ស្ត្រីមានផ្ទៃពោះ៣ខែម្នាក់ ដើរឆ្លងផ្លូវទៅទិញប្រេងកូឡា ជួបគ្រោះថ្នាក់ត្រឹមមួយប៉ប្រិចភ្នែក
- ភ្នំពេញ
រាជធានីភ្នំពេញ ៖ ស្ត្រីមានផ្ទៃពោះ៣ខែម្នាក់ ខណៈនាងដើរឆ្លងផ្លូវក្នុងគោលបំណងទៅទិញប្រេងកូឡាទុកលាប ក៍ត្រូវឪពុកនិង
រាជធានីភ្នំពេញ ៖ ស្ត្រីមានផ្ទៃពោះ៣ខែម្នាក់ ខណៈនាងដើរឆ្លងផ្លូវក្នុងគោលបំណងទៅទិញប្រេងកូឡាទុកលាប ក៍ត្រូវឪពុកនិងកូនប្រុសម្នាក់ ជិះម៉ូតូមួយគ្រឿងជ្រុលទៅបុក បណ្តាលឱ្យស្ត្រីមានផ្ទៃពោះរូបនោះរងរបួសរបួសធ្ងន់ ។
ហេតុការណ៍ខាងលើនេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី២៦ ខែឧសភា ឆ្នាំ២០២១ ទល់មុខស្ថានីយបូមទឹកបឹងត្របែក តាមបណ្តោយផ្លូវ២៧១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
ស្ត្រីមានផ្ទៃពោះ៣ខែម្នាក់ខាងលើឈ្មោះ សួន មុំ អាយុ២៦ឆ្នាំ ។ ចំណែកភាគីខាងម៉ូតូមួយគ្រឿងម៉ាកស៊ុយហ្ស៊ុយគី វីវ៉ា ពណ៌ខ្មៅ ពាក់ស្លាកលេខ កំពង់ឆ្នាំង 1B-6245 បើកបរដោយបុរសជាឪពុក មិនស្គាល់អត្តសញ្ញាណ និងកូនប្រុសម្នាក់ ជាអ្នករួមដំណើរ មិនស្គាល់អត្តសញ្ញាណនោះទេ ។
តាមប្រភពព័ត៌មានពីកន្លែងកើតហេតុ បានអោយអោយដឹងថា មុនពេលកើតហេតុ គេបានឃើញស្ត្រីមានផ្ទៃពោះ៣ខែម្នាក់ បានដើរឆ្លងកាត់ទទឹងផ្លូវ២៧១ ក្នុងទិសដៅពីជើងទៅត្បូង លុះឆ្លងជិតផុតទៅហើយ ក៍ស្រាប់តែបុរស២នាក់ឪពុកនិងកូនបានជិះម៉ូតូមួយគ្រឿងធ្វើដំណើរតាមបណ្ដោយផ្លូវ ២៧១ ក្នុងទិសដៅពីលិចទៅកើត ដោយខ្វះការប្រុងប្រយ័ត្ន ក៍ជ្រុលទៅបុកស្ត្រីមានផ្ទៃពោះរូបនោះ បណ្តាលឲ្យដួលទាំងម៉ូតូនិងមនុស្ស និងបណ្តាលឱ្យស្ត្រីមានផ្ទៃពោះរូបនោះ រងរបួសធ្ងន់ត្រង់ដងកាំបិតខាងស្ដាំ និងចង្កេះត្រូវបានបញ្ជូនទៅសង្គ្រោះនៅគ្លីនិកឯកជនភ្លាមៗ ។
ដោយឡែកភាគីខាងម៉ូតូវិញ គឺឪពុកជាអ្នកបើក បានរងរបួសមុខ និងជើងខាងឆ្វេង ដោយឡែកកូនប្រុសអង្គុយខាងក្រោយ រងរបួសរលាត់ដៃជើងតិចតួច មិនបានទៅមន្ទីរពេទ្យនោះទេ ។
បន្តិចក្រោយមក គេឃើញមានសមត្ថកិច្ចមូលដ្ឋានប៉ុស្តិ៍នគរបាលចាក់អង្រែលើម្នាក់បានចុះកន្លែងកើតហេតុ ក៍បានអោយភាគីទាំងសងខាងស្មើគ្នា តែខាងសាច់ញាតិរបស់ស្ត្រីមានផ្ទៃពោះ មិនព្រមនោះទេ គឺទាមទារជាសំណង ។
ក្រោយពេលកើតហេតុ សមត្ថកិច្ចបានអោយភាគីទាំងសងខាងសម្របសម្រួលគ្នាម្តងទៀត ដោយភាគីខាងម៉ូតូមានលុយជាប់ខ្លួនតែ១ម៉ឺនរៀល ទើបដោះស្រាយគ្នាមិនត្រូវ សមត្ថកិច្ចបានសំរេចយកម៉ូតូទៅរក្សាទុកនៅប៉ុស្តិ៍នគរបាលចាក់អង្រែលើ ដើម្បីធ្វើការដោះស្រាយគ្នាជាថ្មី ៕
ចែករំលែកព័តមាននេះ