ផ្តល់មេជីវិតដើម្បីបានលុយទិញ iPhone
កាសែត China Daily របស់ចិន បានឱ្យដឹងថា បុរសចិនជាច្រើននាក់ ត្រូវធនាគារមេជីវិតនៅសៀងហៃ និងធនាគារមេជីវិត នៅក្រុងវូហាន ខេត្តហ៊ូប៉ី ទាក់ទាញឱ្យផ្តល់ទឹក
ផ្តល់មេជីវិតដើម្បីបានលុយទិញ iPhone
កាសែត China Daily របស់ចិន បានឱ្យដឹងថា បុរសចិនជាច្រើននាក់ ត្រូវធនាគារមេជីវិតនៅសៀងហៃ និងធនាគារមេជីវិត នៅក្រុងវូហាន ខេត្តហ៊ូប៉ី ទាក់ទាញឱ្យផ្តល់ទឹកស្ពែម របស់ខ្លួន ដើម្បីមានប្រាក់ទិញទូរស័ព្ទ iPhone 6 ។ គេត្រូវការអ្នកផ្តល់មេជីវិត ដែលមានអាយុចាប់ពី២២ ដល់៤៥ឆ្នាំ ។ ថ្លៃមេជីវិតគឺ៥ពាន់យ័ន ប្រហាក់ប្រហែល៧៨៥ដុល្លារអាមេរិក សម្រាប់ទឹកស្ពែម៤០មីល្លីម៉ែត្រ ។ ខ្លឹមសារលើវែបសាយនោះសរសេរថា «មិត្តមិនបាច់លក់ក្រលៀន ទើបមានទូរស័ព្ទ iPhone 6 ប្រើទេ ! គ្រាន់តែផ្តល់មេជីវិត ក៏មានប្រាក់គ្រប់គ្រាន់ក្នុងការបំពេញបំណងខ្លួនបានដែរ» ។
ទូរស័ព្ទ iPhone 6 ជាទូរស័ព្ទពេញនិយមបំផុតនៅប្រទេសចិន ។ ពេលនេះចិនកំពុងប្រែ ខ្លួនជាទីផ្សារធំជាងគេបង្អស់របស់ក្រុមហ៊ុន Apple ដោយទូរស័ព្ទ iPhone ជំនាន់ថ្មី លក់ដាច់ជាងនៅអាមេរិកទៅទៀត ។ តាមរបាយការណ៍របស់ក្រុមហ៊ុន Apple កាលពីខែសីហា ២០១៥ ទូរស័ព្ទ iPhone 6 លក់ក្នុងប្រទេសចិន មានសន្ទុះកើនឡើងរាល់ថ្ងៃ ។ គ្រាន់តែខែសីហា តែមួយខែ លក់បាន១៦,៨លានដុល្លារ គឺកើន៧១% ។
លក់កូនយកលុយទិញទូរស័ព្ទ iPhone
ឆ្នាំ ២០១៣ ប្តីប្រពន្ធមួយគូនៅក្រុងសៀងហៃ ប្រទេសចិន ត្រូវចាប់ខ្លួនពីបទជួញដូរមនុស្ស បន្ទាប់ពីពួកគេលក់កូនស្រីទី៣ របស់ខ្លួន យកប្រាក់ទិញទូរស័ព្ទ iPhone ។ ប៉ូលិសបានឱ្យដឹងថា ក្រោយពេលលក់កូនស្រីទី៣ហើយ ស្ត្រីជាម្តាយប្រញាប់ប្រញាល់យកប្រាក់ទៅទិញទូរស័ព្ទ iPhone មួយគ្រឿង, ស្បែកជើងកីឡាមួយគូ និងរបស់កំប៉ិកកំប៉ុកផ្សេងៗទៀត ។ នៅចំពោះមុខតុលាការ ប្តីប្រពន្ធមួយគូនេះដោះសាថា ខ្លួនមិនមែនលក់កូនទេ គឺចង់ឱ្យពួកគេមានអនាគតល្អ ទើបប្រគល់កូនឱ្យអ្នកមានប្រាក់ច្រើន យកទៅចិញ្ចឹមធ្វើជាកូនបង្កើត ព្រោះខ្លួនមានកូនដល់ទៅ៣នាក់ គ្មានលទ្ធភាពចិញ្ចឹមឱ្យរៀនសូត្របានខ្ពង់ខ្ពស់ទេ ។
ទាមទារជំនូនជាទូរស័ព្ទ iPhone
ខែកញ្ញា ឆ្នាំទៅ បុរសអារ៉ាប់ម្នាក់ប្រាប់គូដណ្តឹងរបស់ប្អូនស្រីខ្លួនថា ខ្លួនត្រូវការជំនូនជាទូរស័ព្ទ iPhone, បើមិនបានទេ អត់ឱ្យរៀបការជាមួយប្អូនស្រីខ្លួន ។ ប្អូនស្រីរបស់បុរសនោះ ដែលមិនពេញចិត្តអំពើរបស់បងប្រុស បានដកដង្ហើមវែង និយាយប្រាប់កាសែត Kuwaiti Daily ថា «បងប្រុសខ្ញុំហ៊ានប្រឆាំងនឹងបំណងឪពុកខ្ញុំ ។ កាលមិនទាន់អស់ជីវិត ឪពុកខ្ញុំចង់បានជំនូនជាប្រាក់បន្តិចបន្តួចប៉ុណ្ណោះ ហើយពិធីរៀបការ ក៏ធ្វើយ៉ាងសាមញ្ញដែរ ព្រោះយើងក្រទាំងសងខាង ។ ឥឡូវឪពុកខ្ញុំអនិច្ចកម្មមុនពេលខ្ញុំរៀបការស្រាប់តែបងប្រុសខ្ញុំ បានដៃទារជំនូនជាទូរស័ព្ទ iPhone ទៅវិញ ធ្វើឱ្យពិធីរៀបការត្រូវពន្យារពេលមួយរយៈ ព្រោះត្រូវរង់ចាំ iPhone មកដល់» ។
ជិះយន្តហោះពីអាមេរិកមកប្រទេសអូស្ត្រាលី ដើម្បីបានធ្វើជាម្ចាស់ទូរស័ព្ទ iPhone ជំនាន់ថ្មីមុនគេ
ក្រោយ កុម្ម៉ង់ទិញតាមអុីនធើរណេតរួច លោក David Rahimi និងមិត្តស្រី Jasmine Juan ប្រញាប់ប្រញាល់ឡើងជិះយន្តហោះពេញ១៤ម៉ោងទៅកាន់ទីក្រុងសុីដនី ដើម្បីមានឱកាសក្លាយជាអ្នកមានទូរស័ព្ទដៃ iPhone ជំនាន់ថ្មី ទើបតែចេញមុនគេលើលោក ។ David Rahimi និយាយយ៉ាងសប្បាយរីករាយ បន្ទាប់ពីបំណងរបស់ខ្លួនបានសម្រេច ៖ «ពាក់កណ្តាលអធ្រាត្រថ្ងៃសុក្រ គិតតាមម៉ោងនៅកាលីហ្វ័រនីញ៉ា ពួកខ្ញុំកុម្ម៉ង់ទិញ iPhone ជំនាន់ថ្មីបំផុត ហើយនាំគ្នាឡើងជិះយន្តហោះភ្លាម ។ ព្រឹកឡើង ពួកខ្ញុំមានមុខនៅមាត់ទ្វារក្រុមហ៊ុន Apple នៅប្រទេសអូស្ត្រាលី មុនគេឯទៀត ហើយក៏បានទទួលទូរស័ព្ទ iPhone ជំនាន់ថ្មីមុនគេ ។ ពួកខ្ញុំពិតជាសប្បាយចិត្តមែនទែន» ។
សិស្សអាល្លឺម៉ង់ម្នាក់បូមទឹកស្រះដើម្បីរកទូរស័ព្ទ iPhone
ខែកក្កដា ឆ្នាំ២០១៤សិស្សសាលាឯកជនអាល្លឺម៉ង់ម្នាក់ អាយុ១៦ឆ្នាំ ពេលដើរកម្សាន្តជាមួយមិត្តភក្តិ ស្រាប់តែរបូតដៃធ្លាក់ iPhone ចូលស្រះទឹកធំមួយ ។ ដោយស្រឡាញ់ទូរស័ព្ទពេក សិស្សរូបនោះប្រុងរកឧបករណ៍មុជទឹកដើម្បីចុះរកបាតស្រះ តែត្រូវក្រុមសាស្ត្រាចារ្យប្រចាំសាលាហាមឃាត់ ខ្លាចមានគ្រោះថ្នាក់ដល់ជីវិត ។ មិនអស់ចិត្ត សិស្សនេះបន្តធ្វើសកម្មភាពទៀត ដោយរកបានម៉ាសុីនបូមទឹក ធុនមធ្យមមួយគ្រឿង និងទុយោពីរខ្សែ ចាប់ផ្តើមបូមទឹកស្រះទាំងយប់ ។ ប៉ុន្តែរូបគេមិនដឹងទាល់តែសោះថា កន្លែងដែលខ្លួនដាក់ចុងទុយោ ក្បែរបង្គន់មួយនោះ អត់មានប្រព័ន្ធបង្ហូរទឹកចេញទៅរកលូឯណាទេ ។ ហេតុនេះជាលទ្ធផលគឺធ្វើឱ្យទឹកហៀរហូរលិចលង់ទីធ្លាចតរថយន្តមួយ ផ្អើលអ្នកស្រុក ហើយគេប្តឹងប៉ូលិសទាំងយប់ ។ ទីបំផុតសិស្សម្នាក់នោះ ត្រូវបង្ខំឱ្យសងប្រាក់ដើម្បីជួសជុលបង្គន់ និងទីធ្លាចតរថយន្ត ព្រមទាំងបូមទឹកត្រឡប់ទៅស្រះវិញទៀត ៕
ចែករំលែកព័តមាននេះ