រាជធានីភ្នំពេញ ៖ លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាម មានប្រសាសន៍ថា នៅផ្សារអុីអនជាន់ទី១តាមបណ្តោយវិថីសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ នាពេលបច្ចុប្បន្នក៏មានបន្ទប់បរិច្ចាគឈាមសម្រាប់ជួយសង្គ្រោះជីវិតមនុស្សដែរ ។
ជាក់ស្តែងបុគ្គលិកក្រុមហុ៊ន DUONG DRAGON INTERNATIONALចំនួន៥៤នាក់ដែលមានលោកឌួង ឆាយ ជាប្រធានក្រុមហុ៊ន បានស្ម័គ្រចិត្តបរិច្ចាគឈាមផងដែរនាព្រឹកថ្ងៃទី៣០តុលា ។
លោកឌួង ឆាយ ប្រធានក្រុមហុ៊នDUONG DRAGON INTERNATIONAL បាននិយាយថា លោកគាំទ្រគោលនយោបាយការផ្តល់ឈាមដោយស្ម័គ្រចិត្តរបស់ក្រសួងសុខាភិបាល ជាពិសេសគាំទ្រគោលនយោបាយរបស់រាជរដ្ឋាភិបាលក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហុ៊ន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលតែងតែយកចិត្តទុកដាក់ចំពោះសុខុមាលភាពរបស់ប្រជាពលរដ្ឋ ។
ជាការពិតណាស់ ការបរិច្ចាគឈាមជាកាយវិការមនុស្សធម៌របស់ប្រជាពលរដ្ឋគ្រប់រូបដែលអាចចូលរួមចំណែកក្នុងការជួយសង្គ្រោះអាយុជីវិតមនុស្សបាន ហើយការណ៍នេះនឹងក្លាយជាទម្លាប់ល្អ ជាគុណធម៌នៃការចែករំលែកដ៏ថ្លៃថ្លាមិនអាចកាត់ថ្លៃបាន ។ នេះជាលើកទី២ហើយដែលបុគ្គលិកក្រុមហ៊ុន DUONG DRAGON INTERNATIONAL ចូលរួមបរិច្ចាគឈាមដល់មជ្ឈមណ្ឌលជាតិផ្តល់ឈាមដើម្បីជួយសង្គ្រោះជីវិតមនុស្ស ។ នៅក្នុងឱកាសនោះដែរ លោកហុក គឹមចេង ប្រធានមជ្ឈមណ្ឌលជាតិផ្តល់ឈាមបានបញ្ជាក់ថា ជារៀងរាល់ខែមជ្ឈមណ្ឌលជាតិផ្តល់ឈាមបានផ្គត់ផ្គង់ឈាម និងផលិតផលឈាម ប្រមាណជា២៣០០ប្លោកទៅដល់មន្ទីរពេទ្យទាំងអស់នៅក្នុងរាជធានីភ្នំពេញ ។
ក្នុងនោះសម្រាប់មន្ទីរពេទ្យកាល់ម៉ែត បានទទួលឈាម ជាមធ្យមប្រមាណ ៨០០ទៅ៩០០ប្លោកជារៀងរាល់ខែ ។ លោកប្រធានមជ្ឈមណ្ឌលជាតិផ្តល់ឈាមរូបនេះ ក៏បានអំពាវនាវឲ្យចូលរួមលើកកម្ពស់ការបរិច្ចាគឈាម ពីគ្រប់ស្ថាប័នទាំងអស់ ជាមួយមជ្ឈមណ្ឌលជាតិផ្តល់ឈាម និងមជ្ឈមណ្ឌលផ្តល់ឈាមនៅគ្រប់ខេត្ត ហើយចាត់ទុកសកម្មភាពបរិច្ចាគឈាម គឺមានសារសំខាន់ ។ ប្រសិនបើបុគ្គលិកក្រុមហុ៊ន មន្ត្រីរាជការ ព្រះសង្ឃ ប្រជាពលរដ្ឋ ដែលមានទឹកចិត្តចង់បរិច្ចាគឈាមសូមទំនាក់ទំនងលេខទូរស័ព្ទ ០៩២ ៩៩៨ ០០០ និង ០៩៣ ៩៩៨ ០០០ ៕
ចែករំលែកព័តមាននេះ