ខេត្តកណ្តាល ៖ កាលពីថ្ងៃទី៣១ តុលា ២០១៥ នេះ លោកជំទាវ ពេជ ចន្ទមុន្នី ហ៊ុន ម៉ាណែត បាននាំយកថវិកាចំនួន៤លានរៀលដែលជាអំណោយដ៍ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ឧបត្ថម្ភជូនស្ត្រីឈ្មោះគីម ហេង អាយុ២៧ឆ្នាំ ជាកម្មការិនីបម្រើការនៅរោងចក្រកាត់ដេរ មានទីលំនៅស្រុកខ្សាច់កណ្តាល ខេត្តកណ្តាល មានជំងឺបេះដូងប្រហោងធ្ងន់ធ្ងរ ហើយត្រូវបានទទួលការព្យាបាលការវះកាត់ដោយជោគជ័យ រួចផុតពីសេចក្តីស្លាប់ ពីសំណាក់ក្រុមគ្រូពេទ្យជំនាញនៃសមាគមគ្រូពេទ្យស្ម័គ្រចិត្តយុវជនសម្តេចតេជោ និងមន្ទីរពេទ្យកាល់ម៉ែត ។
លោកជំទាវ ពេជ ចន្ទមុន្នី ហ៊ុន ម៉ាណែត បានមានប្រសាសន៍ថា សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តែងតែយកចិត្តទុកដាក់គិតគូរពីសុខទុក្ខ និងការរស់នៅរបស់ប្រជាពលរដ្ឋតាមការស្នើឱ្យសមាគមគ្រូពេទ្យស្ម័គ្រចិត្តយុវជនសម្តេចតេជោ ចុះពិនិត្យ និងព្យាបាលជំងឺផ្សេងៗជូនប្រជាពលរដ្ឋដោយឥតគិតថ្លៃ នៅតាមទីជនបទនៅក្នុងប្រទេសកម្ពុជា ដោយមិនប្រកាន់និន្នាការនយោបាយសាសនាអ្វីឡើយ។
ជាក់ស្តែងថ្ងៃនេះ ក្រៅពីបញ្ជូនប្អូនស្រីមកទទួលការវះកាត់បេះដូងប្រហោង និងព្យាបាលដោយជោគជ័យ នៅមន្ទីរពេទ្យកាល់ម៉ែតក្រោមការយកចិត្តទុកដាក់សម្របសម្រួលពីសមាគមគ្រូពេទ្យស្ម័គ្រចិត្តយុវជនសម្តេចតេជោហើយនោះ សម្តេចក៏បានគិតគូរពីជីវភាពរស់នៅរបស់ប្អូនស្រីដោយការឧបត្ថម្ភជាថវិកាប្រកបដោយសន្តានចិត្តសប្បុរសធម៌ មនុស្សធម៌ចំពោះប្រជាពលរដ្ឋ។
ចែករំលែកព័តមាននេះ