តាមមធ្យោបាយជាច្រើនការរៀបចំផែនការថវិកានាំមកនូវភាពលំបាក វាប្រៀបបាននឹងអ្នកកំពុងតមអាហារ ឬហាត់ប្រាណយកសាច់ដុំកង់ៗជាដើម ។ ប៉ុន្តែអ្វីដែលសំខាន់ គឺចិត្ត និងការប្តេជ្ញាចិត្តរបស់អ្នកបានដល់កម្រិតណា អុីចឹងមកស្វែងយល់អំពីតិចនិកក្នុងការសន្សំប្រាក់ និងការរៀបផែនការថវិកាទាំងអស់គ្នា ៖
វិធីសាស្ត្រទី ១ គិតពីប្រយោជន៍នៃលុយជាមុនសិន ៖
អ្នកជំនាញបានឱ្យដឹងថា ការរៀបផែនការហិរញ្ញវត្ថុអាចទទួលបានជោគជ័យ ឬបរាជ័យ គឺអាស្រ័យលើផ្នត់គំនិតរបស់មនុស្សម្នាក់ៗ ។ អ្វីដែលសំខាន់អ្នកមិនត្រូវឱ្យថវិកា អូសទាញចិត្តអ្នកបានទេ មានន័យថា ថវិកាអ្នកច្រើនអ្នកត្រូវចាយច្រើនដែរ ។ លោក Brandt មានប្រសាសន៍ថា អ្នកត្រូវប្រាប់ខ្លួនឯងថាទេ មិនត្រូវរង់ចាំលុយមកប្រាប់អ្នកថា កុំនោះទេ ត្រង់ចំណុចនេះនៅពេលអ្នកចង់ចំណាយប្រាក់ទៅលើរបស់អ្វីមួយដែលមិនចាំបាច់ នោះគ្មានលុយមកប្រាប់យើងថា កុំទិញនោះទេ មានតែយើងដឹងអំពីថវិការបស់យើងមានប៉ុនណា និងត្រូវហាមឃាត់ចិត្តខ្លួនឯងកុំឱ្យទិញ ឬចាយ ។ ជាការពិតប្រសិនបើអ្នកមិនមានផែនការចាយលុយ មិនមានចំណេះដឹងក្នុងការគ្រប់គ្រងលុយ ឬមិនដឹងពីប្រយោជន៍របស់វាអាចជួយអ្នកក្នុងគ្រាអាសន្នបាន នោះអ្នកប្រាកដណាស់ គឺចាយអស់ៗតែម្តង ។ នៅពេលអ្នកចាយលុយគ្មានសល់ និងបន្តធ្វើវាជារៀងរាល់ខែនោះ សូម្បីតែផែនការនាពេលអនាគតរបស់អ្នកក៏រលាយដែរ ។
វិធីសាស្ត្រទី ២ ផ្តល់រង្វាន់ដល់ខ្លួនឯងដើម្បីជោគជ័យ ៖
ជាការពិតប្រសិនបើអ្នកមានការទុកដាក់លុយ និងសន្សំនៅក្នុងគណនីបានយ៉ាងល្អ នោះមិនខុសទាស់អ្វីនោះទេដែលអ្នកត្រូវឱ្យរង្វាន់ខ្លួនឯង ដូចជាការបរិភោគអាហារឆ្ងាញ់មួយពេល ពីរនាក់គូស្វាមីភរិយា វាជាការលើកទឹកចិត្តនៅពេលអ្នកធ្វើបានល្អ ។ លោក Brandt មានប្រសាសន៍ថា នៅពេលអ្នកកសាងប្រព័ន្ធថវិកាប្រចាំខែបានល្អ និងប្រកាន់ខ្ជាប់នូវថវិការបស់អ្នក ដូចនេះរយៈពេល ៣ ខែ ឬតិចជាងនេះ អ្នកគួររៀបចំអាហារពេលល្ងាច មើលកុនជាមួយប្តី ឬកូនៗ ។ល។ ហើយប្រសិនបើអ្នកជោគជ័យក្នុងការសន្សំរយៈពេល ៦ ខែ ដូចនេះអ្នកគួរឈប់សម្រាកវិស្សមកាលតូចមួយ ដើម្បីមានដំណើរកម្សាន្ត ។
វិធីសាស្ត្រទី ៣ ត្រូវដឹងនិងស្គាល់ខ្លួន ៖
លោក Brandt មានប្រសាសន៍ថា ការស្គាល់ខ្លួនឯង និងទម្លាប់អាក្រក់របស់អ្នក គឺជារឿងសំខាន់ណាស់ ប្រសិនបើអ្នកមានបានរៀបចំផែនការហិរញ្ញវត្ថុរួចហើយ អ្វីដែលជាឧបសគ្គនោះគឺ ទម្លាប់អាក្រក់របស់អ្នកដែលជចូលចិត្តចាយលុយផ្តេសផ្តាស់ ។ ដូចនេះអ្នកត្រូវយល់អំពីខ្លួនឯងឱ្យបានច្បាស់ និងការផ្លាស់ប្តូរទម្លាប់ទាំងនោះចេញ អ្នកត្រូវទម្លាប់សន្សំលុយ អ្នកត្រូវគិតរបស់ដែលអ្នកនឹងទិញវាចាំបាច់ដែរ ឬទេ ? ប្រសិនបើអ្នកមានទំនោរចង់ផ្លុំប្រាក់នៅផ្សារ សូមចៀសវាងវាទាំងស្រុង ។ ប្រសិនបើអ្នកតែងតែត្រូវបានល្បួង ឱ្យបរិភោគអាហារខាងក្រៅផ្ទះញឹកញាប់ សូមប្តូរមកជាការទិញគ្រឿងទេស ដើម្បីចំអិនញុំានៅផ្ទះវិញ ។ ការស្គាល់ខ្លួនអ្នក និងចំណុចខ្សោយរបស់អ្នកអាចជួយអ្នកឱ្យដើរលើមូលដ្ឋានថវិកាបាន ។
វិធីសាស្ត្រទី ៤ កុំបោះបង់ ប្រសិនបើដំណើរការផែនការចាប់ផ្តើមដំបូង អ្នកមិនជោគជ័យ ៖
លោក Brandt អ្នកត្រូវធ្វើជាម្ចាស់មូលដ្ឋានគ្រឹះនៃថវិកា ប្រសិនបើអ្នកមិនទទួលបានជោគជ័យនៃគ្រាដំបូង អ្នកត្រូវតាមដាន និងកែសម្រួលដំណើរការផែនការថវិកាឡើងវិញ រហូតទាល់តែអ្នកទទួលបានភាពជោគជ័យ ។ កុំបោះបង់ប្រសិនបើផែនការថវិកាដំបូងរបស់អ្នក មិនអាចជួយអ្នកសន្សំប្រាក់បានច្រើន ឬកាត់បន្ថយការចំណាយរបស់អ្នកបានច្រើន ។ ផ្ទុយទៅវិញ អ្នកត្រូវស្វែងយល់ថា មានអ្វីខុស ហើយត្រូវព្យាយាមម្តងទៀត ។ ប្រសិនបើអ្នកបរាជ័យក្នុងខែនេះ ខែបន្ទាប់អាចនឹងប្រសើរឡើង ៕ ប្រភព ៖ Discover
ចែករំលែកព័តមាននេះ