រាជធានីភ្នំពេញ ៖ ក្នុងអំឡុងពេលប្រទេសកម្ពុជារបស់យើងផ្ទុះកើតឡើងនូវជំងឺកូវីដ១៩ នៃព្រឹត្តិការណ៍សហគមន៍២០កុម្ភៈ វាបានធ្វើឲ្យប៉ះពាល់ទៅដល់មុខរបរ និងជីវភាពរបស់ប្រជាជនខ្មែរយើងយ៉ាងខ្លាំង។ ជាក់ស្តែងសម្រាប់បងប្អូនប្រជាពលរដ្ឋដែលប្រកបមុខរបរតូចតាច នៅតាមសួនច្បារមុខព្រះបរមរាជវាំង ដែលមានដូចជាអ្នកលក់ភេសជ្ជៈតាមរទេះរុញ អ្នកលក់ចំណីព្រាប…
រាជធានីភ្នំពេញ ៖ ក្នុងអំឡុងពេលប្រទេសកម្ពុជារបស់យើងផ្ទុះកើតឡើងនូវជំងឺកូវីដ១៩ នៃព្រឹត្តិការណ៍សហគមន៍២០កុម្ភៈ វាបានធ្វើឲ្យប៉ះពាល់ទៅដល់មុខរបរ និងជីវភាពរបស់ប្រជាជនខ្មែរយើងយ៉ាងខ្លាំង។ ជាក់ស្តែងសម្រាប់បងប្អូនប្រជាពលរដ្ឋដែលប្រកបមុខរបរតូចតាច នៅតាមសួនច្បារមុខព្រះបរមរាជវាំង ដែលមានដូចជាអ្នកលក់ភេសជ្ជៈតាមរទេះរុញ អ្នកលក់ចំណីព្រាប និងអ្នកប្រកបមុខរបរលក់តុក្កតា និងរបស់ក្មេងលេងជាដើម ម្នាក់ៗការលក់ដូរមានការថយចុះ នឹងជួបការលំបាកយ៉ាងខ្លាំងគ្រប់ៗគ្នា។
បើតាមលោក ឈុំ វុធ អាយុ៥០ឆ្នាំ បានប្រាប់ឲ្យដឹងថា លោកបានប្រកបមុខរបរលក់ភេសជ្ជៈនៅតាមសួនច្បារមុខព្រះបរមរាជវាំងនេះចាប់តាំងពីឆ្នាំ ១៩៩៧ មកម្ល៉េះ ពោលគឺអស់រយៈពេល២៤ឆ្នាំមកហើយៗការលក់របស់គាត់នេះ មានថ្ងៃខ្លះក៏ដាច់ និងថ្ងៃខ្លះមិនដាច់ដែរ។ ដោយកាលពីមុនព្រឹត្តិការណ៍២០កុម្ភៈ លោកអាចលក់បានក្នុងមួយថ្ងៃចំនួន១០ម៉ឺនរៀល ដោយគិតទាំងដើមទាំងចុង ហើយក៏បានយកទៅទិញឥវ៉ាន់លក់វិញក្នុងមួយថ្ងៃពី៦ទៅ៧ម៉ឺនរៀលវិញផងដែរ សល់ពីនោះគឺយកទៅចំណាយចាយវាយក្នុងក្រុមគ្រួសារ និងបង់ថ្លៃផ្ទះជួល ដោយមិនមានសល់អ្វីទេ។
លោកក៏បានប្រាប់បន្តទៀតថា ក្រោយពីអាជ្ញាធរបានបិទផ្លូវ រូបលោកនៅតែផ្ទះមិនបានចេញដើររកស៊ីអស់រយៈពេលជាង១ខែ ទើបតែបានមកដើរលក់ដូរវិញបានរយៈពេល៤ទៅ៥ថ្ងៃប៉ុណ្ណោះ ហើយការលក់របស់គាត់នេះ ត្រូវបានគេដេញរត់ចុះឡើងៗមិនឲ្យលក់ ដោយមួយថ្ងៃៗលោកលក់បានលុយត្រឹមតែ២ទៅ៣ម៉ឺនរៀលប៉ុណ្ណោះ។ ក្នុងរយៈពេលនេះ លោកឃើញមានមនុស្សនាំគ្នាមកដើរលេងមុខវាំងច្រើនគួរសមដែរ តែពួកគាត់ពី ៧០% ទៅ៨០ភាគរយ គឺគ្រាន់តែមកដើរលេងលំហែកាយ លេងជាធម្មតា នឹងមិនបានមករកទិញអ្វីហូបឡើយ។ ហើយការលក់ដូរមិនសូវដាច់នេះ វាបានធ្វើឲ្យប៉ះពាល់ដល់ជីវភាពគ្រួសាររបស់គាត់យ៉ាងខ្លាំង ដោយគ្រួសាររបស់គាត់មានសមាជិកទាំងអស់ចំនួន៥នាក់ ហើយការលក់ដូរក៏មានការខុសគ្នាកាលពីពេលមុនឆ្ងាយ ដោយរូបគាត់ស្ទើរតែរកលុយបង់ថ្លៃផ្ទះជួលក្នុងមួយខែ១៥០ដុល្លារ បង់ថ្លៃទឹក ថ្លៃភ្លើង និងការចំណាយប្រចាំថ្ងៃស្ទើរតែលែងចង់បាន និងជួបការលំបាកយ៉ាងខ្លាំង។
ចំណែកបុរសម្នាក់ឈ្មោះ គូ សម្ផស្ស អាយុ៣៨ឆ្នាំ ជាអ្នកលក់ចំណីព្រាបបានធ្វើការត្អូញត្អែរថា ក្រោយពីកើតមាននូវជំងឺកូវីដ១៩ ព្រឹត្តិការណ៍២០កុម្ភៈនេះមក លោកលក់មិនសូវដាច់ទេ ដោយខុសកាលពីពេលមុនមានមនុស្សដើរលេងច្រើន។ ដោយកាលពីមុនលោកអាចលក់បានលុយក្នុងមួយថ្ងៃចាប់ពី៤ម៉ឺនទៅ៥ម៉ឺនរៀលឯណោះ តែពេលនេះលក់បានត្រឹមតែ២ម៉ឺនទៅ៣ម៉ឺនរៀលទេ។
លោកក៏បានរៀបរាប់ទៀតថា ចំណីព្រាបរបស់គាត់ដើរលក់ក្នុងមួយកញ្ចប់តម្លៃ២ពាន់រៀល ហើយ៣កញ្ចប់៥ពាន់រៀល ។ រាល់ថ្ងៃនេះលោកស្ទើរតែរកលុយបង់ថ្លៃផ្ទះជួលលែងបានទៅហើយ ដោយក្នុងមួយខែ៥០ដុល្លារ ក្រៅពីនោះនៅមានលុយសម្រាប់ចំណាយក្នុងក្រុមគ្រួសារផងដែរ។
រីឯបុរសឈ្មោះ លុយ វ័យ២១ឆ្នាំម្នាក់ បានប្រាប់ឲ្យដឹងថា លោកប្រកបមុខរបរលក់តុក្កតា និងរបស់ក្មេងលេងនេះអស់រយៈពេលជាង១ឆ្នាំមកហើយ ដោយកាលពីមុនកូវីដ អាចលក់បានក្នុងមួយថ្ងៃៗចាប់ពី១០ម៉ឺន២០ម៉ឺន ឬទៅ៣០ម៉ឺនរៀលឯណោះ។ លុះមកដល់ពេលនេះ ការលក់ដូររបស់លោកលែងលក់ដាច់តែម្ដង ដោយបានមួយថ្ងៃត្រឹមតែពី២ទៅ៣ម៉ឺនរៀលប៉ុណ្ណោះ ដោយសារតែមិនសូវមានអ្នកមកលេងដូចកាលពីមុន ដោយពួកគាត់មិនសូវចាយលុយ។
បុរសដដែលបានប្រាប់បន្តទៀតថា ការលក់ដូរកាលពីពេលមុន និងពេលនេះ វាមានការខុសគ្នាឆ្ងាយណាស់ តែវាមិនប៉ះពាល់ដល់ជីវភាពរស់នៅរបស់គាត់ឡើយ ដោយសារតែខ្លួនមួយរស់នៅម្នាក់ឯង គឺវាជារឿងធម្មតា។
ចែករំលែកព័តមាននេះ