រាជធានីភ្នំពេញ ៖ សមត្ថកិច្ចចម្រុះនៃស្នងការនគរបាលរាជធានីភ្នំពេញ កាលពីព្រឹកថ្ងៃទី១២ ឧសភា ឆ្នាំ២០២១ បានចុះទៅសហការជាមួយនគរបាលខណ្ឌទួលគោក ដើម្បីស្រាវជ្រាវជុំវិញករណីចោរគាស់ផ្ទះមក មុំ មករា…
រាជធានីភ្នំពេញ ៖ សមត្ថកិច្ចចម្រុះនៃស្នងការនគរបាលរាជធានីភ្នំពេញ កាលពីព្រឹកថ្ងៃទី១២ ឧសភា ឆ្នាំ២០២១ បានចុះទៅសហការជាមួយនគរបាលខណ្ឌទួលគោក ដើម្បីស្រាវជ្រាវជុំវិញករណីចោរគាស់ផ្ទះមក មុំ មករា ដែលជាតំណាងចែកចាយធំក្រុមហ៊ុន DW សាខាបឹងសាឡាង លក់ដុំ និងរាយ ឡេមុខ និងឡេខ្លួន ដែលនាំចូលពីប្រទេសថៃ និងកូរ៉េ ។
ការចុះស្រាវជ្រាវ ជុំវិញករណីនេះ ត្រូវបានគេដឹងថា បន្ទាប់ពីជនរងគ្រោះឈ្មោះ ហេង មករា ភេទស្រី អាយុ៣២ឆ្នាំ ដែលគេស្គាល់ថា មករា មុំ ដែលជាតំណាងចែកចាយធំក្រុមហ៊ុន DW សាខាបឹងសាឡាង បានឡាយបង្ហោះវីដេអូពីមន្ទីរពេទ្យកូវីដ យំទួញសោក រៀបចំថា ផ្ទះរបស់ខ្លួនត្រូវបានក្រុមចោរគាស់ទូរដែកយកប្រាក់ប្រមាណជាង៥០ម៉ឺនដុល្លារ ខណៈពេលដែលគាត់បានចាក់សោផ្ទះទៅព្យាបាលនៅមជ្ឍមណ្ឌម៉ូឌែន២ក្នុងសង្កាត់ចក្រអង្រែ ។ ផ្ទះដែលអះអាងថា ចោរគាស់នោះផ្ទះលេខ៣៥B ផ្លូវលេខ២២៨ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមព័ត៌មានពីសមត្ថកិច្ចបានអោយដឹងថា ផ្ទះដែលត្រូវបានចោរគាស់មានសមាជិកចំនួន៧នាក់ មានវិជ្ជមានកូវីដ១៩ ហើយត្រូវបានបញ្ជូនទៅព្យាបាលទាំងអស់ ដោយចាក់សោរផ្ទះទុកចោល ។
ទាក់ទិនករណីនេះ គេពុំដឹងថា ក្រុមចោរគាស់ផ្ទះមានគ្នាប៉ុន្មាននាក់ហើយ ធ្វើសកម្មភាពតាំងពីពេលណានោះទេ ។ តាមនគរបាលមូលដ្ឋាន បានអោយដឹងថា ហេតុការណ៍ចោរគាស់ផ្ទះ បង្កអោយមានការភ្ញាក់ផ្អើលកាលពីល្ងាចថ្ងៃទី១១ ខែឧសភា ឆ្នាំ២០២១ ។
តាមព័ត៌មានអោយដឹងថា នៅវេលាម៉ោងប្រមាណ៣និង៣០នាទីទៀបភ្លឺ ថ្ងៃទី១១ ខែឧសភា ឆ្នាំ២០២១ មានប្រជាពលរដ្ឋហាត់ប្រាណបានធ្វើឆ្លងកាត់ក៏បានប្រទះឃើញ ផ្ទះនោះចំហរទ្វារ តែពុំមាននណាម្នាក់ចាប់អារម្មណ៍ ។ លុះនៅវេលាម៉ោងប្រមាណ១រសៀល ជនសង្ស័យម្នាក់បានជិះម៉ូតូមួយគ្រឿងមកឈប់មុខផ្ទះ បើកទ្វារចូលទៅក្នុងមួយសន្ទុះក្រោយមកមានម៉ូតូកង់៣ មួយគ្រឿងបានមកដឹកទំនិញសង្ស័យថា មកដឹកទូរដែកចេញ តែពុំមាននណាចាប់អារម្មណ៍ ដោយអ្នកជិតខាងស្មានតែម្ចាស់អោយគេមកដឹកទំនិញដូចសព្វដង ។
តាមការរៀបរាប់របស់ស្ត្រី ជាម្ចាស់ផ្ទះរងគ្រោះបានឡាយបង្ហោះវីដេអូលើបណ្តាញសង្គមអោយដឹងថា ផ្ទះរបស់គាត់ត្រូវបានចោរចូលគាស់យកទូរដែកទង្ងន់១០០ គីឡូក្រាមទៅបាត់ដោយយកប្រាក់ គ្រឿងអលង្ការពេជ្រ កូនជ្រូក សរុបអស់ជាង៥០ម៉ឺនដុល្លារ និងប្លង់ផ្ទះ៣កន្លែង ប្លង់ដី៥កន្លែងយកទៅទាំងអស់ ។
តាមការឡាយនោះស្ត្រីរងគ្រោះ ក៏បានទទួចស្នើរសុំដល់សមត្ថកិច្ច មេត្តាជួយស្រាវជ្រាយរកជនសង្ស័យ ទើបបង្កអោយមានការភ្ញាក់ផ្អើល ។ បន្ទាប់ពីភ្ញាក់ផ្អើលនៅយប់ ថ្ងៃទី១១ ខែឧសភា ក្រុមគ្រួសារ ជនរងគ្រោះក៏បានទៅដេកចាំនៅមុខផ្ទះ ដើម្បីរង់ចាំនគរបាលចុះទៅស្រាវជ្រាវ ។
តាមព័ត៌មានអោយដឹងថា នៅព្រឹកថ្ងៃទី១២ ខែឧសភា នគរបាលក៏បានហៅមន្ត្រីសាលាខណ្ឌទួលគោក ចុះទៅបាញ់ថ្នាំ ហើយបានចូលទៅត្រួតពិនិត្យ ផ្ទះកើតហេតុ ដើម្បីធ្វើការស្រាយជ្រាវ រកក្រយ៉ៅដៃជនសង្ស័យ។ អ្វីដែលធ្វើអោយមានការចាប់អារម្មណ៍ ដុំផ្ទុករូបភាពកាមេរ៉ាសុវត្ថិភាពរបស់ជនរងគ្រោះត្រូវបានជនសង្ស័យដោះយកទៅបាត់ ។
ទោះបីជាយ៉ាងណា សមត្ថកិច្ចក៏នៅតែបន្តព្យាយាម ដើម្បីស្រាវជ្រារកជនសង្ស័យមកកាត់ទោសតាមច្បាប់ ។ គួរបញ្ជាក់ថាផ្ទះ ដែលត្រូវចោរគាស់នោះ មានម្ចាស់ឈ្មោះ ហេង មករា ភេទស្រី អាយុ៣២ឆ្នាំ ដែលគេស្គាល់ថា មករា មុំ ដែលជាតំណាងចែកចាយធំក្រុមហ៊ុន DW សាខាបឹងសាឡាង លក់ដុំ និងរាយ ឡេលាបមុខខ្លួន ដែលនាំចូលពីប្រទេសថៃ និងកូរ៉េ និងមានការឡាយលក់តាមអនឡាញយ៉ាងល្បីឈ្មោះផងដែរ៕
ចែករំលែកព័តមាននេះ