រាជធានីភ្នំពេញ ៖ ថ្មីបន្តទៀត ប្រមុខក្រសួងការពារជាតិកម្ពុជាបានបន្តអំពាវនាវដល់កំលាំងកងទ័ព និងប្រជាពលរដ្ឋមានការប្រុងប្រយ័ត្នខ្ពស់ពីការឆ្លងជំងឺកូវី១៩ ទោះបីជាវ៉ាក់សាំងមកបន្តបន្ទាប់ក្តី ។
យោងតាមបណ្តាញសង្គមហ្វេសប៊ុក នៅថ្ងៃទី១២ ខែឧសភា ឆ្នាំ២០២១ ប្រមុខក្រសួងការពារជាតិ សម្តេចពិជ័យសេនា ទៀ បាញ់ អំពាវនាវសូមបងប្អូនកងទ័ពក៏ដូចជា ប្រជាពលរដ្ឋទាំងអស់បន្តរក្សាការប្រុងប្រយ័ត្នខ្ពស់ និងអនុវត្តឱ្យបានម៉ឺងម៉ាត់បំផុតនូវវិធានការ «៣ការពារ ៣កុំ» ទោះបីជាវ៉ាក់សាំងការពារជំងឺកូវីដ-១៩ បានមកដល់ជាបន្តបន្ទាប់ ហើយយុទ្ធនាការនៃការចាក់វ៉ាក់សាំងរបស់យើងដំណើរការបានយ៉ាងល្អទៅតាមផែនការក៏ដោយ ។
សូមជ្រាបថា ការអំពាវនាវរបស់ប្រមុខក្រសួងការពារជាតិបន្ទាប់ពីរាជរដ្ឋាភិបាលបានដាក់យុទ្ធសាស្ត្រដោយប្រើប្រាស់កំលាំងកងទ័ពធ្វើការចាក់វ៉ាក់សាំងជូនប្រជាពលរដ្ឋនៅក្នុងរាជធានីភ្នំពេញឲ្យអស់ ដើម្បីធ្វើការទប់ស្កាត់ជំងឺកូវីដ១៩ ឈានដល់លុបបំបាត់ព្រឹត្តិការណ៍សហគមន៍២០កុម្ភៈ ។
រាជរាជរដ្ឋាភិបាលបានប្រើកំលាំងកងទ័ពរាប់ពាន់នាក់របស់ក្រសួងការពារជាតិក្នុងចាក់វ៉ាក់សាំងជូនពលរដ្ឋនៅក្នុងរាជធានីភ្នំពេញ ។ កាលពីព្រឹកថ្ងៃទី១១ ឧសភា ឆ្នាំ២០២១ វ៉ាក់សាំងស៊ីណូវ៉ាក់ (Sinovac) ៥០ម៉ឺនដូសបានមកដល់កម្ពុជា គឺជាវ៉ាក់សាំងលើកទី៣ ហើយដែលរាជរដ្ឋាភិបាលកម្ពុជាបានបញ្ជាទិញ ខណៈជើងទី១ មានចំនួន១.៥លានដូសបានដឹកមកដល់កម្ពុជា កាលពីថ្ងៃទី២៦ ខែមីនា និងជើងទី២ មានចំនួន៥០ម៉ឺនដូសដឹកមកដល់កម្ពុជា នៅថ្ងៃទី១៧ ខែមេសា ។
វ៉ាក់សាំងកូវីដ១៩ ជាផ្នែកដ៏សំខាន់ក្នុងប្រតិបត្តិការប្រយុទ្ធប្រឆាំងជំងឺកូវីដ១៩ និងជួយការពារសុខភាពរបស់ប្រជាពលរដ្ឋពីការវាយប្រហារដោយជំងឺកូវីដ១៩ ។
រាជរដ្ឋាភិបាល កម្ពុជាបានដាក់ចេញយុទ្ធសាស្ត្រចាក់វ៉ាក់សាំងនេះឱ្យបានលឿន តាមដែលអាចធ្វើទៅបានជូនដល់ប្រជាពលរដ្ឋរបស់ខ្លួន ។ ទន្ទឹមនឹងនេះ រាជរដ្ឋាភិបាលបានស្វះស្វែងរកវ៉ាក់សាំង ហើយបាននាំមកដល់នូវវ៉ាក់សាំងជាបន្តបន្ទាប់ សម្រាប់ចាក់ជូនប្រជាពលរដ្ឋរបស់ខ្លួន ។
វ៉ាក់សាំងកូវីដ១៩ ដែលកំពុងទទួលបាន ហើយកំពុងដំណើរការជូ នប្រជាពលរដ្ឋនេះ គឺភាគច្រើនបំផុតជារបស់ប្រទេសចិន ។ សូមរឮកថា កម្ពុជាទទួលបានវ៉ាក់សាំងជាង៤លានដូស រួចមកហើយ រួមមាន ៖ ស៊ីណូហ្វាម (Sinopharm) ដែលជាជំនួយរបស់រដ្ឋាភិបាលចិន១.៧លានដូស, វ៉ាក់សាំងស៊ីណូវ៉ាក់(Sinovac) ទិញពីចិន២លានដូស និងវ៉ាក់សាំងអាស្ត្រាហ្សេនីកា ( AstraZeneca ) ៣២៤,០០០ដូស ជាជំនួយរបស់ខូវ៉ាក់ តាមរយៈអង្គការសុខភាពពិភពលោក(WHO)។
កម្ពុជានឹងស្វះស្វែងរកវ៉ាក់សាំង កូវីដ១៩ជាបន្តបន្ទាប់ទៀត ក្នុងការចាក់ជូនប្រជាពលរដ្ឋឱ្យបានជាង១០លាននាក់ ដើម្បីបង្កើតភាពសាំ និងដើម្បីទប់ស្កាត់ការចម្លងរាលដាលដល់ប្រជាពលរដ្ឋទូទាំងប្រទេស ៕
ចែករំលែកព័តមាននេះ