រាជធានីភ្នំពេញ ៖ រហូតមកទល់ពេលនេះ រឿងក្តីប្តឹងប្តល់ដែលបានកើតឡើងទៅលើពិធីការិនីនាង មាន ពេជ្ររីតា ពីសំណាក់ឧកញ៉ាមួយរូប កំពុងតែកក្រើកយ៉ាងខ្លាំងពេញបណ្តាញសង្គមហ្វេសប៊ុក ខណៈពេលដែលមានអ្នកសិល្បៈកាន់តែច្រើនបានបង្ហោះសារស្វែងរកយុត្តិធម៌ដល់តារារូបនេះ។ យ៉ាងណា…
រាជធានីភ្នំពេញ ៖ រហូតមកទល់ពេលនេះ រឿងក្តីប្តឹងប្តល់ដែលបានកើតឡើងទៅលើពិធីការិនីនាង មាន ពេជ្ររីតា ពីសំណាក់ឧកញ៉ាមួយរូប កំពុងតែកក្រើកយ៉ាងខ្លាំងពេញបណ្តាញសង្គមហ្វេសប៊ុក ខណៈពេលដែលមានអ្នកសិល្បៈកាន់តែច្រើនបានបង្ហោះសារស្វែងរកយុត្តិធម៌ដល់តារារូបនេះ។
យ៉ាងណា គេនៅមិនទាន់បានដឹងច្បាស់ស៊ីជម្រៅពីរឿងហេតុពិតប្រាកដែលនាំអោយឧកញ៉ាសម្បូរទ្រព្យមួយរូប បានសម្រេចប្តឹងចោទទៅលើអតីតបេក្ខនារី Miss Grand Cambodia2020 នៅឡើយទេ។ ប៉ុន្តែអ្នកសិល្បៈជាច្រើនយល់ថា រឿងហេតុនេះបានកើតឡើងដោយសារភាពអយុត្តិធម៌ចំពោះ មាន ពេជ្ររីតា ដោយយោងតាមអ្វីដែលនាងបាននិយាយតាមរយៈវីដេអូឃ្លីបមួយ។
អ្នកសិល្បៈជាច្រើនបានបង្ហោះសារតាមហ្វេសប៊ុករៀងៗគ្នាថា «គេស្ទាបខ្ញុំ» «ខ្ញុំខ្ពើមខ្លួនឯងណាស់ម៉ាក់» guys, this is painful.។ សម្លេងស្រែកទ្រហោយំរៀបរាប់ប្រាប់ម្តាយដ៏សែនរន្ធត់ ប្រទេសមានច្បាប់យុត្តិធម៌នៅតែមានសំរាប់ Yubi (ឈ្មោះក្រៅរបស់ មាន ពេជ្ររីតា )។ «គេស្ទាបខ្ញុំ» «ខ្ញុំខ្ពើមខ្លួនឯង» ជាពាក្យដែលស្រែកចេញពីមាត់មនុស្សស្រីម្នាក់ដែលកំពុងតែយំ ព្រោះបានជួបរឿងឈឺចាប់ដែលមិនគួរនឹងកើតឡើង តើអាចរួមគ្នារកយុត្តិធម៌បានទេ? តើអាចចូលរួមចែករំលែកពីរឿងនេះបានទេ?។ ច្បាប់នឹងមិនដោះលែងមនុស្សអាក្រក់ទេ ហើយរឹតតែជឿថា អ្នកទាំងអស់គ្នាច្បាស់ជាអាចចែករំលែកពីរឿងនេះ ដើម្បីអោយសំលេងនៃការដង្ហោយរកយុត្តិធម៌មួយនេះ កាន់តែលឺខ្លាំងជាងនេះ។
ដោយឡែកសម្រាប់អ្នកសិល្បៈខ្លះក៏បានបង្ហោះសារដោយភ្ជាប់ការលើកទឹកចិត្ត និងការគាំទ្រដល់តារារូបនេះ អោយមានភាពរឹងមាំ ហើយយុត្តិធម៌នឹងកើតមានចំពោះនាង។
ដោយឡែកលោក ហេង ឡុង ប្រធានក្រុមប្រឹក្សាភិបាលសមាគមសិល្បករខ្មែរ ក៏បានបង្ហោះសារតាមគណនេយ្យហ្វេសប៊ុករបស់លោកថា ចំពោះរឿងហេតុខាងលើនេះ លោកមិនដឹងយ៉ាងណាឡើយ ប៉ុន្តែរូបលោកបានត្រៀមរួចជាស្រេចសម្រាប់ផ្តល់មេធាវីជួយ មាន ពេជ្ររីតា ប្រសិនបើនាងត្រូវការ។
ជាការកត់សម្គាល់ តំណាងអយ្យការ កញ្ញា សុង ឆវ័ន្ត ព្រះរាជអាជ្ញារងអមសាលាដំបូងរាជធានីភ្នំពេញ កាលពីព្រឹកថ្ងៃទី១១ ខែឧសភា ឆ្នាំ២០២១ បានសម្រេចធ្វើការចោទប្រកាន់ស្ត្រីម្នាក់ឈ្មោះ មាន ពេជ្រ រីតា ហៅយូប៊ី អាយុ២០ឆ្នាំ ពីបទលួចមានស្ថានទម្ងន់ទោស (លួចទូរស័ព្ទដៃ ដោយប្រើអំពើហិង្សា បណ្តាលឲ្យរងរបួសដល់ជនរងគ្រោះ) ។ ក្រោយពីតំណាងអយ្យការ បានសម្រេចធ្វើការចោទប្រកាន់ជាផ្លូវការហើយនោះ សំណុំរឿងបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
តាមប្រភពព័ត៌មានបានឲ្យដឹងថា កាលពីវេលាម៉ោងជាង៣រសៀលថ្ងៃទី៤ ខែឧសភា ឆ្នាំ២០២១ ជនសង្ស័យឈ្មោះ មាន ពេជ្រ រីតា ហៅយូប៊ី បានធ្វើសកម្មភាពលួចយកទូរស័ព្ទដៃម៉ាកអាយហ្វូន១១ ប្រូម៉េក ពណ៌ខ្មៅ របស់លោកឧកញ៉ាម្នាក់ នៅចំណុចផ្លូវលេខ១៣៨ កែងផ្លូវលេខ២៥៩ ភូមិ១០ សង្កាត់ទឹកល្អក់ទី២ ខណ្ឌទួលគោក ។ ពេលនោះជនរងគ្រោះឃើញក៏មកឆក់យកទូរស័ព្ទមកវិញ ទើបមានការប្រវាយប្រតប់គ្នា ធ្វើឱ្យជនសង្ស័យទាញបានកាំបិតចុងស្រួចចាក់ទៅលើលោកឧកញ៉ានោះ២កាំបិតត្រូវត្រង់ពោះ បណ្តាលឲ្យរងរបួសជាទម្ងន់ នឹងបានបញ្ជូនទៅសង្គ្រោះនៅមន្ទីរពេទ្យ ។ ក្រោយកើតហេតុ ទើបបានសមត្ថកិច្ចឈានទៅឃាត់ខ្លួនជនសង្ស័យ និងបានកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ តាមនីតិវិធី ។
ដោយឡែកពាក់ព័ន្ធការចោទប្រកាន់ខាងលើនេះដែរ នាង មាន ពេជ្ររីតា ក៏បានសម្រេចចិត្តដាក់ពាក្យបណ្តឹងប្តឹងបកទៅកាន់ឧកញ៉ាម្នាក់នោះវិញដែរ។
ហើយយោងតាមបណ្តឹងរបស់ដែលនាង មាន ពេជ្ររីតា បានដាក់ប្តឹងបកមកវិញនោះ គឺ ៖ ចោទប្រកាន់លួចទូរស័ព្ទ! ពិធីការិនី MyTV ប្តឹងបក ឧកញ៉ា ហេង សៀ ពីបទប៉ុនប៉ងរំលោភសេពសន្ថវៈ ក្នុងរថយន្ត ។
ចែករំលែកព័តមាននេះ