រាជធានីភ្នំពេញ ៖ លោកស្រី ថាក់ ឡានី មន្ត្រីជាន់ខ្ពស់គណបក្សប្រឆាំង ដែលបាននិរទេសខ្លួនទៅប្រទេសស៊ុយអែត បានត្រឡប់មកដល់ប្រទេសកម្ពុជាវិញ តាមច្រកអន្តរជាតិប៉ោយប៉ែត ដោយសុវត្ថិភាពថ្ងៃទី១៤ ខែឧសភា ឆ្នាំ២០២១ ។
យោងតាមបណ្តាញសង្គមហ្វេសប៊ុកមួយបានលើកឡើងថា ពេលមកដល់ច្រកព្រំដែនអន្តរជាតិប៉ោយប៉ែត៉ែត លោកស្រី ថាក់ ឡានី លោកស្រីពិតជារំភើបចិត្តរកអ្វីប្រៀបផ្ទឹមពុំបានទេ ដែលលោកស្រីទទួលបានការសណ្ដោសប្រោសប្រណីពីសម្តេចតេជោ ហ៊ុន សែន ជាពិសេស វត្តមានរបស់លោកស្រីនៅប្រទេសកម្ពុជានៅពេលនេះ គឺដោយមានការជួយជ្រោមជ្រែងយ៉ាងខ្លាំងក្លាពីសម្តេចតេជោ ហ៊ុន សែន ។
លោកស្រី ថាក់ ឡានី បានបញ្ជាក់ថា ចាប់តាំងពីលោកស្រីចេញពីប្រទេសកម្ពុជាទៅនៅប្រទេស ស៊ុយអែត តាមការបំភ័យអោយរត់គេចរបស់មេដឹកនាំបក្សប្រឆាំង លោកស្រីបានរស់នៅម្នាក់ឯងកណ្ដោចកណ្ដែងដូចចកនៅកណ្ដាលលំហរសមុទ្រគ្មានកោះត្រើយ ហើយមេដឹកនាំបក្សប្រឆាំងមិនដែលមកសួរសុខទុក្ខលោកស្រីម្ដងណាទេ ។
នៅពេលដែលលោកស្រីមានទុក្ខព្រួយ លោកស្រីនឹកឃើញតែមេដឹកនាំម្នាក់គត់ដែលលោកស្រីជឿទុកចិត្តថា អាចជួយសង្គ្រោះលោកស្រីពីលំហរសមុទ្របាន គឺសម្ដេចតេជោ ហ៊ុន សែន ។ ទីបំផុត លោកស្រីបានគេចផុតពីទុក្ខវេទនាកណ្ដោចកណ្ដែងម្នាក់ឯង និងបានត្រលប់មកជួបជុំក្រុមគ្រួសារវិញនៅថ្ងៃនេះ ។
លោកស្រី និង ស្វាម៉ី បានគោរពថ្លែងអំណរគុណសម្ដេចតេជោ ហ៊ុន សែន នាយករដ្ឋមន្ត្រី ដែលតែងតែជួយដោះស្រាយទុក្ខលំបាកអោយប្រជាពលរដ្ឋគ្រប់ស្រទាប់វណ្ណៈដោយមិនគិតនិន្នាការនយោបាយឡើយ ។
គួរបញ្ជាក់ថា លោកស្រី ថាក់ ឡានី ត្រូវបានប្រមុខរដ្ឋស្ដីទី ចេញព្រះរាជក្រឹត្យលើកលែងទោស កាលពីថ្ងៃទី៣ ខែ មីនា ឆ្នាំ ២០២១ តាមការស្នើសុំរបស់សម្ដេចតេជោ ហ៊ុន សែន នាយករដ្ឋមន្ត្រី នៃ រាជរដ្ឋាភិបាល ៕
ចែករំលែកព័តមាននេះ