កំពត៖ អ្នកភូមិដណ្ដើមគ្នា រើសភេសជ្ជៈទាំងព្រឹកព្រលឹម ដោយសារតែឡានក្រឡាប់ កាលពីយប់។ ពលរដ្ឋនៅភូមិដើមចារ ឃុំកំពង់ត្រាចខាងលិច ស្រុកកំពង់ត្រាច រួមទាំងអ្នកធ្វើដំណើរតាមផ្លូវជាតិលេខ៣៣ កាលពីព្រឹកព្រលឹមថ្ងៃទី១៨ ខែឧសភា ឆ្នាំ២០២១ បានរើសភេសជ្ជៈគ្រប់មុខ ដែលក្រុមហ៊ុនឯកជនមួយ បានដឹកតាមរថយន្តដាក់អោយដេប៉ូ នៅផ្សារកំពង់ត្រាច។
ប៉ុន្តែរថយន្តដឹកភេសជ្ជៈនោះ មិនទាន់ដឹកដល់គោលដៅផង ក៏ក្រឡាប់ កាលពីវេលាម៉ោង ៩ និង ៣០នាទីយប់ ថ្ងៃទី១៧ ខែឧសភា នៅខាងលិចសាលាឃុំកំពង់ត្រាច ប្រហែល ១០០ម៉ែត្រ។
ពលរដ្ឋម្នាក់ នៅភូមិចារ ដែលមានផ្ទះនៅជិតកន្លែងកើតហេតុ បាននិយាយប្រាប់អោយដឹងថា រថយន្តដឹកសំភារៈជាចាបហ៊ួយនោះ រួមមាន ភេសជ្ជៈច្រើនជាងគេ បានបើកមកពីទិសខាងលិច ទៅកើតហើយស្របនឹងមានភ្លៀងធ្លាក់ផង តែមិនដឹងបើកវ៉ារថយន្តផ្សេងទៀត ក៏មិនដឹងរថយន្តដឹកភេសជ្ជៈនោះ ក៏រេចង្គូតទៅឆ្វេងដៃ បុករះដើមឈើចំនួន ២ដើមបន្ថែមទៀត បណ្ដាលអោយរលំ និងរថយន្តក៏ត្រូវបានក្រឡាប់ធ្វើអោយសំភារៈ ក្នុងរថយន្តបែកធ្លាយ ខ្ទាតពេញដី។
ពលរដ្ឋរូបនេះ បាននិយាយថា ភ្លាមៗនោះ អ្នកបើកបរ និងព្រូទានម្នាក់ បានទាក់ទងហៅថៅកែនៅឯស្រុកឈូក អោយមកស្ទូចរថយន្តក្រឡាប់ យកចេញពីកន្លែងកើតហេតុ អោយបានឆាប់។ លុះម៉ោង ២ទៀបភ្លឺថ្ងៃទី១៨ឧសភា ទើបស្ទូចរថយន្តក្រឡាប់នោះ ចេញពីកន្លែងកើតហែតុ។ នៅសល់តែដំបូលរថយន្តតែប៉ុណ្ណោះ ដែលម្ចាស់រថយន្ត ប្រមូលទៅមិនអស់ និងភេសជ្ជៈជាច្រើនមុខ ត្រូវបានភូមិចេញមកដណ្ដើមគ្នា៕ កែវ ឆាត
ចែករំលែកព័តមាននេះ