រាជធានីភ្នំពេញ ៖ ដើម្បីអស់ចម្ងល់អ្នកនាំពាក្យ កម្មាធិកាសិទ្ធិមនុស្សកម្ពុជា បានបញ្ជាក់ថា សិទ្ធិស្មើគ្នាចំពោះមុខច្បាប់មិនមែនមានន័យថា ពលរដ្ឋត្រូវទទួលបាននូវលក្ខខណ្ឌដូចគ្នាទាំងអស់ពីរដ្ឋនៅគ្រប់ករណីឡើយ ។ លោក ជិន…
រាជធានីភ្នំពេញ ៖ ដើម្បីអស់ចម្ងល់អ្នកនាំពាក្យ កម្មាធិកាសិទ្ធិមនុស្សកម្ពុជា បានបញ្ជាក់ថា សិទ្ធិស្មើគ្នាចំពោះមុខច្បាប់មិនមែនមានន័យថា ពលរដ្ឋត្រូវទទួលបាននូវលក្ខខណ្ឌដូចគ្នាទាំងអស់ពីរដ្ឋនៅគ្រប់ករណីឡើយ ។
លោក ជិន ម៉ាលីន អនុប្រធាន និងជាអ្នកនាំពាក្យ គណៈកម្មាធិការសិទ្ធិមនុស្សកម្ពុជា បានលើកឡើងតាមបណ្តាញសង្គម នៅថ្ងៃទី១៣ ឧសភា ឆ្នាំ២០២១ឱ្យដឹងថា ផ្អែកលើគោលការណ៍ច្បាប់សិទ្ធិមនុស្សជាតិ-អន្តរជាតិ អាជ្ញាធរសាធារណៈ អាចកំណត់លក្ខខណ្ឌក្នុងការជ្រើសរើសមន្ត្រីដូចជា លក្ខខណ្ឌ អាយុ បទពិសោធន៍ សញ្ញាបត្រ ពិរុទ្ធភាព និងចាក់វ៉ាក់សាំងជាដើម ។
លោក ជិន ម៉ាលីន បានឱ្យដឹងបែបនេះ ក្រោយពីអ្នកសារព័ត៌មាន ចោទសួរថា តើការកំណត់វ៉ាក់សាំងកាតព្វកិច្ចសម្រាប់មន្ត្រីរាជការ និងជាលក្ខខណ្ឌសម្រាប់ធ្វើជាមន្ត្រី ជាការរំលោភបំពានសិទ្ធិស្មើភាពគ្នាចំពោះមុខច្បាប់ ដូចការចោទប្រកាន់របស់សង្គមស៊ីវិលមួយចំនួនដែរឬទេ ?
លោកបានគូសបញ្ជាក់ថា «ផ្អែកលើគោលការណ៍ច្បាប់សិទ្ធិមនុស្សជាតិ និងអន្តរជាតិ អាជ្ញាធរសាធារណៈ អាចកំណត់នូវលក្ខខណ្ឌមួយចំនួនបានក្នុងការជ្រើសរើសមន្ត្រី ដូចជា លក្ខខណ្ឌអាយុ បទពិសោធន៍ សញ្ញាបត្រ ពិរុទ្ធភាព ការចាក់វ៉ាក់សាំងជាដើម ។ រួមទាំងលក្ខខណ្ឌផ្សេងទៀតផងដែរ ដែលមានភាពចាំបាច់ និងដើម្បីធានាបាននូវគុណភាព ប្រសិទ្ធភាព និងសុវត្ថិភាពរបស់ស្ថាប័ន ដែលការកំណត់នេះ មិនមែនជាការរំលោភបំពានសិទ្ធិស្មើភាពគ្នាចំពោះមុខច្បាប់នោះទេ ព្រោះថាវាធ្វើឡើងដើម្បីប្រយោជន៍សាធារណៈ ហើយជាពិសេសលក្ខខណ្ឌវ៉ាក់សាំងនេះ គឺដើម្បីទប់ស្កាត់ និងប្រយុទ្ធប្រឆាំងការឆ្លងរាលដាលកូវីដ-១៩ មិនមែនដើម្បីប្រយោជន៍ឯកជននោះទេ» ។
លោកបន្ដថា ប្រសិនបើការកំណត់លក្ខខណ្ឌវ៉ាក់សាំងកាតព្វកិច្ចនេះជាការរំលោភបំពានសិទ្ធិស្មើភាពគ្នាចំពោះមុខច្បាប់ ដូចសង្គមស៊ីវិលចោទប្រកាន់មែននោះ ហេតុអ្វីក៏មិនលើកពីលក្ខខណ្ឌផ្សេងទៀតដូចជា អាយុ បទពិសោធន៍ និងសញ្ញាបត្រ ជាដើមជាការរំលោភបំពានសិទ្ធិស្មើភាពគ្នាចំពោះមុខច្បាប់ព្រោះថា អ្នកដែលមិនអាចបំពេញបានលក្ខខណ្ឌទាំងនេះមិនអាចប្រឡងធ្វើជាមន្ត្រី បាននោះទេ ។
អ្នកនាំពាក្យនឹងជាសាស្ត្រាចារ្យផ្នែកច្បាប់គូសបញ្ជាក់ទៀតថា សិទ្ធិស្មើភាពគ្នាចំពោះមុខច្បាប់ មិនមែនមានន័យថា ពលរដ្ឋត្រូវទទួលបាននូវលក្ខខណ្ឌ ដូចគ្នាទាំងអស់ពីរដ្ឋនៅគ្រប់ករណី និងគ្រប់កាលៈទេសៈនោះទេ គឺអាចមានការលើកលែង ហើយដែលករណីលើកលែងនេះ ធ្វើឡើងក្នុងស្ថានភាពចាំបាច់ និងដើម្បីប្រយោជន៍សាធារណៈ ដូចជា អនីតិជន មិនអាចបោះឆ្នោតបាន អ្នកធ្លាប់មានទោសពីបទឧក្រិដ្ឋមិនត្រូវបានអនុញ្ញាតឱ្យធ្វើជាមន្ត្រីរាជការ និងលោកសង្ឃមិនអាចបង្កើតបក្សនយោបាយបាន ជាដើម ៕
ចែករំលែកព័តមាននេះ