ពាក្យបណ្តឹងរបស់កញ្ញា មាន ពេជ្ររីតា និងឧកញ៉ា ហេង សៀ ចោទប្រកាន់គ្នាទៅវិញទៅមក
រាជធានីភ្នំពេញ ៖ នៅថ្ងៃទី១៣ ខែឧសភា ឆ្នាំ២០២១នេះ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចដោះលែងកញ្ញា មាន ពេជ្ររីតា ពិធីការិនីទូរទស្សន៍…
រាជធានីភ្នំពេញ ៖ នៅថ្ងៃទី១៣ ខែឧសភា ឆ្នាំ២០២១នេះ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចដោះលែងកញ្ញា មាន ពេជ្ររីតា ពិធីការិនីទូរទស្សន៍ My TV និងជាអតីតបេក្ខនារី Miss Grand Cambodia ឲ្យនៅក្រៅឃុំ ជាបណ្តោះអាសន្នករណីចោទប្រកាន់ពីបទ (លួចមានស្ថានទម្ងន់ទោស) ។ ហើយកញ្ញា មាន ពេជ្ររីតា កាលពីថ្ងៃទី១១ ឧសភា ក៏បានដាក់ពាក្យបណ្តឹងប្តឹងលោកឧកញ៉ា ហេង សៀ វិញដែរ ពីបទប៉ុនប៉ងរំលោ.ភសេពស.ន្ថវៈ នៅក្នុងរថយន្ត ។
ទោះជាយ៉ាងណាក្តី ភាគីទាំងពីរសុទ្ធតែ បានបង្ហាញភស្តុតាង ដើម្បីការពារក្តីរៀងខ្លួន ជាក់ស្តែងដូចជាវីដេអូកាមេរ៉ាសុវត្ថិភាព នៅថ្ងៃទី៤ ខែឧសភា ឆ្នាំ២០២១ ត្រង់ចំណុចម្តុំផ្សារគីឡូម៉ែត្រលេខ៤ ជិតសាកលវិទ្យាល័យអាស៊ីអឺរ៉ុប បង្ហាញពីជម្លោះរវាងស្ត្រីឈ្មោះ មាន ពេជ្ររីតា និងលោកឧកញ៉ា ហេង សៀ ដែលរឿងរ៉ាវនេះ កំពុងចោទប្រកាន់ដាក់គ្នាទៅវិញទៅមក ។ លោកឧកញ៉ា ហេង សៀ បានចោទប្រកាន់កញ្ញា មាន ពេជ្ររីតា ពីបទ(លួចមានស្ថានទម្ងន់ទោស) ដោយចោទប្រកានជនសង្ស័យបានធ្វើសកម្មភាពលួចទូរស័ព្ទដៃ ទើបមានការប្រតប់ប្រតាយគ្នា ហើយជនសង្ស័យឈ្មោះ មាន ពេជ្ររីតា បានប្រើកាំបិទចាក់លោកឧកញ៉ា ហេង សៀ ២កាំបិត ។ ចំណែកស្ត្រីឈ្មោះ មាន ពេជ្ររីតា ហៅយូប៊ី វិញបានប្តឹងចោទប្រកាន់លោកឧកញ៉ា ហេង សៀ ពីបទ(ប៉ុនប៉ងរំលោ.ភសេពស.ន្ថវៈមានស្ថានទម្ងន់ទោស) ប្រព្រឹត្តនៅក្នុងរថយន្ត ។
យោងតាមកំណត់ហេតុពាក្យបណ្តឹងរបស់ឧកញ៉ា ហេង សៀ ធ្វើឡើងដោយសមត្ថកិច្ច នៅមន្ទីរពេទ្យរ៉ូយ៉ាល់ភ្នំពេញ កាលពីថ្ងៃទី០៦ ឧសភា ២០២១ បានបង្ហាញថា ៖ ក្នុងអំឡុងខែមេសា ខ្ញុំ(ឧកញ៉ា ហេង សៀ)បានស្គាល់ឈ្មោះ យូប៊ី (កញ្ញា មាន ពេជ្ររីតា ) ដែលមានមុខរបរជាអ្នកថតផ្សាយពាណិជ្ជកម្ម ដោយឈ្មោះយូប៊ីបានប្រើប្រាស់លេខទូរស័ព្ទពីរខ្សែ ហើយថតផ្សាយពាណិជ្ជកម្មនិងបង្ហាញម៉ូតឲ្យក្រុមហ៊ុន POUNG STUDIO។
ការទំនាក់ទំនងគ្នានេះ ក្នុងនាមស្ត្រីរកស៊ីផ្លូវភេទ (ស៊ីនំឲ្យលុយ) ខ្ញុំបានទំនាក់ទំនងណាត់ជួបឈ្មោះយូប៊ី ចំនួន ៣លើក ហើយច្រើនជួបគ្នានៅផ្ទះសំណាក់ ជួបម្តងតម្លៃ ២០០ដុល្លារ ទៅ ៣០០ដុល្លារ។ រាល់ការទំនាក់ទំនងតាមប្រព័ន្ធតេឡេក្រាម។ ក្នុងទំនាក់ទំនងរវាងរូបខ្ញុំនិងឈ្មោះយូបីមិនមែនជាសង្សារឬប្រពន្ធចុងទេ គឺស៊ីនំរួចឲ្យលុយចប់។ តែរូបខ្ញុំធ្លាប់បានជួយឧបត្ថម្ភលុយឈ្មោះយ៉ូប៊ីម្តងចំនួន ១៥០០ ដុល្លារ ដោយគេត្រូវការលុយបង់ថ្លៃសាលា។
លុះមកដល់ថ្ងៃទី០៤ ខែឧសភា ឆ្នាំ២០២១ វេលាម៉ោងប្រហែល២និង១២នាទី រូបខ្ញុំបានបើករថយន្តមួយគ្រឿងម៉ាក KIA ពណ៌ទឹកប្រាក់ពាក់ស្លាកលេខភ្នំពេញ 2AC-7258 បើកចេញពីផ្ទះក្នុងគោលបំណងទៅក្រុមហ៊ុនសេង ស្រេងហុង អាហរ័ណនីហរ័ណចំកាត់ ស្រាប់តែនៅពេលធ្វើដំណើរតាមផ្លូវ ក៏ឈ្មោះ យូប៊ី បាន Messages លេខទូរសព្ទចូលមកលេខរបស់ខ្ញុំ ឱ្យរូបខ្ញុំទៅជួប នៅម្តុំសាលាអាស៊ីអឺរ៉ុប សង្កាត់ទឹកល្អកទី២ ខណ្ឌទួលគោក។ នៅពេលដែលខ្ញុំបានបើករថយន្តទៅដល់ក៏បានជួបនាង យូប៊ី រួចហើយនាងក៏បានឡើងជិះរថយន្តជាមួយខ្ញុំ ដោយខ្ញុំជាអ្នកបើក ចំណែកឈ្មោះយូបីអង្គុយពីខាងក្រោយខ្ញុំ ហើយឱ្យខ្ញុំបើកឡានចុះឡើង ២ ទៅបីបក ដើម្បីរង់ចាំមនុស្សស្រីម្នាក់ទៀតជាមិត្ត របស់នាង។
ក្នុងពេលបើករថយន្ត ឈ្មោះយូប៊ី បានឱ្យបាញ់លុយតាម ABA ចូលក្នុងគណនីរបស់នាង ចំនួន ៣០ ដុល្លារ តែខ្ញុំគិតថាតិចពេក ក៏បាញ់លុយបន្ថែមបង្គ្រប់ ៥០ដុល្លារ ក្នុងពេលនោះ ឈ្មោះយូប៊ី ប្រហែលមើលឃើញលេខសម្ងាត់របស់ខ្ញុំ ពេលនោះ នាងក៏ឱ្យខ្ញុំបើករថយន្តអែបកៀន ផ្លូវច្រកតូចលេខ ១៣៨ កែងផ្លូវផ្លូវ២៥៩ សង្កាត់ទឹកល្អក២ ខណ្ឌទួលគោក រួចហើយនាងបានធ្វើសកម្មភាពយកកូនកាំបិតចុងស្រួច យកមកចាក់លើក្បាលពោះខាងស្តាំរបស់ខ្ញុំចំនួន ២កាំបិតបណ្តាលឱ្យរងរបួសធ្ងន់។
ភ្លាមនោះខ្ញុំស្រវ៉ាបើកទ្វារថយន្តរួចចេញ រត់មកខាងក្រៅដើម្បីឱ្យគេជួយ ចំណែកនាងបានបើកទ្វារឡានរួចដើរគេចខ្លួនបាត់ទៅ។ ដោយបានយកទូរស័ព្ទដៃរបស់ខ្ញុំមួយគ្រឿងម៉ាក Iphone 12 ProMax ព៌ណទឹកមាស គេចខ្លួនបាត់។ ចំណែករូបខ្ញុំ ដោយមានស្មារតីរឹងមាំ ក៏បើករថយន្តដោយខ្លួនឯងទៅមន្ទីរពេទ្យព្រះកុសុមៈ រួចក៏បន្តមកសង្គ្រោះបន្ទាន់នៅមន្ទីរពេទ្យរ៉ូយ៉ាល់ភ្នំពេញ ។
ពាក្យបណ្តឹងរបស់ឧកញ៉ា ហេង សៀ មានទាំងស្រុង ដូចខាងក្រោម ៖
ដោយឡែក យោងតាមពាក្យបណ្តឹងចុះថ្ងៃទី១១ ខែឧសភា ឆ្នាំ២០២១ របស់កញ្ញា មាន ពេជ្ររីតា ហៅយូប៊ី អាយុ២០ឆ្នាំ មុខរបរនិស្សិតឆ្នាំទី២ ជាពិធីការិនីទូរទស្សន៍ម៉ាយធីវី និងតារាបង្ហាញម៉ូត បានសម្រេចដាក់ពាក្យប្តឹងឧកញ៉ា ហេង សៀ ពីបទ«ប៉ុនប៉ងរំលោ.ភសេពសន្ថ.វៈ» នៅក្នុងរថយន្ត ។
ករណីប៉ុនប៉ងរំលោ.ភសេពសន្ថ.វៈនេះ បានកើតឡើងកាលពីរសៀលថ្ងៃទី០៤ ខែឧសភា ឆ្នាំ២០២១ នៅក្បែរផ្សារគីឡូលេខ៤ នៅចំណុចផ្លូវលេខ១៣៨ កែងផ្លូវលេខ២៥៩ ភូមិ១០ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។
នៅក្នុងពាក្យបណ្ដឹង កញ្ញា មាន ពេជ្ររីតា បានរៀបរាប់ថា រូបនាងបានស្គាល់ឧកញ៉ា ហេង សៀ ក្នុងពិធីសម្ភោធហាងរបស់ឧកញ៉ារូបនេះ ហើយពេលនោះក៏បានឃើញ និងស្គាល់រូបនាង ហើយក៏បានធ្វើការទំនាក់ទំនង តាមរយៈប្រព័ន្ធតេលេក្រាមមកនាងជាបន្តបន្ទាប់ ។ នាងរៀបរាប់ក្នុងបណ្ដឹងទៀតថា ក្នុងពេលទំនាក់ទំនងនាង ឧកញ៉ា ហេង សៀ បានផ្ញើលុយចំនួន៥ដងឲ្យនាង តែនាងបានបដិសេធថា នាងមិនយកនោះទេ កុំផ្ញើមកនាងអី ព្រោះនាងមានលុយចាយគ្រប់គ្រាន់ហើយ។ ប៉ុន្តែឧកញ៉ារូបនេះ នៅតែផ្ញើលុយជាបន្តបន្ទាប់ទៀត ។
បន្ថែមពីលើនេះ កញ្ញា មាន ពេជ្ររីតា បានឲ្យដឹងទៀតថា ឧកញ៉ា ហេង សៀ បានប្រើពាក្យលួងលោមចង់ជួប និងស្គាល់រូបនាង តែនាងបដិសេធមិនព្រមជួប លុះត្រាទាក់ទងនឹងការងារទើបនាងព្រមជួប ។ កញ្ញា មាន ពេជ្ររីតា បានរៀបរាប់បន្តថា ឧកញ៉ា ហេង សៀ នៅតែបន្តរំខានរូបនាង រហូតដល់មានការផ្ញើរូបអាសអាភាសមកនាង តែក្រោយមកឧកញ៉ារូបនេះ បានលុបចោលដោយខ្លួនឯងវិញ ។ រហូតដល់ថ្ងៃកើតហេតុ ប្រហែលជាថ្ងៃទី៤ ខែឧសភា ឧកញ៉ាខាងលើនេះ បានទូរស័ព្ទទៅនាងថា «ចង់ជួបហើយចង់ឲ្យអីវ៉ាន់មួយចំនួនមកនាង ដើម្បីយកទៅចែកអំណោយឲ្យប្រជាពលរដ្ឋ ដែលទទួលរងគ្រោះដោយសារជំងឺកូវីដ-១៩» ។
បើតាមកញ្ញា មាន ពេជ្ររីតា នៅថ្ងៃនោះឧកញ៉ា ហេង សៀ បានចាំនាងនៅក្បែរផ្សារគីឡូម៉ែត្រលេខ៤ រួចក៏បង្ខំនាងឲ្យចូលក្នុងឡាន ដោយថា មានរឿងការងារត្រូវនិយាយគ្នា។ បន្ទាប់មកនាងក៏ចូលក្នុងឡាន តែត្រូវបានឧកញ៉ារូបនេះ និយាយពាក្យអាសអាភាសដាក់រូបនាង និងយកដៃលូកស្ទាបអង្អែលភ្លៅ និងប្រដាប់ភេទនាងផងដែរ ។
ពិធីការនីនៅស្ថានីយ៍ទូរទស្សន៍ ក៏បាននិយាយក្នុងពាក្យបណ្ដឹងបន្តថា ឧកញ៉ាខាងលើនេះ ចង់យករូបនាងទៅផ្ទះសំណាក់ តែនាងបដិសេធ និងថា នាងនឹងលោតចុះពីលើឡាន ។ ឧកញ៉ារូបនេះ និយាយថា ខ្លួនមានកាំភ្លើង។ តែយ៉ាងណាក៏ដោយ កញ្ញា មាន ពេជ្ររីតា បានខិតខំរើបំរាស់ និងច្រានដៃរបស់ឧកញ៉ា ហេង សៀ ចេញ ហើយដៃរបស់នាងមិនមានកាន់របស់អ្វីទេ គឺដៃទទេសុទ្ធ ហើយនាងក៏បានបើកទ្វារឡាន រត់ចេញមកក្រៅ និងបានត្រឡប់ទៅផ្ទះវិញ ។ ប្រសិននាងខ្ញុំមិនអាចបើកទ្វារឡានចេញបានទេ គាត់នឹងធ្វើការរំលោ.ភសេពសន្ថ.វៈនៅក្នុងឡាន ឬដឹកនាងខ្ញុំយកទៅផ្ទះសំណាក់តែម្ដង ពីព្រោះនាងខ្ញុំបាន ភ័យតត់ស្លុត ខ្លាចអាចកាត់សម្លាប់ដោយប្រើប្រាស់កាំភ្លើងមិនហ៊ានតដៃ ឬរើបម្រាស់នោះឡើយ ។ ហើយ នាងខ្ញុំមិនហ៊ានប្រាប់ម្តាយឱ្យដឹងរឿងនេះទេ ព្រោះមិនចង់ឱ្យគាត់ពិបាកចិត្ត ។
ជុំវិញការដាក់ពាក្យបណ្តឹងនេះ កញ្ញា មាន ពេជ្ររីតា បានប្តឹងនិងទាមទារសំណងមួយចំនួនដូចតទៅ ៖
១៖ ប្តឹងឧកញ៉ា ពីបទ «ប៉ុនប៉ងរំលោ.ភសេពសន្ថ.វៈ» ដោយមានស្ថានទម្ងន់
២៖ ទាមទារសំណង់ជំងឺចិត្ត ចំនួនទឹកប្រាក់ ១០ម៉ឺនដុល្លារ
៣៖ ទាមទារការខាតបង់ និងខូចខាតពេលវេលា និងសេវាផ្លូវច្បាប់ចំនួន ១ម៉ឺនដុល្លារ ។
ជុំវិញរឿងក្តីប្តឹងចោទប្រកាន់ដាក់គ្នាទៅវិញទៅមកខាងលើនេះ មានតែរង់ចាំមើលតុលាការ សាលាដំបូងរាជធានីភ្នំពេញទេ តើកាត់ក្ដីយ៉ាងណាចំពោះពាក្យបណ្ដឹងភាគីទាំងសងខាង ? ស្របពេលដែលមហាជនស្ទើរតែទូទាំងប្រទេស កំពុងតាមដានយ៉ាងយកចិត្តទុកដាក់ លើរឿងនេះ ៕
ពាក្យបណ្តឹងរបស់កញ្ញា មាន ពេជ្ររីតា មានទាំងស្រុង ដូចខាងក្រោម ៖
ចែករំលែកព័តមាននេះ