ខេត្តព្រៃវែង ៖ រថយន្តធុនធំមួយគ្រឿង ខណៈពេលកំពុងតែបើកនៅលើដងផ្លូវសុខៗ ស្រាប់តែដាច់កង់ចេញពីតួរថយន្ត រួចរត់ចូលទៅក្នុងហាងបាយដែលនៅជាប់ផ្លូវ ធ្វើឲ្យមនុស្សនៅក្នុងហាងបាយភ័យព្រលឹងចុងសក់គ្រប់គ្នាតែម្តង។ ហេតុការណ៍នេះ បានបង្កការភ្ញាក់ផ្អើលឡើងកាលពីវេលាម៉ោង១និង៣០នាទីរសៀល ថ្ងៃទី២១ ខែឧសភា នៅលើកំណាត់ផ្លូវជាតិលេខ១ ត្រង់ចំណុចភូមិសំរោង ឃុំល្វា ស្រុកព្រះស្តេច ខេត្តព្រៃវែង។
សមត្ថកិច្ចបានអោយដឹងថា រថយន្តបង្កនៅក្នុងហេតុការណ៍នេះ ម៉ាក Hyundai វ៉េអងសណ្តោងរម៉ក់ ពណ៌ឈាមជ្រូក ពាក់ស្លាកលេខ កំពង់ឆ្នាំង 3A-0517 ដឹកខ្សាច់ពេញរថយន្ត ធ្វើដំណើរក្នុងទិសដៅពីលិចទៅកើត លុះពេលមកដល់ចំណុចកើតហេតុ សុខៗស្រាប់តែកង់រថយន្តផ្នែកកណ្តាលរបូតចេញពីតួរថយន្ត រួចបោលសម្រុកចូលផ្ទះលក់បាយមួយកន្លែងដែលនៅក្បែនោះ ធ្វើឲ្យមនុស្សជិត១០នាក់ដែលនៅក្នុងផ្ទះ ភ័យស្លន់ស្លោរត់ចែកជើងគ្នាស.ព្រាត ។
ទោះជាយ៉ាងណា ហេតុការណ៍ខាងលើនេះ មិនបានបណ្ដាលឲ្យមាននរណាម្នាក់រងរបួសនោះទេ ដោយគ្រាន់តែធ្វើឲ្យខូចខាតទ្រព្យសម្បត្តិក្នុងផ្ទះលក់បាយនោះមួយចំនួនប៉ុណ្ណោះ។ ក្រោយកើតហេតុ អ្នកបើកបររថយន្តបង្ក បានរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ ហើយត្រូវបានសមត្ថកិច្ចនាំយកទៅរក្សាទុកនៅប៉ុស្តិ៍រដ្ឋបាល ដើម្បីរង់ចាំធ្វើការដោះស្រាយ៕
ចែករំលែកព័តមាននេះ