ខេត្តបន្ទាយមានជ័យ ៖ កសិករដាំដំណាំបាននិយាយថា ផ្លែភ្ញៀវនៅឆ្នាំនេះដាំបានកើនឡើង ហើយការលក់ចេញក៏បានថ្លៃជាងឆ្នាំមុនៗ ដោយឆ្នាំមុនបានតម្លៃ៣.០០០រៀល(១គក្រ) តែដល់ឆ្នាំនេះបានតម្លៃ៤.០០០រៀល(១គក្រ) ។
កសិករជាម្ចាស់ចម្ការ ឈ្មោះហម រ៉ាឌី បានប្រាប់ថា ខ្លួនមានដីចម្ការកេរពីឳពុកទំហំ១ហិចតានៅក្រោយវត្តបុព្វសិលារាមភក្តនេស នៅភូមិអន្សមចេក ឃុំសឿ ស្រុកមង្គលបូរី ខេត្តបន្ទាយមានជ័យ ។ ក្នុងចម្ការឈើហូបផ្លែនេះមានដាំដើមខ្នុរ ល្មុត កំពីងរាជ ដូង ស្វាយ ស្វាយខ្ទិះ ច័ន្ទ ម៉ាក់ប្រាង ម៉ាក់យ៉ុង ។ក្នុងនោះ ក៏មានដើមភ្ញៀវចំនួន៣៥ដើមផងដែរ ។
ប្អូនហម រ៉ាឌី បានបន្តថា ដើមភ្ញៀវនេះរយៈពេល២០ឆ្នាំហើយ ដាំដំបូង បាន៥ឆ្នាំ ក៏បានផល ។ ដើមនេះ បានសាកមែកដាំបន្ត ហើយមិនបានប្រើជីនិងថ្នាំឡើយ ។ ហេតុនេះ ពេលទុំហើយ ក៏វាមានរសជាតិជូអែម មិនផ្អែមដូចភ្ញៀវពីបរទេសដែលគេប្រើជីនិងថ្នាំគីមីឡើយ ។កសិកររូបនេះបានបន្តថា ក្នុងរយៈពេល១០ឆ្នាំគឺលក់នៅតាមផ្សារនិងសាលារៀន បោះដុំក្នុងថ្លៃ៣.០០០រៀល/គក្រ ។១ដើមបានផល១០០គក្រ ។
ប៉ុន្តែដោយរយៈពេល៤-៥ឆ្នាំ ចុងក្រោយនេះ ដោយសារមានគេថតបង្ហោះតាមបណ្តាញសង្គម ទើបមានភ្លៀវមកមើលនិងមកទិញផ្លែភ្ញៀវដល់ចម្ការតែម្តង មិនបាច់បេះទៅលក់ក្រៅចម្ការទៀតឡើយ ។ ប្អូនកសិករថា តាំងពីដំណាំក្នុងចម្ការបានផលមក ជីវភាពគ្រួសារប្អូនបានប្រសើរឡើង ជាងកាលប្អូនធ្វើតែស្រែមួយមុខ ។ ដោយ៖ ណុប រក្សា
ចែករំលែកព័តមាននេះ