រាជធានីភ្នំពេញ ៖ ផ្សារមួយចំនួននៅតែបន្តលក់ដូរ ដោយល្មើសនឹងសេចក្តីសម្រេចរបស់រដ្ឋបាលរាជធានីភ្នំពេញ ដែលបន្តផ្អាកដំណើរការជាបណ្តោះអាសន្ន ផ្សាររដ្ឋ និងផ្សារមិនរៀបរយទាំងអស់នៅក្នុងរាជធានីភ្នំពេញ រយៈពេល៧ថ្ងៃទៀត។ ការបន្តលក់ដូរនៅក្នុងស្ថានភាពបែបនេះ អាចបង្កអោយកើតមានហានិភ័យ បង្កដោយមេរោគកូវីដ១៩ ដែលកំពុងតែរាតត្បាតយ៉ាងកាចសា.ហាវនេះ។
ជាក់ស្តែង នៅព្រឹកថ្ងៃទី១៦ ខែឧសភា ឆ្នាំ២០២១នេះ ផ្សារព្រៃទា ជាផ្សារមិនរៀបរយមួយ ស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ត្រូវបានអាជីវករនាំគ្នាលក់ដូរព្រោងព្រាតមានទាំងត្រី សាច់ ម្ហូបអាហារ និងរបស់របរមិនចាំបាច់ទាំងអស់ និយាយរួមគឺលក់ដូរដូចដើម ដូចមុនពេលដែលរដ្ឋបាលរាជធានីភ្នំពេញសម្រេចផ្អាកដំណើរការជាបណ្តោះអាសន្នចឹង ។
ដោយឡែក ផ្សារជម្ពូវ័ន ស្ថិតនៅភូមិជម្ពូវ័ន សង្កាត់ចោមចៅ៣ ក៏បានបន្តទៀតដូចនៅក្នុងផ្សារមួយ ផ្នែកដែរ ដូចជា តាមគ្រែ និងតូបមួយចំនួន ហើយតូចខ្លះ នៅតែបន្តិច ទ្វារ ដោយគោរពតាមសេចក្តីសម្រេចរបស់រដ្ឋាបាលរាជធានីភ្នំពេញ។ ចំណែកការលក់ដូរ នៅតាមចិញ្ចើមផ្លូវលេខ៤ក្រៅផ្សារ ក៏បានបន្តលក់ដូរ បង្កអោយមានការកកស្ទះចរាចរណ៍រាល់ព្រឹកផងដែរ ។
បើតាមព័ត៌មានបានអោយដឹងថា ចាប់ពីស្ពានអាកាសថ្មើរជើងមុខសាលាបឋមសិក្សា ជម្ពូវ័នទៅទិសខាងលិច សងខាងផ្លូវជាតិលេខ៤ ទាំងលក់សួនច្បារ ក៏បានក្លាយទៅជាផ្សារបន្លែ ផ្លែឈើ ទៅហើយ។ចំណែកចិញ្ចើមផ្លូវក៏បានក្លាយជាចំណតរថយន្ត រ៉ឺម៉ក របស់អាជីវករដោយពុំមានគណៈកម្មកាផ្សារ ក៏ដូចជាសន្តិសុខផ្សារយកចិត្តទុកចុះរៀបចំឡើយ ។
គួរបញ្ជាក់ថា ផ្សាររដ្ឋ និងឯកជនមួយចំនួន ត្រូវបានប្រកាសផ្អាកដំណើរកាជាបន្តបន្ទាប់ បន្ទាប់ពី អាជីវករមួយចំនួនរកឃើញវិជ្ជមានកូវីដ១៩ ព្រមទាំងឈានទៅផ្អាកដំណើរការជាបណ្តោះអាសន្នផ្សាររដ្ឋ និងផ្សារមិនរៀបរយទាំងអស់រយៈ១៤ថ្ងៃ។ លុះក្រោយមក រដ្ឋបាលរាជធានីភ្នំពេញក៏បានបន្តបិទជាបណ្តោះអាសន្នសម្រាប់រយៈពេល ៧ (ប្រាំពីរ) ថ្ងៃទៀត គិតចាប់ពីម៉ោងសូន្យ នាថ្ងៃទី៨ ខែឧសភា ឆ្នាំ២០២១ រហូតដល់ថ្ងៃទី១៤ ខែឧសភា ឆ្នាំ២០២១ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩។
ដោយសារតែស្ថានភាពកូវីដ១៩ នៅតែបន្តរាតត្បាត ហើយនៅតែជាកង្វល់ រដ្ឋបាលរាជធានីភ្នំពេញ ក៏បានសម្រេចបន្តផ្អាកដំណើរការជាបណ្តោះអាសន្ន ផ្សាររដ្ឋ និងផ្សារមិនរៀបរយទាំងអស់ក្នុងរាជធានីភ្នំពេញសម្រាប់រយៈពេល៧ថ្ងៃទៀត គិតចាប់ពីម៉ោងសូន្យនាថ្ងៃទី១៥ ខែឧសភា ឆ្នាំ ២០២១ រហូតដល់ថ្ងៃទី២១ ខែ ឧសភា ឆ្នាំ ២០២១។ ទោះបីជាយ៉ាងណា អាជ្ញាធរមូលដ្ឋាន ក៏បានដូចជាគណៈគ្រប់គ្រងផ្សារមួយចំនួន មិនបានអនុវត្តសេចក្តីសម្រេចរបស់រដ្ឋបាលរាជធានីភ្នំពេញ អោយមានប្រសិទ្ធភាពឡើយ៕
ចែករំលែកព័តមាននេះ