គេហទំព័របរទេស The Richest បានបង្ហាញ៩ចំណុច ដែលពិភពលោកអាចនឹងផ្ទុះសង្គ្រាមលោកលើកទី៣ ។ រូបវិទូអាល្លឺម៉ង់លោកអាល់ប៊ើត អ៊ែនស្ទេន និយាយថា «រូបលោកមិនដឹងទេថា វត្ថុអ្វីគេនឹងប្រើនៅក្នុងសង្គ្រាមលោកលើកទី៣ តែគេនឹងប្រើដំបង និងដុំថ្មនៅសង្គ្រាមលោកទី៤ » ។
១-មហាបាតុកម្ម
បដិវត្តន៍នៅអេហ្ស៊ីបឆ្នាំ២០១១ បង្ហាញឱ្យពិភពលោកឃើញថា ការដឹកនាំបែបចេតនាប្រមូលផ្តុំនឹងឈានទៅរកគោលបំណងគំនិតតែមួយអាចកើតមានលទ្ធផលជាក់ស្តែង ។ ចាប់តាំងពីពេលនោះមកបាតុកម្មត្រូវបានគេប្រទះឃើញស្ទើរគ្រប់ទីកន្លែងលើសាកលលោកពីប្រទេសចិន រហូតដល់សហរដ្ឋអាមេរិក សូម្បីតែប្រទេសអីុស្លង់ក៏មានដែរ ។ បាតុកម្មគ្រប់រូបភាពរបស់ពួកបាតុករធ្វើឡើងបង្ហាញដល់ពិភពលោកថា ពួកគេកំពុងតែផ្តាច់ខ្លួនពីរដ្ឋាភិបាល ។
ទោះជាយ៉ាងក្តី បើសិនជាកម្លាំងបាតុកម្មធ្វើឱ្យរាំងស្ទះដល់ស្ថិរភាពនយោបាយនោះ រដ្ឋាភិបាលនឹងប្រើកម្លាំងទប់ស្កាត់ ចៀសវាងធ្វើឱ្យប្រទេសកើតចលាចល ។
២-សង្គ្រាមរ៉ាំរ៉ៃរវាងអីុស្រាអែល និងអីុរ៉ង់
ប្រទេសអីុស្រាអែលបង្ហាញឥរិយាបទឆ្គាំឆ្គងនៅមជ្ឈិមបូព៌ាអស់រយៈពេលច្រើនឆ្នាំមកហើយ ។ សព្វថ្ងៃនេះប្រទេសអីុរ៉ង់ គឺជាប្រភពគំរាមកំហែងធំជាងគេរបស់អីុស្រាអែល ។ យោងតាមអតីតអនុប្រធានាធិបតីអាមេរិកលោកឌីក ឆែន្នី ឱ្យដឹងថា អីុរ៉ង់មានគោលនយោបាយបំផ្លាញប្រទេសអីុស្រាអែលឱ្យខាងតែបាន ។
៣-ឥរិយាបថកូរ៉េខាងជើង
ឥរិយាបថទាំងក្នុង និងក្រៅព្រំដែនរបស់កូរ៉េខាងជើងពិតជាចម្លែក ប៉ុន្តែប្រទេសមួយនេះផ្តោតសំខាន់លើវិស័យនុយក្លេអ៊ែរ ។ ក្រោយពីការសាកល្បងអាវុធនុយក្លេអ៊ែរចំនួន៣គ្រាប់តាំងពីឆ្នាំ២០០៦ ប្រទេសដែលស្ថិតក្រោមការគ្រប់គ្រងរបស់មេដឹកនាំវ័យក្មេងគីម ជុងអ៊ុន អះអាងថា ខ្លួននឹងផលិតកាំជ្រួចមីស៊ីលឆ្លងទ្វីបអាចឆ្លងកាត់សមុទ្រ និងវាយប្រហារសហរដ្ឋអាមេរិក ។
៤-មហន្តរាយបរិស្ថាន
គ្រោះរាំងស្ងួតរយៈពេល៣ឆ្នាំ នៅអាមេរិក បានធ្វើឱ្យការផ្គត់ផ្គង់ទឹករបស់រដ្ឋ ជួបហានិភ័យយ៉ាងខ្លាំង ។ យោងតាមលោកម៉ៃឃើល ក្លែរ និពន្ធនាយកព្រឹតិ្តប័ត្រ Resource War ឱ្យដឹងថា ការកើនឡើងនៃនីវ៉ូទឹកសមុទ្រនឹងកើតមាននៅពាក់កណ្តាលសតវត្សរ៍ក្រោយ និងលុបបំបាត់តំបន់ឆ្នេរសមុទ្រមួយចំនួនបំផ្លាញទីក្រុង ធំៗ ហេដ្ឋារចនាសម្ព័ន្ធសង្គមរួមមានផ្លូវថ្នល់ កំពង់ផែ អាកាសយានដ្ឋាន រោងចក្រចម្រាញ់ប្រេង និងរោងចក្រដើរដោយថាមពលជាដើម ។
៥-វិបត្តិបំណុលអឺរ៉ុប
វិបត្តិបំណុលនៅអឺរ៉ុបបានបង្កក្តីបារម្ភគួរឱ្យខ្លាចចំពោះប្រទេសអឺរ៉ុបចាប់តាំងពីឆ្នាំ២០០៩ មកម្ល៉េះ ។ អត្រាគ្មានការងារធ្វើនៅប្រទេស ក្រិក និងប្រទេសអេស្ប៉ាញបានកើនដល់ ២៧ ភាគរយនាឆ្នាំ២០១៣ ។ នៅឆ្នាំដដែលលោក ដាញ៉ែល ណូឡែសអ្នកយកព័ត៌មានរបស់ការសែត Telegraph សរសេរថា «ភាពតានតឹងរវាងបណ្តាប្រទេសនៅអឺរ៉ុបមិនត្រូវបានគេមើលឃើញឡើយ» ។
៦-កង្វះស្បៀងអាហារ
នៅភាគខាងលិចរបស់ពិភពលោកចាត់ទុកថា «កង្វះស្បៀងអាហារ» គឺជាបញ្ហាផ្សេងទៀតអំឡុងពេលត្រូវដោះស្រាយបញ្ហាចំពោះមុខ តែវាគឺជាបញ្ហារបស់មនុស្សជាតិដែលឈានទៅរកការស្លាប់ព្រោះអត់អាហារ ។
យោងតាមអង្គភាពស្បៀងអាហារ និងកសិកម្មរបស់អង្គការសហប្រជាជាតិហៅកាត់ថា FAO ឱ្យដឹងថា មនុស្ស៨៤២លាននាក់លើសាកលលោក ស្ថិតនៅក្រោមរបបអាហារមិនគ្រប់គ្រាន់ ។ អង្គការសហប្រជាជាតិ និងធនាគារពិភពលោកអះអាងថា នៅឆ្នាំ ២០៥០ នឹងគ្មានអាហារគ្រប់គ្រាន់សម្រាប់ផ្គត់ផ្គង់ប្រជាជនលើពិភពលោកទេ ។ បើសិនជាបញ្ហាកង្វះស្បៀងអាហារឈានដល់ការគំរាមកំហែងខ្លាំងនោះ ប្រទេស នីមួយៗ ប្រឈមនឹងការស្លាប់ដោយគ្រោះទុរភិក្សមិនខាន ។ ពួកគេនឹងវាយប្រហារគ្នាដើម្បីអាហារ ឬសង្គ្រាមក្រពះ ។
៧-កង្វះទឹក
វដ្តទឹកនៅលើផែនដីនេះ គឺជាប្រព័ន្ធទឹកបិទមានន័យថា តែងតែទទួលបានប្រភពទឹកក្នុងបរិមាណដូចគ្នា ។ ប្រព័ន្ធទឹកបិទនេះអាចទ្រទ្រង់ភាវរស់គ្រប់ប្រភេទក្នុងរយៈពេលពាន់លានឆ្នាំខាងមុខទៀត ដរាបណាយើងកុំនាំគ្នាបំពុលទឹកនោះ ។ កត្តាដែលគំរាមកំហែងដល់ប្រភពទឹកមានដូចជា ជាតិពុលក្នុងបរិយាកាស គ្រោះរាំងស្ងួត និងកត្តាមនុស្ស ។
៨-ភេរវកម្មនៅមជ្ឈិមបូព៌ា
ចាប់តាំងពីមហាភេរវកម្មនៅអាមេរិកថ្ងៃទី ១១ ខែកញ្ញា ឆ្នាំ២០០១មក អាមេរិកបានរៀបចំប្រព័ន្ធការពារទាំងក្នុង និងក្រៅប្រទេស ពោលគឺបានពង្រាយកម្លាំងទ័ពរបស់ខ្លួននៅប្រទេសមជ្ឈិមបូព៌៌ាដើម្បីរង់ចាំមើលថាតើពួកភេរវករនឹងប្រើគម្រោងការដូចពួកអាល់កៃដាធ្លាប់ធ្វើមកលើអាមេរិកទៀត ឬយ៉ាងណា ?
៩-វត្តមានកងទ័ពរុស្ស៊ីនៅស៊ីរី
យ៉ាងហោចណាស់ជំរំបស់ពួក ISIS ផ្សេងៗ គ្នាត្រូវបានបំផ្លាញដោយការវាយប្រហារតាមអាកាសរបស់កងទ័ពរុស្ស៊ីនៅប្រទេសស៊ីរីជាមួយនឹងការផ្លោងគ្រាប់មីស៊ីលឆ្លងប្រទេសទៅលើតំបន់គ្រប់គ្រងដោយពួកជ្រុលនិយមក្រុមរដ្ឋអ៊ិស្លាមមួយក្រុមនេះ ។ ក្រោយពីការវាយប្រហារ ភ្លាមៗរបស់រុស្ស៊ីទៅលើ ISIS បានធ្វើឱ្យពិភពលោកចោទសំណួរសួរថា «ហេតុអ្វីបានជារុស្ស៊ីទៅបង្ក្រាបពួក ISIS នៅស៊ីរី»? តើអំពើនេះរុស្ស៊ីខ្លួនឯងផ្ទាល់នឹងទទួលបានផលចំណេញអ្វីមកវិញ ? រុស្ស៊ីមានគោលជំហរចំនួនពីរ គឺទី១-ធ្វើឱ្យពិភពលោកទទួលស្គាល់ថាខ្លួនមានសមត្ថភាពគ្រប់គ្រាន់ក្នុងការកម្ចាត់ពួក ISIS ខណៈពេលដែលសហរដ្ឋអាមេរិកមិនបានបោសសម្អាតក្រុមបង្កព្យុះភ្លៀងយាយីពិភពលោកនោះទេ ។ ទី២-រុស្ស៊ីចង់ស្តារមុខមាត់ឡើងវិញក្រោយពីដណ្តើមបានទឹកដីអ៊ុយក្រែនដែលពិភពលោកបានថ្កោលទោសយ៉ាងខ្លាំងដូចជាការដាក់ទណ្ឌកម្មសេដ្ឋកិច្ចជាដើម ៕
ចែករំលែកព័តមាននេះ