មកស្គាល់កីឡាករប៉េតង់១រូបឈ្នះមេដាយរាប់មិនអស់លើឆាកអន្តរជាតិ
- ភ្នំពេញ
រាជធានីភ្នំពេញ ៖ នៅក្នុងវិស័យកីឡាប៉េតង់ កីឡាករ សុខ ចាន់មាន ក៏ចាត់ទុកជាកីឡាករឆ្នើម និងជាម្ចាស់មេដាយកម្រិត
រាជធានីភ្នំពេញ ៖ នៅក្នុងវិស័យកីឡាប៉េតង់ កីឡាករ សុខ ចាន់មាន ក៏ចាត់ទុកជាកីឡាករឆ្នើម និងជាម្ចាស់មេដាយកម្រិត អន្តរជាតិមួយរូប ដែលឈ្នះមេដាយរាប់មិនអស់ផងដែរ។ កីឡាកររូបនេះ ក៏មានឋានៈជានាយទាហានថ្នាក់វរសេនីយ៍ឯក នៅមជ្ឈមណ្ឌលកីឡាកងយោធពលខេមរៈភូមិន្ទ នៃក្រសួងការពារជាតិផងដែរ។
កីឡាករ សុខ ចាន់មាន គឺជាកីឡាករជម្រើសជាតិផ្នែកប៊ូល និងប៉េតង់ ដោយលោកក៏មានស្នាដៃលើឆាកអន្តរជាតិមិនធម្មតា។ ហាត់ត្រូវការទីលាន លោកគឺជាធនធានដ៏សំខាន់ក្នុងសហព័ន្ធមួយនេះ ។ លោកជាម្ចាស់មេដាយប្រាក់ស៊ីហ្គេម និង ការប្រកួតជាច្រើនលើឆាកអន្តរជាតិ។
កីឡាករប៉េតង់ សុខ ចាន់មាន អាយុ៤២ឆ្នាំ មានស្រុកកំណើតនៅរាជធានីភ្នំពេញ។ លោកចាប់ផ្ដើមលេងកីឡានៅឆ្នាំ១៩៩៨ ហើយឆ្នាំ១៩៩៩ បានចូលប្រកួតប៉េតង់យុវជនពិភពលោក តាំងពីអាយុ១៧ឆ្នាំ នៅប្រទេសថៃ ហើយទទួលបានមេដាយមាស។ ឆ្នាំ២០០០ ប្រកួតក្នុងព្រឹត្តិការណ៍កីឡាដើម្បីវប្បធម៌នៅហូជីមិញ ប្រទេសវៀតណាម បានមេដាយ១។ នៅឆ្នាំ២០០១ ប្រកួតជើងឯកអាស៊ីលើកទី៥ នៅភ្នំពេញ បានមេដាយមាស។ នៅឆ្នាំ២០០២ ប្រកួតជើងឯកអាស៊ីលើកទី៦ នៅម៉ាឡេស៊ី ទទួលបានមេដាយសំរឹទ្ធ។ នៅឆ្នាំ២០០៣ ប្រកួតមេគង្គហ្គេម នៅប្រទេសថៃ ទទួលបានមេដាយមាស១ និងប្រកួត Pan Pacific នៅប្រទេសវៀតណាម ទទួលបានមេដាយមាស១។ នៅឆ្នាំ២០០៤ ប្រកួតជើងឯកនៅប្រទេសបារាំង ដោយទទួលបានមេដាយសំរិទ្ធ១។ នៅឆ្នាំ២០០៥ ប្រកួតអាស៊ីប៉ាស៊ីហ្វិក នៅប្រទេសសិង្ហបុរី ទទួលបានមេដាយប្រាក់១។ នៅ២០០៦ ប្រកួតកីឡាវប្បធម៌ នៅប្រទេសវៀតណាមសារជាថ្មី ទទួលបានមេដាយមាស១ និង ប្រាក់២។
បច្ចុប្បន្នលោកនៅតែជាកីឡាករជម្រើសជាតិផ្នែកកីឡាប៉េតង់ និងប៊ូលផងដែរ ដោយលោកនឹងបន្តសកម្មភាពនៅលើឆាកអន្តរជាតិ ដើម្បីបន្តយកមេដាយជូនកម្ពុជា។
កីឡាករ សុខ ចាន់មាន បានអះអាងថា ដើម្បីត្រៀមខ្លួនទៅស៊ីហ្គេមនៅចុងឆ្នាំនេះ គឺលោកបានផ្ដើមហ្វឹកហាត់នៅផ្ទះរាល់ថ្ងៃ ដោយរំពឹងថា ការត្រៀមចេញទៅប្រកួតស៊ីហ្គេមនៅចុងឆ្នាំនេះ នឹងទទួលផ្លែផ្កា បើទោះជាការត្រៀមខ្លួននៅក្នុងឆ្នាំនេះរាងពិបាកបន្តិច។ លោកនៅតែបន្តហ្វឹកហាត់លើរាងកាយផងដែរ ដើម្បីសម្រួលសរសៃដៃ-ជើង ដើម្បីកុំឲ្យស្ពឹកស្រពន់ ហើយរង់ចាំមើល បើ សភាពការណ៍ជំងឺកូវីដធូរស្រាល អាជ្ញាធរអនុញ្ញាតឲ្យចេញពីផ្ទះបាន លោកនឹងរកកន្លែងសមគួរហ្វឹកហាត់បន្ថែមទៀត ៕
ចែករំលែកព័តមាននេះ