ឥណ្ឌារកឃើញការឆ្លងមេរោគផ្សិតខ្មៅដ៏កម្រ៥០ករណី លើអ្នកជំងឺកូវីដ-១៩
ឥណ្ឌា ៖ ប្រធានរដ្ឋ Madhya Pradesh លោក Shivraj Singh Chouhan បានបញ្ជាក់កាលពីថ្ងៃទី១២ ខែឧសភា ថា មានករណីឆ្លង
ឥណ្ឌា ៖ ប្រធានរដ្ឋ Madhya Pradesh លោក Shivraj Singh Chouhan បានបញ្ជាក់កាលពីថ្ងៃទី១២ ខែឧសភា ថា មានករណីឆ្លងមេរោគផ្សិតខ្មៅឈ្មោះថាMucormycosis ដ៏កាចសាហាវចំនួន៥០ករណី ត្រូវបានរាយការណ៍ថា កើតមានចំពោះអ្នកជំងឺកូវីដ១៩ ក្នុងរដ្ឋរបស់លោក។ ដែលវាគឺជាការព្រួយបារម្ភថ្មីមួយទៀត សម្រាប់រដ្ឋាភិបាលឥណ្ឌា។ នេះបើតាមការចេញពីសារព័ត៌មាន NDTV របស់ឥណ្ឌា។
លោក Chouhan បាននិយាយថា «ករណីនៃការឆ្លងមេរោគផ្សិតខ្មៅ កំពុងលេចឡើងដ៏គួរឱ្យរន្ធត់បំផុត។ វាជាបុព្វហេតុដែលគួរឱ្យព្រួយបារម្ភខ្លាំងណាស់។ ហើយរហូតមកដល់ពេលនេះ ៥០ករណីហើយ ត្រូវបានបញ្ជាក់ថាមានមេរោគនេះ»។
ករណីការឆ្លងមេរោគផ្សិតខ្មៅដ៏កម្រនេះ ត្រូវបានរាយការណ៍ក្នុងចំណោមអ្នកដែលជាសះស្បើយពីជំងឺកូវីដ១៩។ ខណៈដែលមេរោគដ៏សាហារនេះ បានប៉ះពាល់ដល់ប្រហោងឆ្អឹង, ខួរក្បាល និងសួត ហើយមានគ្រោះថ្នាក់ដល់អាយុជីវិតផងដែរ។
រោគសញ្ញានៃការឆ្លងមេរោគដ៏កម្រនេះរួមមាន ៖ ឈឺក្បាល,គ្រុនក្តៅ, ឈឺចាប់នៅក្រោមភ្នែក,ច្រមុះ, ប្រហោងឆ្អឹង, ស្រវាំងភ្នែក ដែលឈានដល់ងងឺតមើលលែងឃើញតែម្តង។ ហើយអ្វីដែលកាន់តែអាក្រក់ថែមទៀតនោះ ក្នុងករណីធ្ងន់ធ្ងរផ្នែកដែលរងផលប៉ះពាល់នៃមេរោគនេះ ត្រូវតែវះកាត់យកចេញតែម្តង។
លោក Chouhan បានបន្តទៀតថា រដ្ឋបាលរបស់លោកនឹងរៀបចំពិធីសារលម្អិត សម្រាប់ការព្យាបាលការឆ្លងមេរោគផ្សិតខ្មៅនេះ។
លោកបានបន្ថែមថា រដ្ឋាភិបាលនឹងផ្តល់ថវិកាយ៉ាងពេញលេញក្នុងការព្យាបាលអ្នកជំងឺ ដែលមានសេដ្ឋកិច្ចខ្សត់ខ្សោយ។
ដោយឡែករដ្ឋាភិបាលកណ្តាលបានអះអាងថា ខ្លួនកំពុងចូលរួមជាមួយក្រុមហ៊ុនផលិតឱសថ ដើម្បីបង្កើនការផលិតថ្នាំប្រឆាំងព្យាបាលជំងឺផ្សិតខ្មៅ Mucormycosis នេះ៕
ចែករំលែកព័តមាននេះ