ថីនមិទ្ធៈ(ថី នៈ មិត ធៈ)ជានីវរណ(នី វៈ រៈ ណៈ)ធម៌ទី៣ក្នុងចំណោមពួកនីវរណធម៌ទាំង៥ ។ ធម៌នេះមានក្នុងបុគ្គលណាហើយ រមែងញុំាងបុគ្គលនោះឱ្យដល់នូវសេចក្តីអន្តរាយចាកប្រយោជន៍ក្នុងលោកនេះទាន់ភ្នែកតែម្តង ។
ពាក្យថីនមិទ្ធៈញែកចេញជាពីរសព្ទគឺ ១-ថីន: គឺសេចក្ដីធុញទ្រាន់ ២-មិទ្ធ: គឺសេចក្ដីងោកងក់ ។ បណ្ដាធម៌ទាំងនោះ ថីន: តើដូចម្ដេច ? ភាពមិនឈ្លាសវៃ ភាពមិនគួរដល់ការងារ ការជ្រុបនៅ សម្ងំនៅ អាការ:រួញរា សេចក្ដីធុញទ្រាន់ នេះហៅថាថីន: ។
ចុះមិទ្ធ: តើដូចម្ដេច ? ភាពមិនឈ្លាសវៃ ភាពមិនគួរដល់ការងារ ការស្រពោន ការងងឹតស្លុប ការងោកងក់ ភាពសុបសៅ នេះហៅថាមិទ្ធ:។
ជារួមមក ថីនមិទ្ធៈប្រែថា សេចក្តីងងុយងោកងក់, ដំណើរដេកលក់, ដំណើរច្រអូសនិងងងុយដេក, សេចក្តីធុញទ្រាន់ រួញរាក្នុងចិត្ត និងដំណើរងងុយដេក ។ បុគ្គលដែលលុះក្នុងអំណាចនៃថីនមិទ្ធៈរមែងនាំឱ្យជីវិតមិនភ្លឺស្វាងឡើយ ៕ សាន សារិន
ចែករំលែកព័តមាននេះ