈទទឹង ៣ម៉ែត្រ និងផ្លូវសាធារណៈទទឹង ៤ម៉ែត្រ បណ្តោយទៅដល់ស្ទឹងនេះ កើតមានឡើងតាំងពីសម័យប៉ុលពតមកម្លេះ និងមានសារៈសំខាន់ណាស់ សម្រាប់រំដោះជំនន់ទឹកភ្លៀង នារដូវវស្សា ដើម្បីបញ្ជៀសការលិចផ្ទះសម្បែង ផ្លូវ ផលដំណាំផ្សេងៗ នៃភូមិស្តៅកន្លែង៤។ ចាប់តាំងពីបុគ្គល ឈ្មោះ សុខ សេង រំលោភយកបិទជិតគ្មានប្រព័ន្ធរំដោះទឹក បណ្តាលអោយទឹកភ្លៀងជន់លិច ធ្វើអោយប្រជាពលរដ្ឋ ជួបការលំបាកជាបន្តបន្ទាប់។
ពលរដ្ឋ បញ្ជាក់បន្ថែមថា ក្រោយពីប្រជាពលរដ្ឋធ្វើការតវ៉ា ស្រាប់តែកូនស្រីបង្កើតរបស់ឈ្មោះ សុខ សេង ឈ្មោះ សុខ រចនា ភេទស្រី អាយុប្រហែលជាង ២០ឆ្នាំ សរសេរជាអក្សរជេរប្រមាថប្រជាពលរដ្ឋចាស់ៗ ក្នុងភូមិតាមបណ្តាញសង្គមហ្វេសបុកថែមទៀត។
គួរបញ្ជាក់ថា ករណីនេះ ប្រជាពលរដ្ឋ បាននាំគ្នាផ្តិតមេដៃចំនួន ៩១គ្រួសារ ដាក់ពាក្យប្តឹងលោក ស៊ុត តូ មេឃុំ រួមគំនិតជាមួយលោក សុខ សេង រំលោភយកដីប្រឡាយ និងស្រីលោក សុខ សេង ឈ្មោះ សុខ រចនា ចូលទៅសាលាស្រុកតាំងពីថ្ងៃទី១៤ ខែឧសភា ឆ្នាំ២០២១ តែមិនមានប្រសិទ្ធភាពនោះទេ គឺអាជ្ញាធរ ដែលដឹកនាំដោយលោក ពៅ គឹមលី អភិបាលរងស្រុកកៀនស្វាយ មិនហាមឃាត់បុគ្គលរំលោភយកដីប្រឡាយ និងដីផ្លូវនោះទេ បែរជានិយាយគំរាមយកដាវអាជ្ញាសឹក មកបង្ក្រាបប្រជាពលរដ្ឋខ្លួន ដែលខំទាមទារផលប្រយោជន៍រួមទៅវិញ។ ដូច្នេះប្រជាពលរដ្ឋ សូមសំណូមអោយឯកឧត្តម គង់ សោភ័ណ្ឌ អភិបាលខេត្តកណ្តាល ជាពិសេសសម្តេចតេជោ ហ៊ុន សែន និងសម្តេចក្រឡាហោម ស ខេង មេត្តាជួយអន្តរាគមន៍សម្របសម្រួលដោះស្រាយរកយុត្តិធម៌ យកដីប្រឡាយមករក្សាទុកជាសម្បត្តិសាធារណៈវិញ។
លោក អន សាមន មេភូមិស្តៅកន្លែង៤ ទទួលស្គាល់ថា ឈ្មោះ សុខ សេង ពិតជាបានសង់របងថ្ម រំលោភយកដីប្រឡាយសាធារណៈ កើតមានតាំងពីជំនាន់ប៉ុលពត ដូចការលើកឡើងរបស់ប្រជាពលរដ្ឋប្រាកដមែន ហើយក្នុងនាមអាជ្ញាធរភូមិ លោកបានណែនាំប្រាប់គាត់ដែរ តែលោក សុខ សេង នេះមិនស្តាប់ និងបានលួចសាងសង់ រហូតដល់យប់ក៏មាន។
ចំណែកលោក ស៊ុត តូ មេឃុំ និងលោក ពៅ គឹមលី អភិបាលរងស្រុក ភ្នាក់ងារយើង មិនអាចទំនាក់ទំនង សុំការបំភ្លឺបានទេ៕
ចែករំលែកព័តមាននេះ