- ភ្នំពេញ
ភ្នំពេញ៖ កន្លងមក ការធ្វើសៀវភៅគ្រួសារ ជាសមត្ថកិច្ចរបស់ស្នងការដ្ឋាននគរបាលរាជធានី-ខេត្ត តែពេលនេះ លែងពិបាកសាំញ៉ាំច្រើនទៀតហើយ សៀវភៅគ្រួសារ ត្រូវចុះហត្ថលេខា ត្រឹមអធិការនគរបាលស្រុក ឬខណ្ឌ…
ភ្នំពេញ៖ កន្លងមក ការធ្វើសៀវភៅគ្រួសារ ជាសមត្ថកិច្ចរបស់ស្នងការដ្ឋាននគរបាលរាជធានី-ខេត្ត តែពេលនេះ លែងពិបាកសាំញ៉ាំច្រើនទៀតហើយ សៀវភៅគ្រួសារ ត្រូវចុះហត្ថលេខា ត្រឹមអធិការនគរបាលស្រុក ឬខណ្ឌ…
ភ្នំពេញ៖ កន្លងមក ការធ្វើសៀវភៅគ្រួសារ ជាសមត្ថកិច្ចរបស់ស្នងការដ្ឋាននគរបាលរាជធានី-ខេត្ត តែពេលនេះ លែងពិបាកសាំញ៉ាំច្រើនទៀតហើយ សៀវភៅគ្រួសារ ត្រូវចុះហត្ថលេខា ត្រឹមអធិការនគរបាលស្រុក ឬខណ្ឌ តែប៉ុណ្ណោះ។ ចំណែកឯសៀវភៅស្នាក់នៅ ក៏ត្រូវផ្ទេរពីអធិការដ្ឋាននគរបាលស្រុក ឬខណ្ឌ មកឲ្យត្រឹមប៉ុស្តិ៍នគរបាលរដ្ឋបាលឃុំ ឬសង្កាត់ ចុះហត្ថលេខាជំនួសវិញ។
ចំពោះការសម្រួលការងារនេះ ត្រូវបានលោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានប្រកាសនៅថ្ងៃទី០៣ ខែមិថុនា ឆ្នាំ២០២១ ថា សេវាកាន់តែទៅកៀកប្រជាពលរដ្ឋ ហើយមន្ត្រីទាំងអស់ ត្រូវតែបម្រើប្រជាពលរដ្ឋឲ្យបានល្អ ជាពិសេសការធ្វើសៀវភៅគ្រួសារ និងសៀវភៅស្នាក់នៅ ត្រូវតែធ្វើឲ្យបានឆាប់រហ័សបំផុត ព្រោះចុះហត្ថលេខា ត្រឹមលោកអធិការនគរបាលខណ្ឌ និងលោកនាយប៉ុស្តិ៍ តែប៉ុណ្ណោះ។
ក្រោយការអនុវត្តតាមបទបញ្ជា និងការណែនាំជាប្រចាំរបស់លោកឧត្តមសេនីយ៍ឯក ស ថេត មួយរយៈពេលកន្លងមកនេះ មន្ត្រីថ្នាក់ក្រោមតាមបណ្តាខណ្ឌប៉ុស្តិ៍ភាគច្រើន បានអនុវត្តការងារបម្រើប្រជាពលរដ្ឋបានយ៉ាងល្អ ជាពិសេសគឺការប្រើប្រាស់ពាក្យសម្តី និងកាយវិការសមរម្យជាមួយប្រជាពលរដ្ឋ ក៏ដូចជា ការផ្តល់សេវាជូនប្រជាពលរដ្ឋបានយ៉ាងឆាប់រហ័ស។
ទោះជាយ៉ាងណា នៅតែមានមន្ត្រីមួយចំនួនតូច អនុវត្តមិនទាន់បានល្អ ជូនប្រជាពលរដ្ឋ។ ដូច្នេះលោកឧត្តមសេនីយ៍ ស្នងការ បានណែនាំឲ្យមន្ត្រីទាំងនោះ ត្រូវតែកែប្រែទម្លាប់មិនល្អ ហើយបម្រើប្រជាពលរដ្ឋឲ្យបានល្អ និងទទួលបាននូវភាពទុកចិត្ត និងជឿជាក់ពីសំណាក់ប្រជាពលរដ្ឋ។
ស្នងការនគរបាលរាជធានីភ្នំពេញ ក៏បានប្រកាសជូនសាធារណជនថា បើមានករណីយឺតយ៉ាវ និងបម្រើប្រជាពលរដ្ឋមិនបានល្អ ពិសេសលើការងារចាត់តាំងថ្មី នៃការធ្វើសៀវភៅស្នាក់នៅ និងសៀវភៅគ្រួសារ សូមទំនាក់ទំនងលេខទូរសព្ទ៖ 069 516 999។
គួររម្លឹកថា កាលពីថ្ងៃទី១ ខែកក្កដា ឆ្នាំ២០២០ ក្រសួងមហាផ្ទៃ បានចេញប្រកាសសម្រេចកែសម្រួលសមត្ថកិច្ចរបស់នគរបាលជាតិ ក្នុងការធ្វើសៀវភៅគ្រួសារ និងសៀវភៅស្នាក់នៅ។ សៀវភៅគ្រួសារ ពីមុនជាសមត្ថកិច្ចរបស់ស្នងការដ្ឋាននគរបាលរាជធានី-ខេត្ត ត្រូវរុញទម្លាក់មកនៅត្រឹមអធិការដ្ឋាននគរបាលស្រុក ឬខណ្ឌវិញ។ ដោយឡែកសៀវភៅស្នាក់នៅ ដែលធ្លាប់ធ្វើនៅអធិការដ្ឋាននគរបាលស្រុក ឬខណ្ឌ ត្រូវរុញទម្លាក់មកនៅត្រឹមប៉ុស្តិ៍នគរបាលឃុំសង្កាត់ជំនួសវិញ។
ក្រសួងមហាផ្ទៃ ក៏បានបញ្ជាក់ថា ជនបរទេសគ្មានសិទ្ធិកាន់កាប់ប្រើប្រាស់សៀវភៅគ្រួសារនេះទេ។ ជនណា ដែលគ្មានសញ្ជាតិខ្មែរ ហើយក្លែងបន្លំតាមរូបភាពណាក៏ដោយ ដើម្បីកាន់កាប់សៀវភៅគ្រួសារ ឬអាជ្ញាធរមានសមត្ថកិច្ចណា ដែលអនុវត្តភារកិច្ចនេះ ផ្ទុយពីបទបញ្ញត្តិនៃអនុក្រឹត្យ ស្តីពី សៀវភៅគ្រួសារ ត្រូវផ្តន្ទាទោសតាមច្បាប់ជាធរមាន។
ក្នុងពេលអាជ្ញាធរសមត្ថកិច្ច បង្ខិតសេវាកាន់តែកៀកប្រជាពលរដ្ឋ នាពេលនេះ ប្រជាពលរដ្ឋ បានសម្តែងការសាទរជាខ្លាំង។ ក្នុងនោះ ប្រជាពលរដ្ឋ ក៏សង្ឃឹមថា ពេលទៅធ្វើសៀវភៅស្នាក់នៅ ឬសៀវភៅគ្រួសារនេះ នៅប៉ុស្តិ៍នគរបាលឃុំសង្កាត់ គឺមិនស្មុគស្មាញ ដូចកាលកន្លងមកឡើយ។
តាមនីតិវិធី ដើម្បីធ្វើសៀវភៅស្នាក់នៅ ឬសៀវភៅលឿង បាន បុគ្គលនោះ ត្រូវមានលិខិតបញ្ជាក់ផ្ទេរទីលំនៅ ចេញពីឃុំសង្កាត់ ដែលខ្លួនរស់នៅកាលពីមុន។ បន្ទាប់មក ទៅទីស្នាក់ការប៉ុស្តិ៍នគរបាលរដ្ឋបាលសង្កាត់ ដែលខ្លួនរស់នៅថ្មី ដើម្បីធ្វើសៀវភៅស្នាក់នៅ។
ជាបទពិសោធន៍កន្លងមក នៅពេលស្នើសុំចេញលិខិតផ្លាស់ប្តូរទីលំនៅ គឺនៅទីស្នាក់ការប៉ុស្តិ៍នគរបាលរដ្ឋបាលឃុំសង្កាត់ចាស់ ដោយរកអ្នកស៊ីញ៉េ ទម្រាំបាន។ តែក៏មានសេវារត់ការ ដែលប៉ូលិសនៅក្នុងប៉ុស្តិ៍នោះ ជាអ្នកធ្វើឲ្យ ទើបបានឆាប់រហ័ស ដោយត្រូវចំណាយលុយទៅតាមហាងឆេង តាមមាត់អ្នករត់ការនោះ។ នៅសង្កាត់មួយ ក្នុងខណ្ឌសែនសុខ រាជធានីភ្នំពេញ ត្រូវចំណាយ ១៥ដុល្លារ។ តែបើរត់ការខ្លួនឯង គឺកាន់ឯកសារខ្លួនឯង ត្រូវចំណាយពេលយូរ ទម្រាំបានស៊ីញ៉េពីមេប៉ុស្តិ៍ នៅចុះលេខបញ្ជី ហើយចំណាយ គឺតាមទឹកចិត្តរបស់សាមីជន ដោយប៉ូលិសប៉ុស្តិ៍ មិនទារលុយទេ។
រីឯសៀវភៅគ្រួសារ គឺទាល់តែមានសៀវភៅស្នាក់នៅហើយ ទើបប្រជាពលរដ្ឋនោះ អាចឈានទៅស្នើសុំធ្វើសៀវភៅគ្រួសារ ឬគេហៅថា សៀវភៅខ្លឹមខ្នុរ។
ម្យ៉ាងទៀត កន្លងមក ក៏មានករណីថា ធ្វើសៀវភៅស្នាក់នៅ និងសៀវភៅគ្រួសារ គឺធ្វើមិនអស់លុយនោះទេ។ តែបើមិនអស់លុយ ធ្វើមិនបានដែរ។ នោះគឺទៅរកអ្នកស៊ីញ៉េ ចេះតែមិនជួបរហូត បើសិនជាមិនចាយលុយ លើថ្លៃរត់ការ រត់ឯកសារទេ។ ពោលគឺនៅពេលផ្ទេរឯកសារពីឃុំសង្កាត់ចាស់មកបានហើយ ត្រូវទៅកាន់ប៉ុស្តិ៍នគរបាលរដ្ឋបាលឃុំសង្កាត់ថ្មី ដែលខ្លួនកំពុងរស់នៅ ហើយជួបមន្ត្រីប៉ូលិសខាងចុះបញ្ជី បន្ទាប់មក សាមីជននោះ ត្រូវកាន់ឯកសារ ទៅរកអនុប្រធានប៉ុស្តិ៍ ដើម្បីពិនិត្យ ស៊ីញ៉េ មុននឹងទៅដល់មេប៉ុស្តិ៍។ ប៉ុន្តែជាបទពិសោធន៍ បើកាន់ឯកសារទៅដោយខ្លួនឯង គេរកមិនចេះជួបអនុប្រធានប៉ុស្តិ៍ និងមេប៉ុស្តិ៍ឡើយ សូម្បីតែអ្នកទាំងនោះ នៅក្នុងបន្ទប់ធ្វើការក្នុងប៉ុស្តិ៍ ក៏គេប្រាប់ថា ទៅប្រជុំនៅខណ្ឌដែរ។ នេះជាបទពិសោធន៍មួយ ដែលប្រជាពលរដ្ឋមួយចំនួននៅភ្នំពេញ ជួបប្រទះកន្លងមក។
យ៉ាងណាក៏ដោយ ក្នុងពេលធ្វើកំណែទម្រង់ការងារថ្មី នាពេលនេះ បញ្ហាស្មុគស្មាញខាងលើ គេសង្ឃឹមថា នឹងលែងជាបញ្ហាទៀតហើយ។ តែបើជាដំណោះស្រាយឲ្យកាន់តែល្អប្រសើរទៀត គួរតែការធ្វើសៀវភៅស្នាក់នៅ និងសៀវភៅគ្រួសារ ធ្វើតាមច្រកចេញចូលតែមួយ ដូចនៅតាមសាលាស្រុក សាលាខណ្ឌ សាលាក្រុង សាលាខេត្ត និងនៅសាលារាជធានីភ្នំពេញ។ តារាងតម្លៃ និងរយៈពេលផ្តល់សេវា ត្រូវបានកំណត់យ៉ាងច្បាស់ ហើយប្រជាពលរដ្ឋ ដាក់ឯកសារតែនៅបញ្ឈរជួរមុខតែមួយ។ បើឯកសារគ្រប់គ្រាន់ហើយ បង់ថ្លៃតាមការកំណត់ក្នុងតារាងបញ្ជីហើយ ចាំតែដល់ថ្ងៃកំណត់ មកយកឯកសារនោះ ជាការស្រេច។
នៅការិយាល័យច្រកចេញចូលតែមួយ គឺងាយស្រួលទាំងប្រជាពលរដ្ឋ ទៅទទួលសេវា និងងាយស្រួលទាំងមន្ត្រីបំរើសេវា។ បញ្ហាស្មុគស្មាញ ការិយាធិបតេយ្យ ការយកលុយថ្លៃសេវាថ្លៃហួសហេតុ និងបញ្ហាអ្នករត់ការ ជាដើម ត្រូវបានលុបបំបាត់ តាមរយៈការិយាល័យច្រកចេញចូលតែមួយ នៅតាមសាលាស្រុក ខណ្ឌ ក្រុង និងនៅសាលារាជធានីខេត្ត។
យ៉ាងណាក៏ដោយ នៅពេលដែលស្នងការ ចេញសេចក្តីណែនាំជាថ្មីនាពេលនេះ គេរំពឹងថា តាមទីស្នាក់ការប៉ុស្តិ៍នគរបាលរដ្ឋបាលសង្កាត់ និងនៅអធិការដ្ឋាននគរបាលខណ្ឌទាំងអស់ នៅភ្នំពេញ នឹងលែងបង្កបញ្ហាស្មុគស្មាញដូចមុនហើយ លើសេវាធ្វើសៀវភៅស្នាក់នៅ និងសៀវភៅគ្រួសារ។ បើមន្ត្រីប៉ូលិសណា ហ៊ានទារលុយ ឬក៏បង្កបញ្ហាយឺតយ៉ាវ នោះនឹងត្រូវប្រជាពលរដ្ឋប្តឹងទៅស្នងការដ្ឋាននគរបាលរាជធានីភ្នំពេញ ដែលមានលេខទូរសព្ទ 069 516 999 ហើយប្រជាពលរដ្ឋ ក៏អាចប្តឹងហ្វេសប៊ុកថែមទៀតផង៕
ចែករំលែកព័តមាននេះ