អន្តរជាតិស្នើឱ្យមានកិច្ចការពារជនស៊ីវិល ខណៈជម្លោះអ៊ីស្រាអែលនិងក្រុមហាម៉ាស់គ្មានសញ្ញាបញ្ឈប់
អ៊ីស្រាអែល-តំបន់ហ្គាហ្សា ៖ អង្គការសហប្រជាជាតិ (UN), សហរដ្ឋអាមេរិក, ចក្រភពអង់គ្លេស រួមនិងបណ្តាប្រទេសជាច្រើនផ្សេង
អ៊ីស្រាអែល-តំបន់ហ្គាហ្សា ៖ អង្គការសហប្រជាជាតិ (UN), សហរដ្ឋអាមេរិក, ចក្រភពអង់គ្លេស រួមនិងបណ្តាប្រទេសជាច្រើនផ្សេងទៀត បានអំពាវនាវឱ្យមានកិច្ចការពារបន្ថែមទៀតលើជនស៊ីវិល ដែលកំពុងរងទុក្ខវេទនានៅក្នុងអំពើហិ.ង្សារវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីននៅតំបន់ហ្គាហ្សា។ នេះបើតាមការចេញផ្សាយពី BBC នៅព្រឹកនេះ។
រូបភាពក្មេងៗកំពុងត្រូវបានទាញចេញពីគំនរបាក់បែកនៃអាគារក្នុងតំបន់ហ្គាហ្សា និងប្រជាជនជាច្រើនដែលកំពុងរត់ភៀសខ្លួនទៅរកទីសុវត្ថិភាពក្នុងប្រទេសអ៊ីស្រាអែល បានបង្កការភ្ញាក់ផ្អើលយ៉ាងខ្លាំងដល់អន្តរជាតិ។ ខណៈដែលអំពើហិ.ង្សានេះ បានឈានចូលដល់សប្តាហ៍ទី២ហើយ។ ដែលរហូតមកដល់ពេលនេះ មានសញ្ញាតិចតួចបំផុតនៃបទឈប់បាញ់គ្នា ត្រូវបានមើលឃើញ។
មនុស្សជាង ២១២នាក់ក្នុងនោះមានកុមារ ៦១នាក់បានស្លា.ប់នៅតំបន់ហ្គាហ្សា និង ១០នាក់ក្នុងនោះមានកុមារ ២នាក់នៅប្រទេសអ៊ីស្រាអែល។
នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាសជំហរបន្តយុទ្ធនាការវាយប្រហារដោយគ្រាប់រ៉ុក្កែតលើតំបន់ហ្គាហ្សា។ ហើយលោកបានអះអាងថា ភាគច្រើនអ្នកដែលត្រូវបានស.ម្លា.ប់នៅតំបន់ហ្គាហ្សា គឺជាពួកសកម្មប្រយុទ្ធហាម៉ាស់។ ខណៈដែលការស្លា.ប់របស់ជនស៊ីវិលគឺដោយអចេតនា។
ដោយឡែកក្រុមហាម៉ាស ដែលជាក្រុមសកម្មប្រយុទ្ធកាន់កាប់ទឹកដីតំបន់ហ្គាហ្សា ប្រកាសមិនទទួលស្គាល់ចំពោះការលើកឡើងរបស់លោក Netanyahu នោះទេ។
មានការព្រួយបារម្ភជាអន្តរជាតិកាន់តែខ្លាំងឡើង ចំពោះអំពើហិ.ង្សានេះ ដោយមេដឹកនាំពិភពលោក និងអង្គការមនុស្សធម៌ជម្រុញឱ្យមានវិធានការណ៍ចាំបាច់ជាបន្ទាន់ ដើម្បីជៀសវាងការបាត់បង់អាយុជីវិតប្រជាជនស្លូតត្រង់។
អង្គការសហប្រជាជាតិ (UN) ក៏បានសម្តែងការព្រួយបារម្ភអំពីការខូចខាតហេដ្ឋារចនាសម្ព័ន្ធនៅក្នុងតំបន់ហ្គាហ្សា ដែលមានប្រជាជន ២លាននាក់កំពុងមានវិបត្តិភាពក្រីក្ររួចទៅហើយ។ តាមរបាយការណ៍បានឱ្យដឹងថា សាលារៀនចំនួន ៤០ និងមន្ទីរពេទ្យចំនួន ៤ ត្រូវបានបំផ្លាញទាំងស្រុងឬដោយផ្នែក នៅប៉ុន្មានថ្ងៃថ្មីៗនេះ។ ខណៈដែលការផ្គត់ផ្គង់ប្រេងឥន្ធនៈនៅទីនោះ កំពុងគំរាមកំហែងដល់សេវាកម្មជាមូលដ្ឋាន៕
ចែករំលែកព័តមាននេះ