ខេត្តកណ្តាល៖ គ្រោះបាក់ច្រាំងទន្លេមេគង្គក្រោម បានកើតឡើង កាលពីម៉ោងប្រហែល ២រសៀល ថ្ងៃទី២៣ ខែឧសភា ឆ្នាំ២០២១ នៅចំណុចភូមិព្រែកដាច់ ឃុំព្រែកដាច់…
ខេត្តកណ្តាល៖ គ្រោះបាក់ច្រាំងទន្លេមេគង្គក្រោម បានកើតឡើង កាលពីម៉ោងប្រហែល ២រសៀល ថ្ងៃទី២៣ ខែឧសភា ឆ្នាំ២០២១ នៅចំណុចភូមិព្រែកដាច់ ឃុំព្រែកដាច់ ស្រុកលើកដែក ខេត្តកណ្តាល បណ្តាលអោយផ្ទះប្រជាពលរដ្ឋខ្មែរ និងវៀតណាមមួយចំនួន បានបាក់ស្រុតធ្លាក់ចូល ទៅក្នុងទឹកទន្លេ និងជាច្រើនខ្នងទៀត កំពុងបង្ខំចិត្ត រុះរើបណ្តើរៗ។
ប្រជាពលរដ្ឋរងគ្រោះ ដោយការបាក់ស្រុតច្រាំងទន្លេ ទាំងខ្មែរ និងវៀតណាម បានរៀបរាប់ប្រាប់អ្នកសារព័ត៌មាន ទាំងអួលដើមក កាលពីរសៀលថ្ងៃទី២៤ ខែឧសភាថា ពួកគាត់ រស់នៅតំបន់ជួរមាត់ទន្លេនេះ តាំងពីឆ្នាំ១៩៨០ជាង ដោយមានក្បាលដីមួយឡូត៍ៗ ប្រហាក់ប្រហែលគ្នា។ ប៉ុន្តែកាលពីជាង ២០ឆ្នាំមុន បានរងគ្រោះ ដោយការបាក់ច្រាំងទន្លេម្តងហើយ។ នៅសល់បណ្តោយដីខ្លះ ជាង ៣០ម៉ែត្រ ខ្លះជាង ២០ម៉ែត្រ សម្រាប់សង់ផ្ទះស្នាក់នៅ មកដល់បច្ចុប្បន្ននេះ។ ស្រាប់តែឥឡូវ ត្រូវបានបាក់ស្រុត ចូលទៅក្នុងទឹកទន្លេអស់ទាំងស្រុង មិនមានយកអ្វីបាននោះទេ ហើយការបាក់នេះ គឺជាគ្រោះធម្មជាតិ មិនមានទូកបូមខ្សាច់ឡើយ។
ពលរដ្ឋបញ្ជាក់បន្ថែមថា គ្រោះបាក់ច្រាំងទន្លេម្តងនេះ ខុសពីមុន ដោយពីមុនបាក់បន្តិចៗ តែសានេះ ប្រេះកាត់ពីផ្លូវកាំជណ្តើរមុខផ្ទះ ស្រុតយកតែម្តង។ នេះសំណាងហើយ ដែលបាក់ពេលថ្ងៃ ដឹងមុន នាំប្រពន្ធកូនចៅ រត់ចេញទាន់ពេល ទើបមិនមានគ្រោះថ្នាក់មនុស្ស។ តែបើស្រុតពេលយប់វិញ ប្រាកដជាមានមនុស្សគ្រោះថ្នាក់ជាក់ជាមិនខានឡើយ។
ទន្ទឹមនោះ ពលរដ្ឋរងគ្រោះ សូមសំណូមពរយ៉ាងទទូចដល់អាជ្ញាធរគ្រប់លំដាប់ថ្នាក់ ជាពិសេសសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ប្រធានកាកបាទក្រហមកម្ពុជា មេត្តាជួយដល់ពួកគាត់ផង ព្រោះទាំងដីផ្ទះ សម្ភារៈសម្លៀកបំពាក់ ចានឆ្នាំង បាត់បង់ចូលទៅក្នុងទឹកទន្លេអស់ហើយ គ្មានអ្វីទីពឹងទៀតទេ។
ពាក់ព័ន្ធបញ្ហានេះ លោក ខ្មៅ រ៉ន មេឃុំព្រែកដាច់ បានអោយដឹងថា ផ្ទះពលរដ្ឋរងគ្រោះ សរុប ២៥គ្រួសារ។ ក្នុងនោះ បាក់ចូលទៅក្នុងទឹកទន្លេ ៥គ្រួសារ និង២០គ្រួសារទៀត កំពុងរុះរើបណ្តើរ។ អាជ្ញាធរឃុំ ស្រុក បានចុះទៅពិនិត្យណែនាំអោយពួកគាត់ មានការប្រុងប្រយ័ត្ន និងបានធ្វើរបាយការណ៍ជូនទៅខេត្ត និងកាកបាទក្រហមខេត្ត កំពុងរៀបចំយកអំណោយសង្គ្រោះបន្ទាន់ ត្រៀមចែកជូនដល់ពួកគាត់។ ចំពោះរឿងរកដី អោយពួកគាត់ស្នាក់នៅ គឺឃុំមិនមានលទ្ធភាពទេ៕
ចែករំលែកព័តមាននេះ