ប្រទេសឥណ្ឌា ៖ ប្រទេសឥណ្ឌារាយការណ៍ ថ្ងៃទី២៤ ឧសភា ថា ចំនួនអ្នកស្លាប់ដោយសារវីរុសកូវីដ-១៩ ក្នុងប្រទេសនោះបានឡើងដល់លើសពី៣០០.០០០នាក់ហើយ ដោយក្លាយជាប្រទេសទី៣លើពិភពលោក ដែលមានអ្នកស្លាប់ច្រើនជាងគេដោយសារវីរុសនេះ បន្ទាប់ពីសហរដ្ឋអាមេរិកនិងប្រេសីុល ខណៈការឆ្លងនៅបន្តខ្លាំងក្លា ក្នុងប្រទេសដ៏ធំមានប្រជាជន១,៣ពាន់លាននាក់នោះ ។
យោងតាមក្រសួងសុខាភិបាលឥណ្ឌាថា ចំនួនអ្នកស្លាប់ ដោយសារកូវីដ-១៩បានឡើងដល់៣០៣.២០នាក់ ក្នុងនោះ៥០.០០០នាក់ស្លាប់ក្នុងពេលមិនដល់២សប្ដាហ៍ពេញផង ។ ចំណែកចំនួនអ្នកឆ្លងនៅក្នុងប្រទេសនេះវិញ បានកើនដល់លើសពី២៦,៧លាននាក់ ។ ចាប់តាំងពីប៉ុន្មានសប្ដាហ៍មកហើយ ឥណ្ឌាកត់សម្គាល់ឃើញដោយទៀងទាត់ចំនួនអ្នកឆ្លង និងចំនួនអ្នកស្លាប់ប្រចាំ
ថ្ងៃក្នុងអត្រាខ្ពស់កំពូល ។ រយៈពេល២៤ម៉ោងចុងក្រោយនេះនៅឥណ្ឌាមានអ្នកស្លាប់ថ្មីដល់៤.៤៥៤នាក់ ជាតួលេខខ្ពស់បំផុតលើកទី២ បន្ទាប់ពីចំនួនអ្នកស្លាប់ប្រចាំថ្ងៃមានដល់៤.៥២៩នាក់ កាលពីថ្ងៃទី១៩ ឧសភា ។
អ្នកជំនាញការជាច្រើនវាយតម្លៃថា តួលេខពិតប្រាកដអាចមានខ្ពស់ជាងនេះទៀត ពេលដែលវីរុសកំពុងឆ្លងរាលដាលបន្តខ្លាំងនៅតាមតំបន់ជនបទដែលពុំសូវមានមន្ទីរពេទ្យ ។ចំណែកប្រទេសអីុស្រាអែលវិញ គ្រោងបញ្ចប់ការរិតត្បិតសុខាភិបាលភាគ ច្រើន ទាក់ទិននឹងវីរុសកូវីដ-១៩នៅក្នុងប្រទេស ចាប់ពីដើមខែមិថុនាទៅ ។ នេះជាការប្រកាសរបស់ក្រសួងសុខាភិ បាលកាលពីថ្ងៃទី២៣ ឧសភា ។ ជាលើកដំបូងតាំងពីលេចការឆ្លងរាលដាលនៃវីរុសនោះមក រាល់ការរិតត្បិតក្នុងប្រទេសអីុស្រាអែលនឹងត្រូវលុបចោលចាប់ពីថ្ងៃទី១ មិថុនាទៅ ។ រដ្ឋាភិបាលនៅត្រូវដាក់ឲ្យសភាអនុម័តលើសំណើនេះទៀត ។
ក្រសួងសុខាភិបាលអីុស្រាអែលក្នុងសេចក្ដីប្រកាសមួយបន្តថា ការរិតត្បិតសម្រាប់បណ្ដាអ្នកដំណើរដែលចូលមកអីុស្រាអែល នៅតែមានសុពលភាព ដើម្បីចៀសវាងការចម្លងបណ្ដាវីរុសបំប្លែងខ្លួនក្នុងប្រទេស ។អីុស្រាអែលចាប់តាំងពីដំណាច់ខែធ្នូ ឆ្នាំ២០២០មក បានធ្វើយុទ្ធនាការចាក់វ៉ាក់សាំងក្នុងទ្រង់ទ្រាយធំ ។ មកដល់ពេលនេះពលរដ្ឋអីុស្រាអែលជាង៥លាននាក់ហើយ ក្នុងចំណោមប្រជាជនប្រទេសនោះ៩,៣លាននាក់បានចាក់វ៉ាក់សាំងដូសទី២រួចហើយ ៕ ដោយ៖ ខាន់ សុឃន
ចែករំលែកព័តមាននេះ