ខេត្តបាត់ដំបង ៖ លោក សឿម ប៊ុនរិទ្ធ អ្នកនាំពាក្យរដ្ឋបាលខេត្ត និងជាអភិបាលរងខេត្តបាត់ដំបងបានឱ្យដឹងថា មន្ត្រីជំនាញបរិស្ថានបានបញ្ជូនសំណាកទឹកកខ្វក់ទៅពិនិត្យនៅឡាបូរាជធានីភ្នំពេញកាលពីល្ងាចថ្ងៃទី២៧ ឧសភា ដើម្បីពិនិត្យកម្រិតជាតិពុល…
ខេត្តបាត់ដំបង ៖ លោក សឿម ប៊ុនរិទ្ធ អ្នកនាំពាក្យរដ្ឋបាលខេត្ត និងជាអភិបាលរងខេត្តបាត់ដំបងបានឱ្យដឹងថា មន្ត្រីជំនាញបរិស្ថានបានបញ្ជូនសំណាកទឹកកខ្វក់ទៅពិនិត្យនៅឡាបូរាជធានីភ្នំពេញកាលពីល្ងាចថ្ងៃទី២៧ ឧសភា ដើម្បីពិនិត្យកម្រិតជាតិពុល ។ លោកបន្ថែមថា អាជ្ញាធរ និងមន្ត្រីពាក់ព័ន្ធកំពុងតាមដានយ៉ាងយកចិត្តទុកដាក់ ចំពោះករណីទឹកកខ្វក់ហូរចេញពីក្រុមហ៊ុន បង្កឱ្យពុលត្រីងាប់ក្នុងស្ទឹងប៉ែកខាងលើ ក្នុងនោះ មានមន្ត្រីពីរក្រុម គឺមន្ត្រីបរិស្ថាន សហការជាមួយអាជ្ញាធរមូលដ្ឋានចុះទៅទីតាំងក្រុមហ៊ុនចិន ដែលមានធ្លាយទឹកកខ្វក់ចូលស្ទឹង និងមួយក្រុមទៀត គឺមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តបាត់ដំបង និងអង្គភាពរដ្ឋាករទឹកបាត់ដំបង ទៅពិនិត្យវាយតម្លៃទឹកប៉ែកខាងលើ ។ សូមរំលឹកថា៖ ត្រីធំត្រីតូចពុលទឹកងាប់ពេញតំបន់រមណីយដ្ឋាន«ស្ទឹងថ្វាក»
លោកកត បុរាណ ប្រធានមន្ទីរបរិស្ថានខេត្តបាត់ដំបងបានឱ្យដឹងថា លទ្ធផលទឹកកខ្វក់ដែលបញ្ជូនទៅភ្នំពេញនឹងចេញលទ្ធផលនៅរសៀលថ្ងៃទី២៨ ឧសភា ទើបអាចដឹងថាវាមានទំហំផលប៉ះពាល់កម្រិតណា យើងនឹងមានវិធានការភ្លាមៗ ។ តាមការវាយតម្លៃបឋម គឺត្រីងាប់ក្នុងស្ទឹង គឺបណ្តាលមកពីខ្វះអុកស៊ីហ្សែន ។ លោកប្រធានមន្ទីរបរិស្ថានបានបញ្ជាក់ថា សំណាកទឹកដែលយកទៅពិនិត្យនោះ គឺយកសំណាកដើមទី១ និងចុងចម្ងាយ១០គីឡូពីកន្លែងធ្លាយទឹកកខ្វក់ ។ ឯទីតាំងដែលលេចធ្លាយនោះ បានយកគ្រឿងចក្រកាយបង្ហាប់ដី ដើម្បីទប់មិនឱ្យជ្រាបមកបន្ថែមទៀតរួចរាល់ហើយ ។
សូមបញ្ជាក់ថា រោងចក្រចិនមួយកន្លែងនៅភូមិទំនប់ទឹកសាប ឃុំជីប៉ាង ស្រុករតនមណ្ឌល ខេត្តបាត់ដំបង ស្ថិតនៅខ្សែទឹកខាងលើ បានធ្លាយអាងស្តុកកាកសំណល់រាវឧស្សាហកម្មហូរចេញពីរោងចក្រ ចូលទៅក្នុងខ្សែទឹកស្ទឹងសង្កែប៉ែកខាងលើ បង្កឱ្យមានត្រីងាប់ ជាច្រើន ដែលបង្កឱ្យមានការភ្ញាក់ផ្អើលនិងព្រួយបារម្ភពីសុខភាព ពលរដ្ឋដែលប្រើប្រាស់ ទឹកតាមដងស្ទឹងសង្កែ។ នេះជាលើកទីពីរហើយ ដែលទឹកកខ្វក់បានហូរ ធ្លាយពីក្រុមហ៊ុនចិននេះចូលស្ទឹង។
លោក អ៊ុត ខ្លឹង ប្រធានរដ្ឋាករទឹកខេត្តបាត់ដំបងបានចេញសេចក្តីជូនដំណឹងភ្លាមៗផងដែរថា ដើម្បីដោះស្រាយបញ្ហាប្រឈម នៃការបំពុលប្រភពទឹកខាងលើ ឯកឧត្តម អភិបាលខេត្តបាត់ដំបង បានអន្តរាគមន៍ទៅមន្ទីរធនធានទឹក និងឧតុនិយមខេត្ត ឱ្យមានការទប់ស្កាត់ និងបិទទ្វារទឹកដើម្បីទប់ស្កាត់ហានិភ័យដល់ការងារផលិតកម្មអង្គភាពរដ្ឋាករទឹកបាត់ដំបង និងតាមបណ្តាក្រុមហ៊ុនអាជីវករទឹកស្អាតនានា ដែលនៅខ្សែទឹកខាងក្រោម។
ដោយឡែក នៅឯអង្គភាពរដ្ឋាករទឹកបាត់ដំបងវិញ បានចាត់តាំងក្រុមអ្នកបច្ចេកទេសផ្នែកត្រួតពិនិត្យគុណភាព ទឹកឱ្យនៅប្រចាំការតាមដានត្រួតពិនិត្យគុណភាពទឹកជាប្រចាំគិតត្រឹមម៉ោងនេះ ស្ថានភាពគុណភាពទឹកមិនមាន ការប្រែប្រួលខុសពីប្រក្រតីឡើយ គឺអនុលោមតាមស្តង់ដារគុណភាពទឹកអង្គភាពនៅឡើយ។ ដោយ៖ ហួត សុងហាក់
សូមរំលឹកទៀតថា៖ ជាតិពុលហៀរចេញពីកន្លែងអាងស្តុកទឹកពណ៌លឿងនៃរោងចក្រចិននេះពិតប្រាកដមែន
ចែករំលែកព័តមាននេះ