រាជធានីភ្នំពេញ ៖ សមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី២ បានដកហូតម៉ូតូហុងដាវ៉េវ មួយគ្រឿងយកទៅរក្សាទុក បន្ទាប់ពីជនសង្ស័យជាមុខសញ្ញាទាក់ឆ្កែបានជិះទៅផ្តួលទុកចោលរត់គេចខ្លួនពីសមត្ថកិច្ច កាលពីវេលាម៉ោង១និង២០នាទីរំលងអធ្រាត្រឈានចូល ថ្ងៃទី១៤ ខែឧសភា ឆ្នាំ២០២១ ត្រង់ចំណុចគោលស្ពានអាកាសស្ទឹងមានជ័យ តាមបណ្ដោយផ្លូវ២៧១ ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ ។
តាមប្រភពព័ត៌មានពីកម្លាំងសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី២បានឲ្យដឹងថា នៅមុនពេលកើតហេតុ ក្រុមជនសង្ស័យមានគ្នា២នាក់ ជិះម៉ូតូមួយគ្រឿងម៉ាក ហុងដាវ៉េវ ពណ៌ខ្មៅ ពាក់ស្លាកលេខ ភ្នំពេញ 1L-3886 ។ បានជិះដឹកគ្នាដោយមានភ្ជាប់ជាមួយឧបករណ៍សម្រាប់ទាក់កឆ្កែជាប់ជាមួយ និងបំរុងធ្វើសកម្មភាពទាក់ឆ្កែនៅម្តុំខាងក្រោយផ្សារសុវណ្ណា ស្ថិតក្នុងសង្កាត់ទំនប់ទឹក ខណ្ឌបឹងកេងកង ។
ស្របពេលនោះដែរ ក៏មានបុរសជាអ្នកដំណើរម្នាក់ជិះម៉ូតូមួយគ្រឿងមិនចាំម៉ាក រួចក៏បានជិះទៅជួបជាមួយ និងក្រុមជនសង្ស័យដែលបំរុងធ្វើសកម្មភាពទាក់ឆ្កែ ។ បន្ទាប់ពីក្រុមជនសង្ស័យបានឃើញបុរសនោះក៏បន្ថែមល្បឿនព្យាយាមជិះរត់គេចខ្លួន តែត្រូវបុរសនោះព្យាយាមជិះម៉ូតូដេញតាមពីក្រោយ និងបានរាយការណ៍ជូនសមត្ថកិច្ចឲ្យជួយធ្វើការអន្តរាគមន៍ផងដែរ ។
ក្រុមជនសង្ស័យបានព្យាយាមជិះម៉ូតូរត់គេចអស់ជាច្រើនផ្លូវ រហូតដល់ចំណុចកើតហេតុ ក្រុមជនសង្ស័យក៏បានផ្តួលម៉ូតូចោល រួចស្ទុះរត់គេចខ្លួនចូលទៅក្នុងផ្លូវឌឿងហែមដែលត្រូវបានបិទខ្ទប់ (តំបន់ក្រហម) បាត់ស្រមោល បន្សល់ទុកម៉ូតូរួមជាមួយឧបករណ៍សម្រាប់ទាក់ឆ្កែនៅកន្លែងកើតហេតុ តែប៉ុណ្ណោះ ។
ក្រោយពេលកើតហេតុក៏មានសមត្ថកិច្ចមូលដ្ឋានបានចុះមកធ្វើការអន្តរាគមន៍និងបាននាំយកម៉ូតូ រួមជាមួយវត្ថុតាំងដែលក្រុមជនសង្ស័យបានបន្សល់ទុកយកទៅរក្សាទុកនៅប៉ុស្តិ៍នគរបាលរដ្ឋបាលស្ទឹងមានជ័យទី២ ដើម្បីធ្វើការស្រាវជ្រាវតាមចាប់ក្រុមជនសង្ស័យយកមកផ្តន្ទាទោសទៅតាមផ្លូវច្បាប់ជាបន្តទៀត ៕
ចែករំលែកព័តមាននេះ