សារព័ត៌មានបរទេស កាលពីថ្ងៃទី១០ វិច្ឆិកា ២០១៥ ផ្សាយថា លោកឧត្តមសេនីយ៍ ប៊ូឌី វ៉ាសេសូ មេបញ្ជាការប៉ូលិសផ្នែកបង្ក្រាបគ្រឿងញៀន ត្រៀមស្នើសារលិខិតទៅក្រសួងយុត្តិធម៌ទាក់ទិននឹងការសាងសង់ពន្ធនាគារនៅលើកោះដ៏ឆ្ងាយមួយសម្រាប់ឃុំខ្លួនអ្នកទោសប្រហារជីវិត លើរឿងក្តីគ្រឿងញៀនដោយមានកងការពារជាហ្វូងក្រពើដ៏កាចសាហាវ ។
លោកឧត្តមសេនីយ៍ និងក្រុមការងារមានគម្រោងធ្វើដំណើរនៅទូទាំងប្រទេសដើម្បីស្វែងរកក្រពើដើម្បីបំពេញតួនាទីជាឆ្មាំគុក ព្រោះក្រពើជាសត្វដែលមិនអាចស៊ីសំណូកបាន ។ ទោះជាយ៉ាងណាក៏ដោយ លោកឧត្តមសេនីយ៍វ៉ាសេសូ បញ្ជាក់ថា គម្រោងការនេះគឺជាដំណាក់កាលចាប់ផ្តើមដំបូងដោយមិនទាន់កំណត់ទីតាំងក្នុងការសាងសង់ និងរយៈពេលនៃការដំណើរការជាផ្លូវការនៅឡើយ ព្រោះត្រូវសិក្សាលើផលល្អ និងអាក្រក់ឱ្យបានលម្អិត រួមទាំងរង់ចាំទទួល ចម្លើយនៃការពិចារណារបស់ពីរដ្ឋាភិបាលជាមុនសិន ។
ឥណ្ឌូណេស៊ីជាប្រទេសមួយដែលមានច្បាប់ដាក់ទោសលើអ្នកពាក់ព័ន្ធនឹងគ្រឿងញៀនធ្ងន់បំផុតនៅលើពិភពលោក ដោយកាត់ទោសប្រហារជីវិតដោយបាញ់ស៊ីប ។ នៅក្នុងខែមេសា កន្លងមក ឥណ្ឌូណេស៊ីបានប្រហារជីវិតអ្នកទោសបរទេសក្នុងរឿងក្តីគ្រឿងញៀនចំនួន៧នាក់មកហើយ ។ ការដាក់ទោសបែបនោះបានទទួលប្រតិកម្មពីបរទេសយ៉ាងខ្លាំង ប៉ុន្តែលោកប្រធានាធិបតីចូកូ វីដូដូ បញ្ជាក់ថា ការដាក់ទោសសម្រាប់អ្នកជួញដូរគ្រឿងញៀន គឺត្រូវប្រហារជីវិត និងការបង្ក្រាបគ្រឿងញៀន គឺជាផ្នែកមួយក្នុងរបៀបវារៈដ៏បន្ទាន់នៅក្នុងប្រទេស ៕
ចែករំលែកព័តមាននេះ