ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា យុវជនមួយក្រុមមានគ្នា៥នាក់ ព្រោះតែខឹងរឿងដណ្តើមសង្សារ ក៏នាំគ្នាមកពួនស្ទាក់កា.ប់ទៅជនរងគ្រោះ បណ្តាលឱ្យជនរងគ្រោះរងរបួសដាច់.កដៃខាងឆ្វេង និងរបួសក្បាលធ្ងន់ធ្ងរ ក្រោយមកយុវជនមួយក្រុមនេះ ត្រូវបានសមត្ថកិច្ចឃាត់ខ្លួនបាន រួចបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់ នៅថ្ងៃទី១៤ ខែឧសភា ឆ្នាំ២០២១នេះ។
បើតាមលោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសនៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានប្រាប់ឱ្យដឹងថា ជនសង្ស័យដែលត្រូវឃាត់ខ្លួន៥នាក់រួមមាន ៖ ១-ឈ្មោះ ស៊ុន រ៉ាម៉ី ភេទប្រុស អាយុ១៧ឆ្នាំ, ២-ឈ្មោះ ហៃ ម៉េងហាក់ ភេទប្រុស អាយុ១៧ឆ្នាំ, ៣-ឈ្មោះ ផាត ភេទប្រុស អាយុ១៦ឆ្នាំ, ៤-ឈ្មោះ ជិន មិថុនា ភេទប្រុស អាយុ១៨ឆ្នាំ និង៥-ឈ្មោះ ថន អារុណប្រាថ្នា ហៅពេជ្រ ភេទប្រុស អាយុ១៩ឆ្នាំ ជនសង្ស័យទាំង៥នាក់នេះរស់នៅភូមិមិត្តភាព សង្កាត់-ក្រុងប៉ោយប៉ែត។
លោកបានបញ្ជាក់ថា ក្រោយពីទទួលពាក្យបណ្តឹងពីឈ្មោះ ខាន់ លីហ័ង ភេទប្រុស អាយុ៣៤ឆ្នាំ រស់នៅភូមិក្បាលស្ពានមួយ សង្កាត់-ក្រុងប៉ោយប៉ែត បានប្តឹងក្មេងស្ទាវ១ក្រុមដែលបានធ្វើសកម្មភាពកា.ប់ទៅលើកូនប្រុសរបស់គាត់មានឈ្មោះ ឌឿន រ៉ានុត ភេទប្រុស អាយុ១៧ឆ្នាំ បណ្តាលដាច់.កដៃឆ្វេង និងរបួសក្បាលរបួសធ្ងន់ធ្ងរ ហើយកំពុងសង្គ្រោះបន្ទាន់ នៅវេលាម៉ោង៦ល្ងាច ថ្ងៃទី១១ ខែឧសភា ឆ្នាំ២០២១ ខណៈនៅពេលដែលកូនប្រុសរបស់គាត់ទៅលេងបាល់នៅក្លិបបាល់ទាត់ «ស្ពតវើល» ស្ថិតក្នុងភូមិមិត្តភាព សង្កាត់-ក្រុងប៉ោយប៉ែត។
លោកវរសេនីយ៍ទោ ព្រហ្ម ថេង បានបញ្ជាក់ថា ក្រោយពេលទទួលបណ្តឹងភ្លាម លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត បានដឹកនាំកម្លាំងជំនាញចុះស្រាវជ្រាវ និងកំណត់មុខសញ្ញាតាមចាប់ឃាត់ខ្លួនជនសង្ស័យបានចំនួន៥នាក់ដែលធ្វើសកម្មភាពកា.ប់ទៅលើជនរងគ្រោះឈ្មោ ឌឿន រ៉ានុត និងបានដកហូតវត្ថុតាងមួយចំនួនរួមមាន ៖ កាំបិតកែឆ្នៃដងដែក១ ប្រវែង១៨៥សង់ទីម៉ែត្រ, កាំបិតប៉័ងតោ១, ពូថៅ១, ឈើជ្រុង១ និងម៉ូតូ១គ្រឿង ដែលឃាត់កាលពីថ្ងៃទី១៣ ខែឧសភា ឆ្នាំ២០២១ នៅភូមិសន្តិភាព សង្កាត់-ក្រុងប៉ោយប៉ែត។
លោកបានបញ្ជាក់ថា ក្រោយពេលឃាត់ខ្លួនជនសង្ស័យទាំង៥នាក់ខាងលើ បានបញ្ជូនទៅទីបញ្ជាការកងរាជអាវុធហត្ថខេត្តបន្ទាយមានជ័យ បានធ្វើការសាកសួរ ហើយតាមចម្លើយសារភាពពីមូលហេតុដែលពួកគេកា.ប់ទៅលើជនរងគ្រោះឈ្មោះ ឌឿន រ៉ានុត ថា «ព្រោះតែគំនុំរឿងដណ្តើមសង្សារឈ្មោះ ស៊ុន រ៉ាម៉ី ហើយក៏ធ្លាប់កា.ប់ និងវ៉ៃទៅលើពួកគេ ទើបគំនុំសងសឹកស្ទាក់កា.ប់វិញ» ។ ក្រោយពេលសាកសួរហើយ ក្រុមជនសង្ស័យត្រូវបានសមត្ថកិច្ចកសាងសំណុំរឿង ដើម្បីបញ្ជូនទៅសាលាដំបូងខេត្ត ចាត់ការតាមច្បាប់៕
ចែករំលែកព័តមាននេះ