រាជធានីភ្នំពេញ ៖ បុរសម្នាក់ត្រូវរថយន្តកុងតឺន័រកៀរម៉ូតូដួលចូលក្រោមកង់រថយន្តកុងតឺន័រកិនខ្ទេចខ្លួនចេញពោះវៀន និងគ្រឿងក្នុងចេញមកក្រៅ ស្លាប់ភ្លាមៗនៅនឹងកន្លែង ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៩ និង១០នាទីយប់ ថ្ងៃទី២៨ តុលា ២០១៥ នៅចំណុចមុខហាងលក់-ដូរកង់រថយន្ត៣៨ ជិតច្រកចូល បុរី ហ្គ្រេន ភ្នំពេញ តាមបណ្តោយលេខ៥៩៨ ហៅផ្លូវ ជា សុផារ៉ា ស្ថិតក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ។
លោក ហ៊ុយ ហ៊ាន មេប៉ុស្តិ៍នគរបាលទួលសង្កែបានឲ្យដឹងថា ជនរងគ្រោះដែលត្រូវរថយន្តកិនស្លាប់នៅមិនទាន់បានស្គាល់អត្តសញ្ញាណនៅឡើយទេ សមត្ថកិច្ចកំពុងតែព្យាយាមស្វែងរកទំនាក់ទៅក្រុមគ្រួសារជនរងគ្រោះ ។ ចំណែកអ្នកបើកបររថយន្តកុងតឺន័រឈ្មោះ រុន សុង ភេទប្រុស អាយុ៤២ឆ្នាំ ។
ប្រភពនៅកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូម្នាក់ឯងម៉ាក វ៉េវ អាល់ហ្វា ពណ៌ខ្មៅ ពាក់ស្លាកលេខ ភ្នំពេញ 1CB-0783 បើកតាមបណ្ដោយផ្លូវលេខ៥៩៨ ក្នុងទិសដៅពីជើងទៅត្បូង ខណៈមកដល់ចំណុចកើតហេតុខាងលើស្រាប់តែមានរថយន្តកុងតឺន័រ១គ្រឿងរបស់ក្រុមហុនដឹកជញ្ជូន ស៊ីថប បើកយ៉ាងលឿនមកពីក្រោយកៀរម៉ូតូនោះដួលបណ្តាលឲ្យជនរងគ្រោះចូលទៅក្រោមកង់រថយន្តកុងតឺន័រកិនខ្ទេចខ្ទីខ្លួនប្រាណ និងក្បាល ព្រមទាំងធ្លាយខួរ និងចេញគ្រឿងក្នុងមកក្រៅស្លាប់ភ្លាមនៅកន្លែងកើតហេតុ ។ ភ្លាមៗនោះរថយន្តកុងតឺន័រមិនបានឈប់ទេ គឺព្យាយាមបើករត់គេចខ្លួន តែត្រូវប្រជាពលរដ្ឋ និងសមត្ថកិច្ចចេញតាម ហើយស្ទាក់ចាប់បាននៅខាងលិចរង្វង់មូលខាំកូស៊ីធី ស្ថិតតាមបណ្តោយផ្លូវម៉ុងឫទ្ធី ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
ខណៈពេលដែលប្រជាពលរដ្ឋ និងសមត្ថកិច្ចបានឃាត់រថយន្តកុងតឺន័រនេះបានហើយ អ្នកបើកបររថយន្តកុងតឺន័របានធ្វើការបដិសេធថា គាត់មិនបានកៀរ និងកិនមនុស្សស្លាប់ទេ ទោះបីជានៅជាប់កង់ឡានខាងក្រោយផ្នែកខាងស្តាំមានជាប់ស្នាមខួរ និងឈាម ប៉ុន្តែត្រូវបានគេយកផេះទៅលប់ពីលើក៏ដោយ ។
ក្រោយពេលកើតហេតុ សមត្ថកិច្ចមូលដ្ឋាន សហការជាមួយសមត្ថកិច្ចចរាចរណ៍បានធ្វើការវាស់វែង និងជជែកវែកញែកគ្នាជាមួយអ្នកបើកបររថយន្តនៅឡើយ ដោយសារអ្នកបើកបរបដិសេធថាមិនបានបើកកៀរ ហើយកិនមនុស្សស្លាប់បែបនេះ ។ ចំណែកសពជនរងគ្រោះសមត្ថកិច្ចកំពុងតែធ្វើការស្រាវជ្រាវរកសាច់ញាតិដើម្បីប្រគល់ឲ្យយកទៅធ្វើបុណ្យតាមប្រពៃណី ។
ប្រជាពលរដ្ឋដែលឃើញហេតុការណ៍នេះបានធ្វើការរិះគន់ថា ប៉ុន្តែទោះជាយ៉ាងណាដោយសារមានស្នាមឈាម និងខួរជាប់រថយន្ត ដោយបានយកផេះលុបបំបាត់បែបនេះ សមត្ថកិច្ចគួរតែយកទៅកាន់ការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរ និងបន្តការស្រាវជ្រាវបន្ថែមទៀត ដើម្បីកាត់ទោសតាមនិតិវិធីច្បាប់ មិនគួរណាជជែកវែកញែកគ្នាតាមផ្លូវបែបនេះទេ នេះប្រហែលជាអាចនិយាយត្រូវរ៉ូវគ្នាផងក៏មិនដឹងបានជានៅជជែកគ្នាបែបនេះ រង់ចាំស្ងាត់បន្តិចចាំលែងហើយមើលទៅ ។
សមត្ថកិច្ចក៏បានធ្វើការអំពាវនាវដល់បងប្អូនប្រជាពលរដ្ឋដែលបានបាត់សមាជិកជិះម៉ូតូដូចខាងលើសូមមកទំនាក់ទំនងជាមួយប៉ុស្តិ៍នគរបាលទួលសង្កែដើម្បីយកសពទៅធ្វើបុណ្យតាមប្រពៃណី ៕
ចែករំលែកព័តមាននេះ