ខេត្តក្រចេះ ៖ បើយោងរបាយការណ៍តាមអង្គការសមាគមអភិរក្សសត្វព្រៃ(WCS)បានឲ្យដឹងថា សំរាប់ឆ្នាំ២០២១គិតត្រឹមចុងខែឧសភានេះ នៅខេត្តក្រចេះរកឃើញសំបុកសត្វកន្ធាយក្បាលកង្កែបចំនួន៦២សំបុក ដែលមានពងចំនួន២,៣២២ពង ក្នុងនោះបានញាស់អស់ចំនួន៤៩សំបុក និងមកដល់ពេលនេះ កូនសត្វកន្ធាយក្បាលកង្កែបទាំងនោះ បានលែងចូលទៅក្នុងជម្រកធម្មជាតិរបស់វាវិញនៅតាមដងទន្លេមេគង្គចំនួន១០លើក ស្មើនិង១,០៨១ក្បាលមកហើយ និងនៅសល់១៣សំបុកទៀតមិនទាន់ញាស់នៅឡើយ។
របាយការណ៍បានបញ្ជាក់ថា បើប្រៀបធៀបទៅនឹងឆ្នាំ២០២០ សត្វកន្ទាយក្បាលកង្កែបមានចំនួនតែ៤៧សំបុកប៉ុណ្ណោះ ត្រូវបានការពារ និងពងចំនួន១,៧២១ពង ក្នុងនោះ ក៏មានការលែងសត្វកន្ទាយក្បាលកង្កែបចូលជម្រកធម្មជាតិវិញតាមដងទន្លេមេគង្គចំនួន៨៤៥ក្បាល ស្មើនិង០៦លើកផងដែរ។
របាយការណ៍ដដែលបានបញ្ជាក់បន្តថា ចាប់តាំងពីឆ្នាំ២០០៧មក អង្គការសមាគមអភិរក្សសត្វព្រៃ (WCS) បានអនុវត្តគម្រោងអភិរក្សសត្វកន្ធាយក្បាលកង្កែបកន្លងមក ដោយអង្គការអភិរក្សអន្តរជាតិសហការជាមួយរដ្ឋបាលជលផល ហើយខណ្ឌរដ្ឋបាលជលផលក្រចេះ បានសហការជាមួយអង្គការសមាគមអភិរក្សសត្វព្រៃប្រចាំកម្ពុជា (WCS) ចាប់ពីឆ្នាំ២០១៩មកដល់បច្ចុប្បន្ន ។
ជាមួយនេះដែរ បានជាយើងត្រូវអភិរក្សសត្វកន្ទាយក្បាលកង្កែបនេះ ដោយសារតែសត្វកន្ធាយក្បាលកង្កែបស្ថិតនៅក្នុងបញ្ជីក្រហមរបស់អង្គការ IUCN ដែលជាប្រភេទរងគ្រោះជិតផុតនៅលើសាកលលោក។ ជាងនេះទៅទៀតន នៅឆ្នាំ២០០៧ គេបានរកឃើញវត្តមានពួកវាម្តងទៀតនៅក្នុងបរិវេណ៤៨គីឡូម៉ែត្រ នៅតាមដងទន្លេមេគង្គចន្លោះខេត្តក្រចេះ និងខេត្តស្ទឹងត្រែង។ ដោយឡែកនៅខេត្តក្រចេះ គឺនៅក្នងភូមិសាស្ត្រ ឃុំវឌ្ឍនៈ ឃុំកំពង់ចាម ឃុំបឹងចារ ឃុំកោះខ្ញែរ នៃស្រុកសំបូរ ។
ជុំវិញបញ្ហានេះផងដែរ ក៏នៅមានបញ្ហាប្រឈមជាច្រើនដែលអង្គការសមាគមអភិរក្សសត្វព្រៃកម្ពុជាបានសំដែងនូវក្តីបារម្ភដូចជា នៅតែមានជនល្មើលមួយចំនួននៅតែបន្តរុករកយកពងកូន ឬចាប់យកមេពូជកន្ធាយក្បាលកង្កែបមកលក់ ឬធ្វើជាម្ហូប, ការធ្វើនេសាទ សន្ទូច ចាប់យកកន្ធាយ នៅតាមតំបន់វារស់នៅ, ប្រជានេសាទមិនទាន់យល់ពីផលប្រយោជន៍នៃការងារអភិរក្ស ប្រភេទសត្វកំពង់រង់គ្រោះ និងជិតផុតពូជ, មានការលួចលាក់ជួញដូរ សត្វកន្ធាយក្បាលកង្កែប ហៅ (ល្មិច) ដែលជាប្រភេទសត្វកំពង់រង់គ្រោះនឹងជិតផុតពូជ,ទីជម្រករបស់វាត្រូវបានបាត់បង់ដោយសាកត្តាធម្មជាតិ (អន្លង់កាន់តែរាក់ នៅតាមកោះដែលវាឡើងពងត្រូវបាត់បង់,អ្នកនេសាទមកតាំងទីលំនៅក្បែរ កន្លែងសត្វកន្ធាយឡើងពងជាដើម។
គួរបញ្ជាក់ផងដែរថា៖ កាលពីថ្ងៃទី២១ ខែឧសភាឆ្នាំ ២០២១ កន្លងទៅ អង្គការសមាគមអភិរក្សសត្វព្រៃកម្ពុជា (wcs) បានធ្វើពិធីលែងកូនកន្ធាយចំនួនជា១០០ ក្បាលចូលទៅក្នុងជម្រកធម្មជាតិ ស្ថិតនៅចំណុចកោះប្រើស ក្នុងភូមិសាស្ត្រ ទឹកដីស្រុកសំបូរ ខេត្តក្រចេះ។ ដោយ៖ ប៊ុន លីនណា
ចែករំលែកព័តមាននេះ