ទីក្រុងហុងកុង ៖ ទីក្រុងហុងកុង គឺជាតំបន់ទីប្រជុំជន និងតំបន់រដ្ឋបាលពិសេស នៃសាធារណរដ្ឋប្រជាមានិតចិន នាពេលថ្មីៗនេះ គយហុងកុង បានបង្ក្រាបករណីរត់ពន្ធ និងរឹបអូសប្រភេទឈើប្រណីត(ប្រភេទឈើកម្រ) ដែលគេសង្ស័យថា មានចំនួនប្រហែល ២១១តោន ជាមួយនឹងតម្លៃទីផ្សារប្រមាណ ១,១លានដុល្លារ ចំនួន ៧កុងតឺន័រ នៅឯទីតាំងគយ Kwai Chung និងគយ Tsing Yi ជាកន្លែងត្រួតពិនិត្យទំនិញគេចពន្ធ ចន្លោះពីថ្ងៃទី២៩ ខែមេសា ដល់ថ្ងៃទី៥ ឧសភា ២០២១ ។ នេះគឺជាការរឹបអូសយកឈើធំបំផុត ដែលមិនធ្លាប់មានទេ ក្នុងរយៈពេល៥ឆ្នាំ កន្លងមក ។
តាមរយៈមន្ត្រីគយ បានជ្រើសរើសកុងតឺន័រ ចំនួន៧ទូ ដែលបានមកដល់ទីក្រុងហុងកុង ពីប្រទេសកម្ពុជា ដើម្បីធ្វើការត្រួតពិនិត្យក្នុងកំឡុងពេលខាងលើ(ថ្ងៃទី២៩មេសា ដល់ទី៥ ឧសភា) ។ ពេលចុះត្រួតពិនិត្យ មន្ត្រីគយរកឃើញកំណាត់ឈើប្រណីត ដែលគេលាក់ទុកនៅខាងក្នុងទូកុងតឺន័រទាំងនោះ ។
ករណីនេះ ត្រូវបានប្រគល់ទៅឱ្យមន្ទីរកសិកម្ម ជលផល និងអភិរក្ស ដើម្បីធ្វើការស៊ើបអង្កេតបន្ត ។
ស្ថិតក្រោមការការពារបទបញ្ញត្តិសត្វព្រៃ និងរុក្ខជាតិ ដែលជិតផុតពូជ ជនណាម្នាក់ ត្រូវបានរកឃើញថា មានកំហុសក្នុងការនាំចូល ឬនាំចេញ ប្រភេទសត្វជិតផុតពូជ ឬឈើប្រណីត ដោយគ្មានអាជ្ញាប័ណ្ណ ត្រូវទទួលការពិន័យជាអតិបរមា ១០លានដុល្លារហុងកុង និងជាប់ពន្ធនាគាររយៈពេល ១០ឆ្នាំ ៕ ប្រភពពី customs.gov.hk
ចែករំលែកព័តមាននេះ