ខេត្តតាកែវ ៖ សត្វជ្រូកចំនួន ៥០ក្បាល ផ្ទុកជំងឺប៉េស្តជ្រូកអាហ្វ្រិក ដែលត្រូវបានឈ្មួញលួចនាំចូលពីប្រទេសថៃ ត្រូវបានមន្ត្រីជំនាញកសិកម្ម ធ្វើការចាប់ និងដុតកម្ទេចចោល ដើម្បីកុំឲ្យប៉ះពាល់ដល់សុខភាពអ្នកបរិភោគ និងទប់ស្កាត់ផលប៉ះពាល់ដល់អ្នកចិញ្ចឹមជ្រូកក្នុងស្រុក ។
ពិធីដុតកម្ទេចជ្រូក៥០ក្បាលនេះ បានធ្វើឡើងនាព្រឹកថ្ងៃទី៣ ខែមិថុនា ឆ្នាំ២០២១ នៅក្នុងភូមិសាស្ត្រស្រុកបាទី ខេត្តតាកែវ ។
ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វ លោក តាន់ ផាន់ណារ៉ា បានថ្លែងប្រាប់អ្នកសារព័ត៌មានឲ្យដឹងថា នេះគឺជាលើកទី៤ ហើយដែលមន្ត្រីជំនាញបានដុតកម្ទេចចោលសត្វជ្រូកលួចនាំចូលពីក្រៅប្រទេសដោយខុសច្បាប់ បន្ទាប់ពីរកឃើញមានជំងឺប៉េស្តជ្រូកអាហ្វ្រិកលើសត្វជ្រូកទាំងនោះ ។ ជាក់ស្តែងថ្ងៃនេះ សត្វជ្រូកដែលដុតបំផ្លាញចំនួន៥០ក្បាល គឺជាជ្រូក ដែលក្រុមឈ្មួញនាំចូលពីប្រទេសថៃ ដោយខុសច្បាប់ ត្រូវមន្ត្រីជំនាញ ចាប់បាននៅទីសតឃាតមួយកន្លែងនៅក្នុងខណ្ឌច្បារអំពៅ និងមួយកន្លែងទៀតនៅភូមិដំណាក់ធំ សង្កាត់ស្ទឹងមានជ័យទី៣ ខណ្ឌមានជ័យ ក្នុងរាជធានីភ្នំពេញ កាលពីសប្ដាហ៍មុន ។
លោក តាន់ ផាន់ណារ៉ា បានបន្តថា ក្នុងរយៈ៥ខែដើម ឆ្នាំ២០២១នេះ មន្ត្រីសមត្ថកិច្ចជំនាញកសិកម្ម បានបង្ក្រាបសត្វជ្រូក ដែលក្រុមឈ្មួញលួចនាំចូលពីក្រៅប្រទេស បានចំនួន៣១ករណី ។ ហើយបាននិងកំពុងតែពង្រឹងវិធានការទប់ស្កាត់ការនាំចូលផលិតផលកសិកម្មចូលពីបរទេស ដោយបង្កើនផលិតផល ក្នុងស្រុកឲ្យបានល្អប្រសើរឡើងវិញ ដោយជាការកត់សម្គាល់ឃើញថា ការចិញ្ចឹមជ្រូកក្នុងស្រុក បានកើនឡើង១០ភាគរយ បន្ទាប់ពីកាត់បន្ថយការនាំចូល ។
លោក តាន់ ផាន់ណារ៉ា បានព្រមានដល់ក្រុមឈ្មួញ ត្រូវបញ្ឈប់ការលួចនាំចូលពីក្រៅប្រទេសជាបន្ទាន់ និងអំពាវនាវដល់ប្រជាពលរដ្ឋ ឲ្យជួយរាយការណ៍ដល់សមត្ថកិច្ច ក្នុងករណីសង្ស័យឃើញមានការលួចលាក់នាំចូលដោយខុសច្បាប់ សំដៅទប់ស្កាត់នូវជំងឺសត្វជ្រូកនេះ ៕
ចែករំលែកព័តមាននេះ