ខេត្តព្រៃវែង ៖ គិតត្រឹមថ្ងៃទី៣០ និង៣១ ខែឧសភា ឆ្នាំ២០២១ រយៈពេលត្រឹមតែ២ថ្ងៃនេះប៉ុណ្ណោះ ខេត្តព្រៃវែង បានរកឃើញអ្នកឆ្លងជំងឺកូវីដ១៩ថ្មី រហូតដល់ទៅ៨៩នាក់ ដែលជាករណីឆ្លងសហគមន៍២០កុម្ភៈ និងជាអ្នកមកពីបណ្តារាជធានីខេត្ត និងមួយចំនួនទៀតដែលជាពលករចំណាកស្រុក ទើបត្រឡប់មកមកពីក្រៅប្រទេស។
អ្វីដែលគួរអោយកត់សម្គាល់នោះ គឺក្រោយពីរកឃើញមានអ្នកឆ្លងថ្មីជាច្រើន និងតាមរយៈការចុះស្រាវជ្រាវរកអ្នកពាក់ព័ន្ធដោយផ្ទាល់ និងប្រយោល អាជ្ញាធរបានឈានទៅដល់ការបិទទីតាំងមួយចំនួនផងដែរ ក្នុងនោះគឺបិទភូមិចំនួន២ បិទគ្លីនិកឯកជនចំនួន២ និងបិទផ្សារមួយកន្លែងផងដែរ។
យោងតាមរបាយការណ៍របស់រដ្ឋបាលខេត្តព្រៃវែង ប្រជាពលរដ្ឋទាំង៨៩នាក់ ដែលត្រូវបានរកឃើញថា បានឆ្លងជំងឺកូវីដ១៩ តាមរយៈការធ្វើតេស្តរហ័សនោះ មាននៅក្នុងស្រុកក្រុងមួយចំនួនរួមមាន ៖ ស្រុកបាភ្នំចំនួន១៨នាក់ ស្វាយអន្ទរ២នាក់ ពារាំង២នាក់ ពាមជរ៧នាក់ កញ្ជ្រៀច១នាក់ ព្រះស្តេច២៩នាក់ ក្រុងព្រៃវែង១៩នាក់ មេសាង៨នាក់ និងកំពង់ត្របែក៣នាក់។
ដោយឡែកទីតាំងមួយចំនួនទៀត ដែលរកឃើញថា មានពាក់ព័ន្ធជាមួយអ្នកវិជ្ជមានជំងឺកូវីដ១៩ ក៏ត្រូវបានមន្ត្រីជំនាញ និងអាជ្ញាធរមូលដ្ឋាន សម្រេចចុះបិទជាបណ្តោះអាសន្នផងដែរ ដែលក្នុងនោះរួមមាន ៖
ទី១-ផ្សារក្រុងព្រៃវែង បិទនៅថ្ងៃទី៣០ ឧសភា បន្ទាប់ពីរកឃើញបុរសម្នាក់ជាជាងមាសនៅក្នុងផ្សារនេះ ហើយមានលទ្ធផលតេស្តវិជ្ជមានជំងឺកូវីដ១៩។
ទី២- មន្ទីរសម្រាកព្យាបាល និងសម្ភព ខៀង សុគន្ធា នៅស្រុកស្វាយអន្ទរ បិទនៅថ្ងៃទី៣០ ឧសភា បន្ទាប់ពីរកឃើញមានអ្នកជំងឺកូវីដ១៩ម្នាក់ បានចូលទៅពិគ្រោះជំងឺនៅទីនោះ។
ទី៣- មន្ទីរសម្រាកព្យាបាល និងសម្ភព ឌីម ផល្លីន នៅស្រុកពារាំង ត្រូវបានបិទនៅថ្ងៃទី៣១ ឧសភា បន្ទាប់ពីរកឃើញថា មានអ្នកជំងឺកូវីដ១៩ម្នាក់ បានទៅដេកសម្រាកព្យាបាលនៅទីនោះចំនួន៣ថ្ងៃ បន្ទាប់មកក៏ស្លា.ប់បាត់បង់ជីវិតពេលបញ្ជូនទៅដល់ភ្នំពេញ។
និងទី៤- បិទភូមិចំនួន២ គឺភូមិឩត្តម និងភូមិឩត្តុង ដែលស្ថិតក្នុងឃុំព្រែកក្របៅ ស្រុកពាមជរ កាលពីថ្ងៃទី៣១ ឧសភា ដោយសារភូមិនេះ បានរកឃើញមានប្រជាពលរដ្ឋ៥នាក់ បានឆ្លងជំងឺកូវីដ១៩។
គួរបញ្ជាក់ផងដែរថា គិតមកដល់ត្រឹមថ្ងៃទី៣១ ឧសភានេះ ខេត្តព្រៃវែង មានអ្នកឆ្លងជំងឺកូវីដ១៩ សរុប ៤៥៩នាក់ ព្យាបាលជាសះស្បើយ១៩៦នាក់ កំពុងសំរាកព្យាបាល២៥៨នាក់ និងស្លា.ប់៥នាក់៕
ចែករំលែកព័តមាននេះ