ខេត្តស្វាយរៀង ៖ កាលវេលាព្រឹកថ្ងៃទី២៣ តុលា ២០១៥ កន្លងមក លោក ហុង ឡុង ប្រធានខុទ្ទកាល័យក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធីបើកបវេសនកាលនៅសាលាអនុវិទ្យាល័យ និងបឋមសិក្សាស្វាយតឿ ខេត្តស្វាយរៀង ដោយមានការអញ្ជើញចូលរួមពីសមាជិក សមាជិកា សហភាព សហព័ន្ធយុវជនកម្ពុជាវិស័យទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច សមាជិកក្រុមប្រឹក្សាក្រុងស្វាយរៀង, លោក លោកស្រី មន្ត្រីការិយាល័យអប់រំក្រុងស្វាយរៀង ក្រុមប្រឹក្សាសង្កាត់ស្វាយតឿ និងតំណាងក្រុមហ៊ុនអ៊ីនធើរណេត ឌីជី សរុបចំនួន៣៤០នាក់ ។
ក្នុងកម្មវិធីនោះ សិស្សានុសិស្សដែលបានចូលរួមមានចំនួន២៤១នាក់ ក្នុងម្នាក់ទទួលបានសៀវភៅ១០ក្បាល, ប៊ិច២ដើម, ខ្មៅដៃ១ដើម, បន្ទាត់១ដើម និងថវិកា៥.០០០រៀល ។ រីឯលោកគ្រូ អ្នកគ្រូ ចំនួន២០នាក់ ក្នុងម្នាក់ៗទទួលបានថវិកា៣០.០០០រៀល និងអាណាព្យាបាលសិស្សានុសិស្ស១៩នាក់ ម្នាក់ៗទទួលបានថវិកា១០.០០០រៀល ។
ក្នុងចំណោមសិស្សានុសិស្សសរុបទាំងអស់ ឌីជីក៏បានរួមចំណែកជួយដល់ចំនួន២០នាក់ ស្មើនឹង២០កញ្ចប់ផងដែរ ។ ក្នុងឱកាសនោះ លោកបានលើកឡើងផងដែរថា វិស័យអប់រំ គឺជាកត្តាដ៏សំខាន់មួយសម្រាប់មនុស្សគ្រប់រូប ហើយយុវជនគ្រប់រូប ក៏មានសិទ្ធិទទួលបានការអប់រំស្មើៗគ្នាដែរ ។ លោកក៏បានសំណូមពរឱ្យមាតាបិតាសិស្សទាំងអស់ ត្រូវនាំកូនទៅចុះឈ្មោះចូលរៀនឱ្យបានគ្រប់ៗគ្នា ។
ចែករំលែកព័តមាននេះ