ខេត្តព្រៃវែង ៖ ច្រកទ្វាព្រំដែនម៉ឺនជ័យ ដែលពីមុនគ្រោងបើកជាច្រកទ្វាអន្តរជាតិ តែក្រោយមកត្រូវខកខានទៅវិញដោយសារវិបត្តិកូវីដ១៩នោះ ពេលនេះត្រូវបានអាជ្ញាធរខេត្តព្រៃវែងធ្វើពិធីប្រកាសបើកអោយដំណើរការជាបណ្តោះអាសន្នហើយ នៅត្រឹមកម្រិតថ្នាក់ខេត្ត ដើម្បីបង្កលក្ខណៈងាយស្រួលដល់ការដោះដូរទំនិញរវាងប្រទេសកម្ពុជា និងវៀតណាម ។
ការប្រកាសបើកអោយដំណើរការច្រកទ្វារព្រំដែនម៉ឺនជ័យនេះបានធ្វើឡើង កាលពីព្រឹកថ្ងៃទី៣១ ឧសភានេះ ក្រោមអធិបតីភាពឯកឧត្តម ជា សុមេធី អភិបាលខេត្តព្រៃវែង និងមានការចូលរួមពីមន្ត្រីជំនាញពាក់ពន្ធ័ជាច្រើននាក់ផងដែរ ។
ច្រកទ្វារព្រំដែនម៉ឺនជ័យ មានទីតាំងស្ថិតនៅក្នុងភូមិត្បូងវត្ត ឃុំក្របៅ ស្រុកកំចាយមារ ខេត្តព្រៃវែង ចំណែកខាងវៀតណាម ច្រកដែលនៅទល់មុខគ្នា គឺច្រកតិនណាម ក្នុងខេត្តតៃនិញ ប្រទេសវៀតណាម ។
យោងតាមរបាយការណ៌របស់លោកប្រធានស្នាក់ការ ច្រកទ្វាព្រំដែនម៉ឺនជ័យនេះ បានអោយដឹងថា ច្រកទ្វាម៉ឺនជ័យ មានអគារសម្រាប់មន្ត្រីជំនាញបំពេញភារៈកិច្ចរបស់ខ្លួន ចំនួន៣អគារ អគារស្នាក់នៅចំនួន៣អគារ និងមានមន្ត្រីបំរើការទាំងអស់សរុបចំនួន៤៦នាក់ ។
ថ្លែងនៅក្នុងពិធីប្រកាសបើកអោយដំណើរការច្រកទ្វាព្រំដែនម៉ឺនជ័យនេះ ឯកឧត្តម ជា សុមេធី អភិបាលខេត្តបានលើកឡើងថា ទីតាំងភូមិសាស្ត្រតំបន់ច្រកទ្វាព្រំដែនម៉ឺនជ័យនេះកាលពីមុនគឺសុទ្ធតែព្រៃ ហើយពិបាកផ្លូវធ្វើដំណើរណាស់ ប៉ុន្តែបច្ចុប្បន្នបំបន់នេះ បានប្រែមុខមាត់ថ្មីហើយ ក្រោមការជួយជ្រុំជ្រែងយ៉ាងខ្លាំងពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ហើយទៅថ្ងៃមុខច្រកមួយនេះអាច និងក្លាយទៅជាច្រកទ្វាអន្តរជាតិថែមទៀតផង ដូច្នេះឆ្លៀតឪកាសនេះឯកឧត្តម សូមផ្តាំផ្ញើដល់មន្ត្រីជំនាញទាំងអស់ ដែលប្រចាំការនៅមាត់ច្រកនេះ ធ្វើយ៉ាងណាត្រូវខិតខំបំពេញតួនាទីភារៈកិច្ចរបស់ខ្លួនអោយបានល្អ ជាពិសេសត្រូវសហការជាមួយភាគីខាងវៀតណាម ក្នុងការទប់ស្កាត់ និងបង្ក្រាបបទល្មើសឆ្លងដែនផ្សេងៗ រួមទាំងការងារទប់ស្កាត់ការឆ្លងរាលដាលនៃជម្ងឺកូវីដ១៩ផងដែរ ៕
ចែករំលែកព័តមាននេះ