បន្ទាយមានជ័យ៖ មានហេតុការណ៍គ្រោះថ្នាក់ដោយចៃដន្យមួយ បានកើតឡើង បណ្តាលឲ្យបុរសម្នាក់ បានបាត់បង់ជីវិតភ្លាមៗមួយរំពេច។ គ្រោះថ្នាក់ដោយចៃដន្យ ដែលខ្វះការប្រុងប្រយ័ត្ននោះ បានកើតឡើង នៅវេលាម៉ោង ០៨ និង ១០នាទីព្រឹកថ្ងៃទី២០ ខែឧសភា ឆ្នាំ២០២១ នៅភូមិដូនឡឹក ឃុំសំបួរ ស្រុកមង្គលបូរី ខេត្តបន្ទាយមានជ័យ។
ប្រភពពីនគរបាលមូលដ្ឋានឃុំសំបួរ បានឲ្យដឹងថា ជនរងគ្រោះឈ្មោះ សេង ហ៊ឺ ភេទ ប្រុស អាយុ ៣៦ ឆ្នាំ មុខរបរ អ្នកបើកបររថយន្ត នៅភូមិស្រមោច ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ។
ប្រភពដដែល បានបញ្ជាក់ថា នៅមុនពេលកើតហេតុ ជនរងគ្រោះ រួមទាំងអ្នកបើកអេស្ការ បានអង្គុយលេងនៅក្រោមរថយន្តបែនដឹកដីរបស់ឈ្មោះ ឈុំ កញ្ញា ភេទប្រុស អាយុ ៣១ឆ្នាំ នៅភូមិតាឡំចុង ឃុំតាឡំ ស្រុកមង្គលបូរី ខេត្តបន្ទាយមានជ័យ មុខរបរអ្នកបើកបររថយន្ត។ លុះដល់ម៉ោង ០៨ និង ១០នាទី អ្នកបើកអេស្ការ ក៏ដើរទៅបើកអេស្ការ ដើម្បីចូលដី។ ចំណែកឈ្មោះ ឈុំ កញ្ញា បានដើរឡើងរថយន្តរបស់ខ្លួន ហើយបានបញ្ឆេះ ដើម្បីលើកទ្រុងឡានចាក់ដី នៅជាប់ពីល្ងាចចេញ។ ប៉ុន្តែឈ្មោះ សេង ហ៊ឺ មិនបានក្រោកចេញពីកន្លែងអង្គយ ដែលជាប់នឹងកង់ក្រោយរថយន្តរបស់ឈ្មោះ ឈុំ កញ្ញា នោះឡើយ ហើយនៅពេល ដែលឡើងលើរថយន្ត ឈ្មោះ ឈុំ កញ្ញា បានបញ្ឆេះ រួចរោទ៍ម៉ាស៊ីន បាញ់ខ្យល់ ចាក់ដីចេញពីឡាន ក៏ស្រាប់តែឡានជាប់លេខ ហើយជ្រុលទៅមុខជាន់កិន ឈ្មោះ សេង ហ៊ឺ ដែលកំពុងអង្គុយជាប់នឹងកង់ឡានខាងក្រោយ ស្លាប់ភ្លាមៗ នៅនឹងកន្លែង។
ក្រោយដឹងថា ឡានរបស់ខ្លួន កិនអ្នកបើកបរដឹកដីជាមួយស្លាប់ ឈ្មោះ ឈុំ កញ្ញា បានបើកទ្វាររថយន្ត រត់គេចខ្លួនបាត់។ បន្សល់ទុកតែរថយន្ត និងសព នៅកន្លែងដឹកដី៕ ណុប រក្សា
ចែករំលែកព័តមាននេះ