ម្ចាស់ដីទំនាស់ មានប្រតិកម្ម ចោទភាគីម្ខាងថា បន្តសាងសង់រំលោ.ភលើដីកាសម្រេចរក្សាការពាររបស់តុលាការ
- ភ្នំពេញ
រាជធានីភ្នំពេញ៖ ម្ចាស់ដីទំនាស់ និងក្រុមគ្រួសារ បានមានប្រតិកម្ម និងធ្វើការតវ៉ា ដោយប្រកាន់ថា លោក ព្រំ បូរ ដែលជាភាគីទំនាស់…
រាជធានីភ្នំពេញ៖ ម្ចាស់ដីទំនាស់ និងក្រុមគ្រួសារ បានមានប្រតិកម្ម និងធ្វើការតវ៉ា ដោយប្រកាន់ថា លោក ព្រំ បូរ ដែលជាភាគីទំនាស់ បានបន្តសាងសង់ នៅលើដីទំនាស់ ហើយរំលោភលើដីកាសម្រេចរក្សាការពាររបស់សាលាដំបូងរាជធានីភ្នំពេញ។ ចំពោះការលើកឡើងនេះ លោក ព្រំ បូរ ដែលជាភាគីជម្លោះ បានបដិសេធ និងថា លោកសាងសង់តែលើដី ពុំមានទំនាស់ប៉ុណ្ណោះ។
ការតវ៉ានេះ បានផ្ទុះឡើង កាលពីវេលាម៉ោងប្រមាណ ១២ និង ៣០នាទី ថ្ងៃត្រង់ ថ្ងៃទី០៤ ខែមិថុនា ឆ្នាំ២០២១ នៅចំណុចដីទំនាស់ ក្នុងភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោក លាង តាំង ភេទប្រុស អាយុ ៦៥ឆ្នាំ មានលំនៅផ្ទះលេខ ១៨១E0 ផ្លូវលេខ៥៩៨ ភូមិទំនប់ សង្កាត់ភ្នំពេញថ្មី ដែលជាម្ចាស់បំណុល បានចោទប្រកាន់ថា លោក ព្រំ បូរ ដែលជាកូនបំណុល បានបន្ត សាងសង់លើដីទំនាស់ រំលោភបំពានលើដីកាសម្រេចរក្សាការពារ លេខ ៥៦«ធ»ដ.រ ចុះថ្ងៃទី១១ ខែកុម្ភៈ ឆ្នាំ២០១៩ របស់សាលាដំបូង រាជធានីភ្នំពេញ ដែលបានសម្រេចហាមឃាត់ មិនអោយលោក ព្រំ បូរ និងបុគ្គលផ្សេងៗទៀត សាងសង់របងថ្ម រៀបឥដ្ឋ រំកិលបង្គោលព្រំដី និងការងារផ្សេងៗទៀត ក្នុងដីទំនាស់ ដែលស្ថិតនៅក្នុងភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោក លាង តាំង បានអោយដឹងទៀតថា លោក បានទិញដីនេះ ដែលមានទំហំ ៥០ម៉ែត្រ គុណ ៧០ម៉ែត្រ ពីឈ្មោះ ហម បាន និងប្រពន្ធឈ្មោះ ឡុង រដ្ឋា តាំងពីឆ្នាំ២០០២ មកម្លេះ។ នៅឆ្នាំ២០១៤ ឈ្មោះ ព្រំ បូរ និងប្រពន្ធឈ្មោះ ហេង អៃងីម បានចាក់ដី បោះបង្គោល រំលោភយកផ្នែកខាងមុខ ទំហំ ៩.៤៥ម៉ែត្រ និងផ្នែកខាងក្រោយ ទំហំទទឹង ៧.៣៦ម៉ែត្រ។ ចាប់ពីពេលនោះមក ក៏មានការប្តឹងផ្តល់គ្នា ហើយត្រូវបានសាលាដំបូងរាជធានីភ្នំពេញ ចេញដីកាសម្រេចរក្សាការពារ ហាមឃាត់ភាគីទំនាស់ទាំង២ ប៉ះពាល់សាងសង់លើដីទំនាស់នេះ តែត្រូវបានភាគី លោក ព្រំ បូរ នៅតែបន្តសាងសង់ រំលោភលើដីការហូតមក។
ម្ចាស់បំណុល ក៏បានសំណូមពរ ដល់អាជ្ញាធរ មេត្តាជួយអន្តរាគមន៍ ហាមឃាត់លោក ព្រំ បូរ សាងសង់លើដីទំនាស់ រង់ចាំសាលាដំបូងរាជធានីភ្នំពេញ បន្តនីតិវិធី ខណៈដែលលោក ព្រំ បូរ ក៏បានចេញមក ធ្វើការបំភ្លឺ អោយដឹងថា លោកមិនបានសាងសង់រំលោភលើដីការក្សាការពារនោះទេ គឺគាត់សាងសង់តែលើដីរបស់ខ្លួន ដែលពុំមានទំនាស់នោះទេ។ ចំណែកដីទំនាស់ ទំហំ ៣៧៨ម៉ែត្រការ៉េ ដែលមានទទឹងម្ខាង ប្រវែង ៧.៣៦ម៉ែត្រ និងទទឹងម្ខាងទៀត ប្រវែង ៩.៤៥ម៉ែត្រ មានបណ្តោយប្រវែង ៤៥.០៣ម៉ែត្រ លោកពុំបានប៉ះពាល់នោះទេ៕ ម៉េង ធា
ចែករំលែកព័តមាននេះ