ខេត្តបន្ទាយមានជ័យ៖ ក្មួយស្រី អ៊ីណា បានរងគ្រោះ ដោយកើតជំងឺពកឆ្អឹងខ្នង រហូតប្រទាញឆ្អឹងជំនី បាត់អស់ម្ខាង។ ជំងឺពកឆ្អឹងខ្នងនេះ នាងកើតតាំងពីអាយុ ៦ឆ្នាំ មកទល់នឹងបច្ចុប្បន្ន រយៈពេល ៦ឆ្នាំមកហើយ។
នៅពេលអ្នកយកព័ត៌មានយើង បានទៅជួប នៅព្រឹកថ្ងៃទី២៤ ខែឧសភា ឆ្នាំ២០២១ ប្អូនស្រីឈ្មោះ ជួប សៀវ រស់នៅភូមិទេពកោសា ឃុំរហាល ស្រុកព្រះនេត្រព្រះ ខេត្តបន្ទាយមានជ័យ ដែលជាម្តាយក្មួយស្រី អ៊ីណា បានរៀបរាប់ថា នាងមានកូនចំនួន ០៣នាក់ សុទ្ធតែជាកូនស្រី ហើយកូនដែលកើតជំងឺពកឆ្អឹងខ្នងនេះ ជាកូនទី២។ នាងឈ្មោះ អ៊ីណា អាយុ ១២ឆ្នាំ រៀនថ្នាក់ទី៣។ បច្ចប្បន្ន ប្អូនស្រី លក់បបរគ្រឿង នៅមុខផ្ទះ បានចំណូលតិចតួច គ្រាន់ចិញ្ចឹមកូន ៣នាក់ និងឪពុកម្តាយចាស់ជរា។ ឪពុកនាង បច្ចុប្បន្ន ពិការ ដើរទៅណាមកណា មិនរួចទេ។ ម្យ៉ាងទៀត មកទល់នេះជួបនឹងមានជំងឺកូវីដទៀត កាន់តែនាងជួបបញ្ហាលក់មិនសូវដាច់ ព្រោះស្ងាត់អ្នកមកហូប ទោះបីជាក្នុងស្រុកព្រះនេត្រព្រះ មិនមានផ្ទុះជំងឺកាចសាហាវនេះក្តី ក៏ស្ងាត់អ្នកមកហូបបបរនាងដែរ។
ប្អូនស្រី ជួប សៀវ បានបញ្ជាក់ថា កូនរបស់ប្អូនឈ្មោះ អ៊ីណានេះ កាលពីនៅតូច មានដុំពកខ្នងនេះដែរ តែតូច ដល់នាងអាយុ ៦ឆ្នាំ បានជិះកង់លេង ហើយដួលប៉ះនឹងដុំពកខ្នងនោះ បណ្តាលដុំពកនោះ រីកធំ ឃើញដូច្នេះ ប្អូនបាននាំកូនទៅព្យាបាលនៅពេទ្យកុមារខេត្តសៀមរាប ប៉ុន្តែគ្រូពេទ្យថា មិនអី។ មកទល់ បច្ចុប្បន្ន ដុំពកនេះ វាកាន់តែរីកធំ និងទាញឆ្អឹងជំនី ចូលក្នុង បណ្តាលឲ្យផតម្ខាង។ រាល់ថ្ងៃ កូនគាត់ តែងតែថ្ងូរថា ឈឺហួល ពិសេសពេលនាងហូបបាយច្រើន គឺឈឺឆ្អល់ ក្នុងពោះ ដូច្នេះកូនរបស់នាង មិនដែលសូវហ៊ានហូបបាយច្រើនទេ។ នៅពេលទៅសាលារៀន មិនដែលបានទៅទាន់គេម៉ោងរៀនទេ ដោយសារពេលដើរ ទៅវាឈឺឆ្អល់ពោះ ដូច្នេះដើរឈប់ៗ។
ទាក់ទិននឹងជីវភាពមានបញ្ហាខ្វះខាត គ្មានលុយមើលជំងឺកូន និងគ្មានលុយទិញកង់ឲ្យកូនជិះទៅសាលារៀននោះទេ។ ប្អូនស្រី ជួប សៀវ បានអំពាវនាវដល់សប្បុរសជន ទាំងក្នុង និងក្រៅស្រុក សូមមេត្តាជួយជាសម្ភារៈ ដូចជា កង់ ក៏ដូចជាថវិកាដល់គ្រួសារនាង ដើម្បីទិញកង់ឲ្យកូនរបស់នាង ឈ្មោះ អ៊ីណា ជិះទៅរៀនបានទាន់ពេលវេលា៕ ណុប រក្សា
ចែករំលែកព័តមាននេះ