រថយន្តកុងតឺន័រមួយគ្រឿងបុកចូលកន្លែងលក់ផ្កាផ្អើ.លសង្កាត់ក្បាលកោះទាំងព្រឹក
- ភ្នំពេញ
រាជធានីភ្នំពេញ ៖ រថយន្តកុងតឺន័រមួយគ្រឿង បានរេចង្កូតបើកបុកចូលទៅនឹងផ្ទះបងប្អូនប្រជាពលរដ្ឋអ្នកលក់ផ្កាមួយកន្លែង
រាជធានីភ្នំពេញ ៖ រថយន្តកុងតឺន័រមួយគ្រឿង បានរេចង្កូតបើកបុកចូលទៅនឹងផ្ទះបងប្អូនប្រជាពលរដ្ឋអ្នកលក់ផ្កាមួយកន្លែង ធ្លាយចូលទៅខាងក្នុងរបងសួនផ្កា បង្កអោយមានការភ្ញាក់ផ្អើលទាំងព្រឹកនៅវេលាម៉ោង៥និង៤០នាទីព្រឹកថ្ងៃទី៤ ខែមិថុនា ឆ្នាំ២០២១ នៅតាមបណ្តោយផ្លូវជាតិលេខ១ ស្ថិតក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
រថយន្តបង្កជាប្រភេទរថយន្តកុងតឺន័រ ប៉ុន្តែមិនមានទូកុងតឺន័រដឹកពីក្រោយឡើយ ដោយមានតែក្បាលរថយន្តប៉ុណ្ណោះ ហើយរថយន្តនេះ ពាក់ស្លាកលេខ ភ្នំពេញ 3A-6098 បើកបរដោយបុរសម្នាក់មិនស្គាល់អត្តសញ្ញាណ ។
យោងតាមប្រភពព័ត៌មានបានអោយដឹងថា នៅមុនកើតហេតុ គេសង្គេតឃើញរថយន្តបង្កបើកបរដោយបុរសម្នាក់ ធ្វើដំណើរតាមបណ្តោយផ្លូវជាតិលេខ១ ក្នុងទិសដៅពីកើតទៅលិច ពោលពីអ្នកលឿងចូលទៅភ្នំពេញ ។ លុះធ្វើដំណើរដល់ចំណុចកើតហេតុ រថយន្តក៏រេចង្កូតបើកបុកបង្គោលភ្លើងបំភ្លឺផ្លូវអស់១ដើមបណ្តាលអោយបាក់ដួលដល់ដី ហើយរថយន្តនៅមិនទាន់អស់ល្បឿន ក៏ជ្រុលបុកធ្លាយរបងផ្ទះបងប្អូនពលរដ្ឋអ្នកលក់ផ្កា ធ្លាយចូលទៅដល់ខាងក្នុងសួន បណ្តាលអោយរបងទ្វារត្រូវរងការខូចខាតអស់៥ផ្ទាំង ហើយផ្កាជាច្រើនសម្រាប់ដាក់លក់ ត្រូវខូចខាតខ្ទេចអស់ផងដែរ ។ ដោយឡែក អ្នកបើកបររថយន្តបង្កបានបើកទ្វារចេញទៅក្រៅ ហើយរត់គេចបាត់ស្រមោលពីកន្លែងកើតហេតុតែម្តង ។
ក្រោយកើតហេតុ សមត្ថកិច្ចមូលដ្ឋាន បានចុះអន្តរាគមន៍វាស់វែងដើម្បីបន្តនីតិវិធីច្បាប់ ប៉ុន្តែដោយសារ ភាគីខាងរថយន្តបង្ក មានតំណាងចេញមុខមកដោះស្រាយសំណងជាមួយនឹងភាគីពលរដ្ឋម្ចាស់សួនផ្កា ក៏សមត្ថកិច្ចសម្រេចធ្វើការជួយសម្របសម្រួលតែម្តង ។ បើទោះបីជាមានការសម្របសម្រួលជាមួយភាគីខាងរងគ្រោះក៏ដោយ ក៏សមត្ថកិច្ចនៅតែបន្តដកហូតរថយន្តខាងលើយកទៅរក្សាទុកនៅ អធិការដ្ឋាននគរបាលខណ្ឌជាបណ្តោះអាសន្នសិនផងដែរ ព្រោះរថយន្តបង្កបានបើកបុកបង្គោលភ្លើងសាធារណះរបស់រដ្ឋ អញ្ចឹងហើយចំណុចនេះ តម្រូវអោយម្ចាស់រថយន្ត ឬតំណាង ត្រូវចូលខ្លួនទៅកាន់អធិការដ្ឋាននគរបាល ដើម្បីធ្វើការដោះស្រាយសំណងជូនរដ្ឋ តាមនីតិវិធីច្បាប់ផងដែរ ។
សូមបញ្ជាក់ថា នៅក្នុងហេតុការណ៍ខាងលើនេះ ពុំមានបណ្តាលអោយមនុស្សណាម្នាក់រងរបួសឡើយ គឺខូចខាតតែទ្រព្យសម្បត្តិរដ្ឋ និងឯកជនប៉ុណ្ណោះ ។ ហើយករណីនេះ គេពុំទាន់ដឹងថា បង្កឡើងដោយការធ្វេសប្រហែសរបស់តៃកុងពេលកំពុងបើកបរ ឬក៏រូបគេជួបនឹងឧបសគ្គអ្វីអោយប្រាកដឡើយ ព្រោះក្រោយកើតហេតុ គេរត់គេចខ្លួនបាត់ស្រមោល ៕
ចែករំលែកព័តមាននេះ