ខេត្តកំពង់ស្ពឺ ៖ ពាក់ព័ន្ធវិវាទដីធ្លីមួយ នៅខេត្តកំពង់ស្ពឺ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីប្រកាសព័ត៌មាននៅថ្ងៃទី១៣ ឧសភា ២០២១នេះ…
ខេត្តកំពង់ស្ពឺ ៖ ពាក់ព័ន្ធវិវាទដីធ្លីមួយ នៅខេត្តកំពង់ស្ពឺ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីប្រកាសព័ត៌មាននៅថ្ងៃទី១៣ ឧសភា ២០២១នេះ អោយដឹងថា ដោយពិនិត្យឃើញ ហ្វេសប៊ុករបស់ឈ្មោះ អាន សំអូន បានបង្ហោះវីដេអូ និងបានលើកឡើងថា «ទាហានរំលោភដីប្រជាជលរដ្ឋនៅចំណុចភូមិវាលធំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ» ។
ក្រសួងបានចាត់មន្ត្រីចុះពិនិត្យស្រាវជ្រាវឃើញថា បុគ្គលដែលបានលើកឡើងក្នុងវីដេអូថា ទាហានរំលោភយកដីគាត់ មានឈ្មោះ ឃី ចំរើន និងប្រពន្ធឈ្មោះ ជា សុធា ជាប្រជាជនមានស្រុកកំណើតនៅខេត្តព្រៃវែង បានមករស់នៅក្នុងសហគមសង្គ្រោះជនពិការកម្ពុជា នៅចន្លោះឆ្នាំ២០០៨-២០០៩ និងទទួលបានដីពីសហគម ទំហំ ៥០ម៉ែត្រ គុណ ១៥០ម៉ែត្រ ។ ឈ្មោះ ឃី ចំរើន អះអាងថា បានទិញដីបន្ថែមពីយោធាដែលជាសមាជិកសមាគមសង្គ្រោះជនពិការកម្ពុជា នៅឆ្នាំ២០១១ ប៉ុន្តែពុំមានឯកសារបញ្ជាក់ពីការទិញលក់នោះទេ ។
តាមលទ្ធផលវាស់វែង ដែលបានបង្ហាញព្រំដីដោយឈ្មោះ ឃី ចំរើន ផ្ទាល់ឃើញថា ដីមានទំហំ ១៥,៩៣១ ម៉ែត្រការ៉េ ក្នុងនោះ ដីមិនពាក់ព័ន្ធជាមួយមជ្ឈមណ្ឌលអភិវឌ្ឍន៍យោធា មានទំហំ ៤,៩៦១ ម៉ែត្រការ៉េ និងដីទំហំ ១០,៩៧០ ម៉ែត្ររ៉េទៀត ជាដីដែលពាក់ព័ន្ធជាមួយមជ្ឈមណ្ឌលអភិវឌ្ឍន៍យោធា ។
ដូច្នេះ វិវាទខាងលើទាក់ទងនឹងការកាន់កាប់ដីរបស់ឈ្មោះ ឃី ចំរើន ជាន់ទីលើដីរបស់មជ្ឈមណ្ឌលអភិវឌ្ឍន៍យោធា ហើយសកម្មភាពដែលបង្ហាញ នៅក្នុងវីដេអូ ជាសកម្មភាពដែលកើតឡើងនៅថ្ងៃទី០៧ ឧសភា ២០២១ ជាពេលវេលាដែលអាជ្ញាធរ ឃុំត្រែងត្រយឹង ចុះទៅហាមឃាត់ឈ្មោះ ឃី ចំរើន មិនឲ្យសាងសងផ្ទះចូលក្នុងព្រំដីរបស់មជ្ឈមណ្ឌលអភិវឌ្ឍន៍យោធា ។
សូមទស្សនាវីដេអូ នៅលើហ្វេសប៊ុកឈ្មោះ អាន សំអូន មានដូចខាងក្រោម ៖
ចែករំលែកព័តមាននេះ