ខេត្តពោធិ៍សាត់ ៖ នៅថ្ងៃទី២៧ ខែសីហាលោកសេង ស៊ុនហ៊ួត នាយខណ្ឌរដ្ឋបាលជលផលពោធិ៍សាត់បានចុះពិនិត្យមើលការប្រមូលផលស្រូវដើមរដូវវស្សារបស់កសិករនៅភូមិស្វាយជ្រុំឃុំបឹងបត់កណ្តោល ស្រុកបាកាន ខេត្តពោធិ៍សាត់ ដែលមានទិន្នផលខ្ពស់ បន្ទាប់ពីទទួលការបណ្តុះបណ្តាលបច្ចេកទេសពីសំណាក់មន្ត្រីសំរបសំរួលរបស់ខណ្ឌរដ្ឋបាលជលផលកន្លងមក ។ ក្នុងទឹកមុខញញឹមរីករាយកសិករឈ្មោះអ៊ុន ហៀ រស់នៅភូមិស្វាយជ្រុំ ឃុំបឹងបត់កណ្តោលបានឱ្យដឹងថា៖ «បន្ទាប់ពីទទួលបានវគ្គបណ្តុះបណ្តាលជំនាញបច្ចេកទេសថ្មីក្នុងការធ្វើស្រែដោយធ្វើការកែប្រែទំលាប់មួយចំនួនពីអ្នកជំនាញជលផលកសិកម្មមក បានធ្វើឱ្យការធ្វើស្រែរបស់ខ្ញុំរួមជាមួយកសិករក្នុងភូមិមួយចំនួនទៀតទទួលបានផលច្រើនហួសពីការស្មានរបស់ខ្លួន តាមរយៈការធ្វើដីស្រែឱ្យស្មើល្អ ត្រូវជ្រើសរើសពូជសុទ្ធល្អ ការសន្សំជីកំប៉ុស្តិ៍សំរាប់កែលំអគុណភាពដី អាយុសំណាបមិនឱ្យលើសពី២០ថ្ងៃ និងការឧស្សាហ៍ព្យាយាមចុះមើលស្រែបោចស្មៅជាប្រចាំ» ។
នៅក្នុងពិធីសំណេះសំណាលជាមួយកសិករលោក សេង ស៊ុនហ៊ួត បានសំដែងនូវការកោតសរសើរដល់ការខិតខំប្រឹងប្រែងព្យាយាមរបស់កសិករ បន្ទាប់ពីការទទួលយកនូវបទពិសោធន៍ថ្មីក្នុងការធ្វើស្រែរហូតទទួលបាននូវលទ្ធផលគួរជាទីពេញចិត្តពេលនេះ ដែលជាការឆ្លុះបញ្ចាំងនូវការវិវត្តន៍មួយជំហានទៀតរបស់កសិករយើងក្នុងការបង្កើនផលិតភាពស្បៀង ។ ក្នុងឱកាសនោះ លោក សេង ស៊ុនហ៊ួត បានរាយការណ៍សង្ខេបពីសភាពការណ៍បង្កបង្កើនផលជូនកសិករចូលរួមថា ពិនិត្យជារួមក្នុងខេត្តពោធិ៍សាត់គិតត្រឹមថ្ងៃទី២៥ ខែសីហា ឆ្នាំ២០១០ អនុវត្តបាន៧៥.៧០០ហិកតា ស្មើនឹង៧៧ភាគរយនៃផែនការលើផ្ទៃដីបង្កបង្កើនផល៩៨.០០០ហិកតា ដោយសាររបាយទឹកភ្លៀងរដូវវស្សាឆ្នាំនេះមិនស្មើល្អ និងអូសបន្លាយពេលវេលាធ្វើឱ្យការងារបង្កបង្កើនផលជួបប្រទះការលំបាកមិនទាន់រដូវកាលថែមទៀតផង ។ ស្ថិតនៅចំពោះមុខបញ្ហានេះ លោកបានសំណូមពរ និងណែនាំដល់បងប្អូនកសិករត្រូវធ្វើការផ្លាស់ពូជជាការចាំបាច់ ព្រោះបើកសិករយើងប្រើប្រាស់ពូជស្រូវធ្ងន់ ឬស្រូវកណ្តាលនោះ អាចជួបប្រទះនូវហានិភ័យនៅចុងរដូវ ។
ហេតុនេះបងប្អូនត្រូវតែជ្រើសរើសពូជតាមពេលវេលា និងរដូវកាលដើម្បីធ្វើស្រែបានផលស្រូវតាមការគ្រោងទុក ពិសេសស្រូវស្រាលមិនប្រកាន់រដូវដូចជាអ៊ីអ៊ែរ៦៦ ពូជសែនពិដោរ ឬពូជជលសា សំរាប់បង្កបង្កើនផលនាពេលនេះចំពោះផ្ទៃដីដែលមានលទ្ធភាពធ្វើស្រែបាន ដោយឡែកផ្ទៃដីដែលគ្មានសង្ឃឹមថា អាចធ្វើស្រែបានត្រូវបង្វែរទៅដាំដំណាំរួមផ្សំដូចជាពោត សណ្តែក ដំឡូងជាដើម ។ ម៉្យាងទៀតខណ្ឌរដ្ឋបាលជលផលមានគោលបំណងចង់ចងក្រងកសិករភូមិស្វាយជ្រុំនេះ ជាកសិករគំរូក្នុងការអនុវត្តដំណាំស្រូវតាមគោលការណ៍ធម្មជាតិ (បវស) ដែលជាបច្ចេកទេសថ្មីប្រើប្រាស់ពូជតិចទទួលបានទិន្នផលខ្ពស់ និងកំពុងពេញនិយមក្នុងស្រទាប់កសិករនៅទូទាំងប្រទេស ជាពិសេសដើម្បីឱ្យការអនុវត្តន៍នេះទទួលបានជោគជ័យទាមទារការចូលរួមឯកភាពគ្នារបស់កសិករក្នុងការសន្សំជីធម្មជាតិ និងការកំណត់ប្រើប្រាស់ពូជឱ្យបានច្បាស់លាស់ ។ នៅក្នុងឱកាសនោះដែរ លោកសេង ស៊ុនហ៊ួត បាននាំយកអំណោយរបស់លោកបណ្ឌិតច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចែកជូនកសិករចំនួន១៦គ្រួសារក្នុងមួយគ្រួសារទទួលបានសារុង១ គ្រាប់ពូជស្ពៃ២កំប៉ុង និងគ្រាប់ពូជត្រកួន០,៥គីឡូក្រាម ៕
ចែករំលែកព័តមាននេះ