រាជធានីភ្នំពេញ ៖ ទីបំផុតលោក ប៉ុល ហំម អតីតមន្ត្រីជាន់ខ្ពស់គណបក្សសង្គ្រោះជាតិ និងអតីតមន្ត្រីបក្សនេះម្នាក់ទៀត សម្រេចដាក់ពាក្យស្នើសុំសិទ្ធិធ្វើនយោបាយទៅក្រសួងមហាផ្ទៃជាផ្លូវការហើយ ។ យោងតាមលិខិតស្នើសុំរបស់លោក…
រាជធានីភ្នំពេញ ៖ ទីបំផុតលោក ប៉ុល ហំម អតីតមន្ត្រីជាន់ខ្ពស់គណបក្សសង្គ្រោះជាតិ និងអតីតមន្ត្រីបក្សនេះម្នាក់ទៀត សម្រេចដាក់ពាក្យស្នើសុំសិទ្ធិធ្វើនយោបាយទៅក្រសួងមហាផ្ទៃជាផ្លូវការហើយ ។
យោងតាមលិខិតស្នើសុំរបស់លោក ប៉ុល ហំម និងលោក ផាន់ ច័ន្ទសាក់ដាក់ពាក្យស្នើសុំសម្តេចក្រឡាហោមស ខេង នៅថ្ងៃទី១៨ឧសភា ឆ្នាំ២០២១ថា« ខ្ញុំ និងលោកផាន់ ច័ន្ទសាក់ អតីតសមាជិកគណៈកម្មាធិការអចិន្ត្រៃ ដែលកំពុងស្ថិតនៅក្នុងការហាមឃាត់ មិនឲ្យធ្វើសកម្មភាពនយោបាយសម្រាប់រយៈពេល៥ឆ្នាំ តាមអំណាចសាលដីការករណីរំលាយគណបក្សសង្គ្រោះជាតិ ចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល» ។
ប្រភពបន្តថា ដោយផ្អែកតាមមាត្រា៤៥ថ្មី (ស្ងួនមួយ) នៃច្បាប់ស្តីពីគណបក្សនយោបាយ ដែលបង្កលក្ខណៈឲ្យអ្នកដែលត្រូវបានហាមឃាត់មិនឲ្យធ្វើសកម្មភាពនយោបាយ អាចទទួលបាននីតិសម្បទា ធ្វើនយោបាយ ឡើងវិញ ។ ដូចនេះខ្ញុំបាទសូមស្នើសុំសម្ដេចក្រឡាហោម ឧបនាយករដ្ឋមន្ត្រី មេត្តាពិនិត្យតាមនីតិវិធីដើម្បីផ្តល់នីតិសម្បទាធ្វើនយោបាយឡើងវិញដល់រូបខ្ញុំ ដោយក្តីអនុគ្រោះ ។
សូមជម្រាបថា រហូតមកដល់ថ្ងៃ១៨ ឧសភានេះ ក្រុមមន្ត្រីជាន់ខ្ពស់នៃអតីតគណបក្សសង្គ្រោះជាតិជាច្រើនរូប បានសុំសិទ្ធិធ្វើនយោបាយឡើងវិញដូចជា លោក អ៊ូ ច័ន្ទរ័ត្ន លោក យ៉ែម បុញ្ញឬទ្ធិ លោក មាជ សុវណ្ណារ៉ា លោក សុន ឆ័យ លោក មុត ចន្ថា លោក តាន គឹមឈន លោក វ៉ា សាម៉ុន លោក ជុំ ច័ន្ទដារិន លោក ទូត ឃឿត លោក ឡាត់ លិតេយ្យ លោក ឡុង គឹមឃន និងលោក យង់ ផាន់ណេត ព្រមទាំងមន្ត្រីមួយចំនួនទៀត ដែលភាគច្រើនសុទ្ធសឹងតែជាមនុស្សជំនិតរបស់លោក កឹម សុខា ។
បើតាមអ្នកវិភាគការសុំសិទ្ធិធ្វើនយោបាយឡើងវិញ ដោយពួកគាត់អស់ជំនឿ និងអស់សង្ឃឹមទៅលើគណបក្សដែលរលាយហើយ មិនអាចរស់ឡើងវិញ ព្រោះអស់រយៈពេលជាង៣ឆ្នាំហើយ ដែលពួកគាត់ទន្ទឹងរង់ចាំការរស់ឡើងវិញ នៃអតីតគណបក្សរបស់ខ្លួនទៅតាមការឃោសនាអកុសលរបស់លោក សម រង្ស៊ី ។
ប៉ុន្តែ រហូតមកទល់ពេលនេះ មើលមិនបានឃើញនូវពន្លឺអ្វី សូម្បីតែបន្តិច ។
គួរបញ្ជាក់ថា អតីតថ្នាក់ដឹកនាំអតីតគណបក្សសង្គ្រោះជាតិ សរុប១១៨នាក់ ត្រូវបានតុលាការកំពូលកម្ពុជាចេញសាលដីការ សម្រេចផ្អាកមិនឲ្យធ្វើសកម្មភាពនយោបាយ រយៈពេល៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧ ក្រោយពីអតីតគណបក្សសង្គ្រោះជាតិ ត្រូវបានរំលាយដោយអំណាចសាលក្រមតុលាការ ។
គួរបញ្ជាក់ថាករណីស្នើសុំសិទ្ធិធ្វើនយោបាយនេះអ្នកនាំពាក្យក្រសួងមហាផ្ទៃធ្លាប់បានលើកឡើង បើសិនអតីតគនបក្សប្រឆាំងធ្វើលិខិតស្នើសុំត្រឹមត្រូវតាមច្បាប់ក្រសួងនឹងពិនិត្យក្នុងការស្នើសុំទៅរាជរដ្ឋាភិបាលដើម្បីស្នើសុំព្រះមហាក្សត្រផ្តល់សិទ្ធិធ្វើនយោបាយដល់អតីតមន្ត្រីគណបក្សសង្គ្រោះជាតិ ៕
ចែករំលែកព័តមាននេះ