រាជធានីភ្នំពេញ ៖ នៅក្នុងដំណាក់កាលនៃការបិទខ្ទប់តំបន់ដោយសារតែការរីករាលដាលនៃជំងឺកូវីដ១៩ បានតម្រូវឱ្យបុគ្គលិកនៅតាមស្ថាប័នក្រុមហ៊ុនជាច្រើន ធ្វើការងារពីផ្ទះជំនួសវិញព្រោះតែមិនអាចធ្វើដំណើរទៅបំពេញការងារនៅការិយាល័យបានដូចមុនទៀត។ការបំពេញការងាពីផ្ទះ ត្រូវបានថៅកែក្រុមហ៊ុនមួយចំនួនលើកឡើងថាមិនមានប្រសិទ្ធភាពដូចការបំពេញការងារនៅក្នុងការិយាល័យឡើយ ។
លោកគុយ វ៉ាតប្រធានក្រុមប្រឹក្សាភិបាលនៃក្រុមហ៊ុនវីត្រាស់ ក្រុមហ៊ុន Century 21 Cambodia និងក្រុមហ៊ុនមួយចំនួនបានឱ្យដឹងថា នៅក្នុងដំណាក់កាលនៃការរីករាលដាលនៃជំងឺកូវីដ១៩បុគ្គលិកការិយាល័យជាច្រើនត្រូវបំពេញការងារពីផ្ទះដោយសារតែមិនជួបជុំមិនអាចធ្វើដំណើរ ហើយការបំពេញការងារពីផ្ទះពីចំងាយនេះ វាមិនអាចមានប្រសិទ្ធភាពដូចការបំពេញ ការងារនៅក្នុងការិយាល័យនោះឡើយ ។
លោកបន្តថា ម្ចាស់ក្រុមហ៊ុនហ៊ានចំណាយថ្លៃជួលការិយាល័យមួយខែរាប់ពាន់ដុល្លារនិងសេវាកម្មផ្សេងៗទៀតដើម្បីឱ្យបុគ្គលិកមកធ្វើការគឺដើម្បីប្រសិទ្ធភាពការងារ ខណៈការបំពេញការងារពីចំងាយរបស់បុគ្គលិកថៅកែក្រុមហ៊ុនមិនត្រូវចំណាយនោះទេ ។ លោកថា៖«ប្រទេសកំពុងអភិវឌ្ឍមិនអាចឱ្យបុគ្គលិកធ្វើការពីចំងាយឬតាមអនឡាញហើយមានប្រសិទ្ធភាពដូចក្នុងការិយាល័យបាននោះទេ ។ តែបើសិនជាប្រទេសអភិវឌ្ឍនិងរីកចម្រើនជាច្រើនគេអាចធ្វើបានសម្រាប់ការលក់តាមអនឡាញ ឬចុះកុងត្រាតាមអនឡាញជាដើម» ។
លោកបន្ថែមថា មិនថាតែប្រទេសកម្ពុជានោះទេដែលការបំពេញការងារតាមអនឡាញមិនមានប្រសិទ្ធភាពដូចការបំពេញ ការិយាល័យការងារក្នុងការិយាល័ហ ប្រទេសជិតខាងកម្ពុជាក៏មិនទាន់អាចមានសមត្ថភាពក្នុងការបំបេញការងារពីចម្ងាយឱ្យមានប្រសិទ្ធភាពដូចក្នុងការិយាល័យនោះទេ ។ លោកថា៖«ទោះបីជាកម្ពុជាយើងមានបច្ចេកវិទ្យារីកចម្រើនយ៉ាងណាក្ដី តែយើងមិនទាន់ដល់កម្រិតដែលអាចធ្វើការដោយមិនមានការិយាល័យនោះដែរ »
លោកឌឹត ចណ្ណាជាប្រធានក្រុមហ៊ុនអចលនទ្រព្យមួយក៏បានឱ្យដឹងផងដែរថា ក្នុងពេលមានវិបត្តិកូវីដ១៩ និងមានការបិទខ្ទប់ ដែលតម្រូវឱ្យបុគ្គលិកធ្វើការពីផ្ទះមកនោះ ការជួលការិយាល័យថ្មីៗមិនមានមានតម្រូវការនោះទេ តែសកម្មភាពនៃការជួលការិយាល័យថ្មីៗនឹងមានតម្រូវការឡើងវិញក្រោយពេលវិបត្តិកូវីដ១៩បានបញ្ចប់ ពីព្រោះថាកម្ពុជានៅតែត្រូវការ ការិយាល័យសម្រាប់បុគ្គលិកបំពេញការងារដដែល ។
លោកបន្តថា ការធ្វើការនៅការិយាល័យ វានឹងជួយឱ្យគុណភាពការងារកាន់តែមានប្រសិទ្ធភាព ដោយសារតែបុគ្គលិកមានបញ្ហាត្រង់ចំណុចណាមួយពួកគេអាចដោះស្រាយបានភ្លាមនៅក្នុងការិយាល័យ ហើយធ្វើឱ្យបុគ្គលិកកាន់តែមានភាពស្និទ្ធស្នាលគ្នាថែមទៀតផងដែរ ។
សូមបញ្ជាក់ថា នៅក្នុងដំណាក់នៃការរីករាលដាលនៃជំងឺកូវីដ១៩ និងឈានដល់ការបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្ដាល រាជរដ្ឋាភិបាលបានជំរុញឱ្យក្រុមហ៊ុនសហគ្រាសកាត់បន្ថយការងារបុគ្គលិកកម្មករឱ្យនៅតិចបំផុត ដោយតម្រូវឱ្យធ្វើការឆ្លាស់វេន ឬតម្រូវឱ្យកម្មករ បុគ្គលិកបំពេញត្រឹម២ភាគរយប៉ុណ្ណោះប្រចាំការនៅកន្លែងការងារនិងក្រៅពីនោះអាចធ្វើការតាមអនឡាញបាន ៕
ចែករំលែកព័តមាននេះ