សារព័ត៌មានបរទេសកាលពីពេល ថ្មីៗកន្លងមកផ្សាយថា តុលាការកំពូលក្នុងក្រុងឡុងដ៍ បានសម្រេចកាលពីថ្ងៃទី៣ វិច្ឆិកា ២០១៥ ឱ្យលោកស្រីចាណាន ហាប អាយុ៦៨ឆ្នាំ ជនជាតិអង់គ្លេស ដើមកំណើតប៉ាឡេស្ទីន ដែលជាស្នំលួចលាក់របស់ព្រះមហាក្សត្រហ្វាហាដ ប្រទេសអារា៉ប៊ី សាអូ៊ឌីត ដែលសោយទិវង្គតទៅហើយ មានសិទ្ធិទទួលប្រាក់ជាង១៥លានផោន រួមទាំងអគារចំនួន២ខ្នង នៅខណ្ឌឆេលស៊ី ក្រុងឡុងដ៍ ។ ការទទួលទ្រព្យទាំងនោះពីព្រះបុត្រារបស់ព្រះមហាក្សត្រហ្វាហាដ ។
លោកចៅក្រមពីទ័រ ស្មីត និយាយថា ព្រះអង្គម្ចាស់អាប់ឌុល អាស៊ី ប៊ីនហ្វាហាដ ជាព្រះរាជបុត្ររបស់ព្រះមហាក្សត្រហ្វាហាដ បានព្រមព្រៀងជាមួយលោកស្រីហាប ដោយរក្សាទុកកិច្ចសន្យាដែលព្រះបិតាទ្រង់សន្យាថា ព្រះអង្គថែរក្សាលោកស្រីរហូតអស់មួយជីវិត ហើយប្រសិនបើព្រះរាជបុត្រា ជំទាស់លើការសម្រេចអាចប្តឹងទៅឧទ្ធរណ៍បាន។
ព្រះរាជបុត្រាត្រូវបង់ប្រាក់ និងទ្រព្យសម្បត្តិទៅតាមសេចក្តីសម្រេចរបស់តុលាការក្នុងរយៈពេល២៨ថ្ងៃ ។
លោកស្រីចាណាន ហាប ចាប់កំណើតនៅក្នុងក្រុមគ្រួសារជនជាតិបា៉ឡេស្ទីន កាន់សាសនាគ្រឹស្ត បច្ចុប្បន្នមានសញ្ជាតិអង់គ្លេស ។ លោកស្រីហាប បញ្ជាក់ថា បានលួចរៀបអភិសេកយា៉ងស្ងប់ស្ងាត់ជាមួយព្រះមហាក្សត្រហ្វាហាដ នៅខែមីនា ១៩៦៤ ខណៈគាត់មានអាយុ១៩ឆ្នាំ និងព្រះអង្គនៅជារដ្ឋមន្ត្រីក្រសួងមហាផ្ទៃ ។
ក្នុងអំឡុងពេលបើកសវនាការលើរឿងក្តីអស់រយៈពេល៧ថ្ងៃ នៅក្នុងខែកក្កដា ២០១៥ លោកស្រីហាប ឱ្យដឹងថា ព្រះអង្គហ្វាហាដ បិទបាំងពីសម្ព័ន្ធភាពជាមួយលោកស្រី ព្រោះទទួលការប្រឆាំងពីរាជវង្ស និងបារម្ភខ្លាចកើតមានប្រតិកម្មជាអវិជ្ជមានពីប្រជារាស្ត្រ ។
លោកស្រីហាប ឱ្យដឹងទៀតថា ព្រះអង្គហ្វាហាដ ដែលឡើងគ្រងរាជ្យជាព្រះមហាក្សត្រ នៅឆ្នាំ១៩៨២ និងសោយទិវង្គតនៅឆ្នាំ២០០៥ បានសន្យាជាមួយគាត់ថា នឹងផ្តល់ជំនួយផ្នែកហិរញ្ញវត្ថុរហូតអស់មួយជីវិត ។ ក្រោយពីតុលាការសម្រេចសាលក្រមរួចលោកស្រីហាប និយាយថា «ក្នុងរយៈពេល១២ឆ្នាំ នៃទុក្ខសោករបស់ ខ្ញុំៗមានសេចក្តីសុខបំផុតទៅលើភាពយុត្តិធម៌របស់អង់គ្លេស» ៕
ចែករំលែកព័តមាននេះ