កំពត៖ គជប បានប្រកាសនៅថ្ងៃទី១៨ ខែឧសភានេះថា បន្ទាប់ពីបានសម្រេចទទួលស្គាល់ជាផ្លុវការនូវការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះរបស់គណបក្សនយោបាយចំនួន ៤រួចមក គណៈកម្មការរៀបចំការបោះឆ្នោត ខេត្តកំពត បានរៀបចំពិធីចាប់ឆ្នោត ដោយព្រះសង្ឃ ដើម្បីកំណត់លំដាប់លេខរៀងគណបក្សនយោបាយ នៅលើសន្លឹកឆ្នោត នៅទីស្នាក់ការលេខាធិការដ្ឋាននៃគណៈកម្មការរៀបចំការបោះឆ្នោត ខេត្តកំពត នារសៀល ថ្ងៃទី១៨ ខែឧសភា ឆ្នាំ២០២១។
តាមសេចក្តីប្រកាស លទ្ធផលនៃការចាប់ឆ្នោតលំដាប់លេខរៀង ដែលគណបក្សនយោបាយនីមួយៗ ទទួលបាន មានដូចតទៅ៖ គណបក្សហ៊្វុនស៊ិនប៉ិច ទទួលបានលេខរៀងទី១។ គណបក្សយុវជនកម្ពុជា ទទួលបានលេខរៀងទី២។ គណបក្សប្រជាជនកម្ពុជា ទទួលបានលេខរៀងទី៣។ គណបក្សសញ្ជាតិកម្ពុជា ទទួលបានលេខរៀងទី៤។
គជប ប្រកាសថា ការកំណត់លំដាប់លេខរៀងគណបក្សនយោបាយ នៅលើសន្លឹកឆ្នោត នឹងជួយបង្កលក្ខណៈងាយស្រួលដល់គណបក្សនយោបាយ ពាក់ព័ន្ធការឃោសនាបោះឆ្នោត ហើយជួយឲ្យអ្នកបោះឆ្នោត អាចស្គាល់បានដោយងាយនូវលេខរៀង និងឈ្មោះគណបក្សនយោបាយ ដែលគាត់ស្រឡាញ់ពេញចិត្ត។
គជប ក៏បានប្រកាសថា គណៈកម្មការរៀបចំការបោះឆ្នោត ខេត្តកំពត ត្រូវបិទផ្សាយបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ដែលបានចាប់ឆ្នោតរួចហើយ ក្នុងរយៈពេលយ៉ាងតិច ៤៥ថ្ងៃ មុនថ្ងៃបោះឆ្នោត។ នេះបើយោងតាមមាត្រា២៦ នៃច្បាប់បោះឆ្នោតជ្រើសរើសក្រុមប្រឹក្សា។
កាលពីថ្ងៃទី១៦ ខែមីនា ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានចេញអនុក្រឹត្យ សម្រេចបង្កើតទីក្រុងបូកគោ នៃខេត្តកំពត ដោយត្រូវកាត់យកឃុំ ចំនួន ៣ ចេញពីស្រុកទឹកឈូ ខេត្តកំពត គឺឃុំបឹងទូក ឃុំកោះតូច និងឃុំព្រែកត្នោត។ ការសម្រេចបង្កើតក្រុងថ្មីនេះ ដើម្បីឱ្យមានភាពងាយស្រួលក្នុងការគ្រប់គ្រង និងការអភិវឌ្ឍ ឱ្យកាន់តែមានការរីកចម្រើនបន្ថែមទៀត។
កាលពីថ្ងៃទី២៦ ខែមេសា ឆ្នាំ២០២១ គជប បានប្រកាសថា សមាជិកក្រុងបូកគោ ក្នុងខេត្តកំពត សម្រាប់អាណត្តិទី១ មានចំនួន ១៣នាក់។ កាលបរិច្ឆេទនៃការបោះឆ្នោត លើកទី១ ដើម្បីជ្រើសរើសក្រុមប្រឹក្សាក្រុងបូកគោ ត្រូវបានកំណត់យកថ្ងៃអាទិត្យ ទី២៥ ខែកក្កដា ឆ្នាំ២០២១។
ការបោះឆ្នោតជ្រើសរើសក្រុមប្រឹក្សាក្រុងបូកគោនេះ នឹងធ្វើឡើងដូចការបោះឆ្នោតជ្រើសរើសក្រុមប្រឹក្សារាជធានីខេត្ត ក្រុងស្រុកខណ្ឌកន្លងមកដែរ គឺជាការបោះឆ្នោតតាមបែបអសកល។ ពោលគឺមានតែសមាជិកក្រុមប្រឹក្សាឃុំសង្កាត់ប៉ុណ្ណោះ ជាអង្គបោះឆ្នោត។ ដូច្នេះការបោះឆ្នោតជ្រើសរើសក្រុមប្រឹក្សាក្រុងបូកគោ នាថ្ងៃទី២៥ ខែកក្កដា ឆ្នាំ២០២១ គឺមានតែក្រុមប្រឹក្សាឃុំបឹងទូក ឃុំកោះតូច និងឃុំព្រែកត្នោត ជាអ្នកបោះឆ្នោត ដើម្បីជ្រើសរើសសមាជិកក្រុមប្រឹក្សាក្រុងបូក ដែលមានសមាសភាព ចំនួន ១៣រូប។
គជប បានប្រកាសថា អង្គបោះឆ្នោត ដែលជាសមាជិកក្រុមប្រឹក្សាសង្កាត់ទាំង ៣ មានចំនួនសរុប ១៧រូប រួមមាន សង្កាត់បឹងទូក ៥រូប សង្កាត់កោះតូច ៥រូប និងសង្កាត់ព្រែកត្នោត ៧រូប៕
ចែករំលែកព័តមាននេះ