រាជធានីភ្នំពេញ ៖ លោកវេជ្ជបណ្ឌិត វ៉ារ៉ឺន សូឡី ឯកទេសជំងឺមហារីកនៃមន្ទីរពេទ្យកាល់ម៉ែត បានឲ្យដឹងថា ៖ ជាមួយនឹងភាពជឿនលឿនជាលំដាប់នៃបច្ចេកវិទ្យាព្យាបាលជំងឺមហារីកក្នុងពេលបច្ចុប្បន្ន បានធ្វើអោយការព្យាបាល…
រាជធានីភ្នំពេញ ៖ លោកវេជ្ជបណ្ឌិត វ៉ារ៉ឺន សូឡី ឯកទេសជំងឺមហារីកនៃមន្ទីរពេទ្យកាល់ម៉ែត បានឲ្យដឹងថា ៖ ជាមួយនឹងភាពជឿនលឿនជាលំដាប់នៃបច្ចេកវិទ្យាព្យាបាលជំងឺមហារីកក្នុងពេលបច្ចុប្បន្ន បានធ្វើអោយការព្យាបាល អោយជាសះស្បើយ និងបង្កើនគុណភាពជីវិតអ្នកជំងឺ មានកំរិតខ្ពស់។
ការប្រើឧបករណ៍ Gamma Probe សំរាប់រាវរកកូនកណ្តុរដំបូងរបស់ដុំមហារីក មានតួនាទីសំខាន់ណាស់ក្នុងការកំណត់ដំណាក់កាលជំងឺមហារីក ផ្តល់ផែនការព្យាបាល ព្រមទាំងបង្កើនគុណភាពជីវិតអ្នកជំងឺ តាមរយៈការកាត់បន្ថយផលវិបាកក្រោយវះកាត់។
១)- តើអ្វីទៅជាកូនកណ្តុរដំបូងនៃដុំមហារីក?
កូនកណ្ដុរដំបូងគេបង្អស់ដែលទទួលច្រោះទឹករងៃ ពីតំបន់ដែលមានដុំសាច់មហារីក។
២)- តើត្រូវធ្វើដូចម្ដេចទើបអាចកំណត់ថា កូនកណ្តុរដំបូងមានកោសិកាមហារីកឬទេ?
ជាបឋម គ្រូពេទ្យត្រូវចាក់ថ្នាំនៅជុំវិញដុំមហារីក និងចាំមួយរយៈដើម្បីអោយជាតិថ្នាំជ្រាបទៅដល់កូនកណ្តុរដំបូង។ បន្ទាប់មកទៀត ឧបករណ៍ Gamma Probe រាវរកកូនកណ្តុរដំបូង ដើម្បីជំនួយដល់គ្រូពេទ្យវះកាត់យកកូនកណ្តុរទាំងនោះចេញ និងវិភាគមើលភ្លាមៗថាតើមានកោសិកាមហារីករាលដាលទៅដល់កូនកណ្តុរទាំងនោះឬទេ?។
៣)- តើអ្វីជាសារៈសំខាន់នៃការរកកូនកណ្តុរដំបូងនៃដុំមហារីក?
ចំពោះជំងឺមហារីកនៅដំណាក់កាលដំបូងមួយចំនួន ជាពិសេសមហារីកសុដន់ និងមហារីកស្បែក (Melanoma) ការព្យាបាលដោយវះកាត់ គឺជាគន្លឹះក្នុងការទទួលបានការជាសះស្បើយ។ ការវះកាត់ត្រូវធ្វើឡើងដោយវះយកដុំមហារីកចេញ និងវះយកប្រព័ន្ធកូនកណ្ដុរដែលពាក់ព័ន្ធចេញ ទាំងអស់ដើម្បីធានាអោយបានអាត្រាជាសះស្បើយខ្ពស់។
ថ្វីត្បិតតែការវះយកប្រព័ន្ធកូនកណ្ដុរដែលពាក់ព័ន្ធចេញទាំងអស់នេះមានសារៈសំខាន់មែន តែវាអាចបង្កជាផលវិបាកមួយចំនួនដល់អ្នកជំងឺដូចជា ការហើមអវៈយៈដោយចាល់ទឹករងៃ (lymphedema) ការចុះថយមុខងារអវៈយវៈដែលហើម និងការឈឺចាប់។ ហេតុដូចនេះ គ្រូពេទ្យត្រូវកំណត់អោយដឹងមុនថា តើមានការរាលដាលកោសិកាមហារីកដល់កូនកណ្តុរនៅតំបន់ដុំសាច់មហារីកឬទេ ព្រោះថាបើគ្មានការរាលដាលទេ គ្រូពេទ្យអាចរក្សាទុកកូនកណ្ដុរទាំងនោះបាន និងអាចបង្ការផលវិបាកដែលបានរៀបរាប់ខាងលើ។
លោកវេជ្ជបណ្ឌិត វ៉ារ៉ឺន សូឡី ឯកទេសជំងឺមហារីកនៃមន្ទីរពេទ្យកាល់ម៉ែតបានបញ្ជាក់ថា ៖ ជាមួយនឹងឧបករណ៍ Gamma Probe ថ្មីនេះ ការព្យាបាលជំងឺមហារីកកាន់តែទទួលបានប្រសិទ្ធភាពខ្ពស់ ដែលជាតម្រូវការចាំបាច់ និងជាបំណងប្រាថ្នារបស់ក្រុមគ្រូពេទ្យឯកទេសយើង ៕
ចែករំលែកព័តមាននេះ