រាជធានីភ្នំពេញ ៖ យ៉ាងហោចណាស់មានអ្នកជំងឺកូវីដ-១៩ ចំនួន ៥នាក់បន្ថែមទៀតបានទទួលមរណភាព ដែលនាំឱ្យករណីស្លា.ប់ដោយវីរុសឆ្លងដ៏កាចសាហាវមួយនេះកើនឡើងដល់ ១៣១ នាក់ ខណៈករណីឆ្លងសរុបក៏បានឡើងដល់ ២០២២៣នាក់ នៅប្រទេសកម្ពុជា ។
ក្រសួងសុខាភិបាលបានប្រកាសនៅថ្ងៃទី ១១ ខែឧសភា ឆ្នាំ ២០២១ អំពីករណីស្លា.ប់ថ្មី ដោយកូវីដ-១៩ ចំនួន ៥ នាក់បន្ថែមទៀត តែរយៈពេលប៉ុន្មានថ្ងៃចុងក្រោយនេះ ក្រសួងសុខាភិបាលមិនបានបញ្ជាក់លម្អិតអំពីអត្តសញ្ញាណអ្នកស្លា.ប់ ក៏ដូចជាទីកន្លែងដែលអ្នកជំងឺទទួលមរណភាពឡើយ ដែលកាលពីលើកមុនៗរបាយការណ៍របស់ក្រសួងបានប្រាប់លម្អិតអំពី អាយុ ភេទ និងមន្ទីរពេទ្យ និងអាស័យដ្ឋាន ដែលអ្នកជំងឺដែលបានទទួលមរណភាព ។
យ៉ាងណាមិញ របាយការណ៍របស់ក្រសួងសុខាភិបាលបានប្រាប់ថា គិតត្រឹមថ្ងៃទី ១១ ខែឧសភា ឆ្នាំំ ២០២១ មានករណីឆ្លងថ្មី ចំនួន ៤៨០ នាក់ ក្នុងនោះ ១០ ករណីជាករណីនាំចូល ខណៈចំនួនអ្នកជំងឺទទួលបានការព្យាបាលជាសះស្បើយពីជំងឺកូវីដ-១៩ មានចំនួន ៣៥០ ។
បន្ថែមពីលើនេះ របាយការណ៍របស់ក្រសួងសុខាភិបាលដែលបានសង្ខេបកាន់តែខ្លីៗឡើង ក៏លែងបញ្ជាក់តួលេខនៃការឆ្លង ជាសះស្បើយ និងស្លា.ប់ នៅតាមខេត្តនីមួយៗទៀតហើយ ខណៈព័ត៌មានចុងក្រោយ គឺព្រឹត្តិការណ៍ឆ្លងក្នុងសហគមន៍បានឆ្លងគ្រប់រាជធានី-ខេត្តទាំង ២៥ របស់ប្រទេសកម្ពុជាហើយ គិតត្រឹមថ្ងៃទី ១០ ខែឧសភា បន្ទាប់ពីខេត្តចុងក្រោយគេ គឺខេត្តរតនគិរី ដែលរដ្ឋបាលខេត្តរតនគីរី នាព្រឹកថ្ងៃទី១០ ខែឧសភា ឆ្នាំ២០២១ បានប្រកាសករណីឆ្លងកូវីដលើបុរសខ្មែរពីរនាក់ ដែលជាករណីរកឃើញលើកដំបូងនៅខេត្តភាគភាគឦសាន ទឹកដីដែលសំបូរបងប្អូនជនជាតិដើមភាគតិចរស់នៅ ។
របាយការណ៍ខ្លីមួយទំព័រ ដែលមានតែតួលេខសុទ្ធសាត ក៏បានឱ្យដឹងផងដែរថាករីណឆ្លងកូវីដ-១៩ សរុប មានចំនួនកើនឡើងដល់ ២០២២៣ នាក់ ជាសះស្បើយសរុប ៨១៧០ នាក់ និង ករណីស្លា.ប់សរុបដោយកូវីដ-១៩ មានចំនួន ១៣១ នាក់ ៕
ចែករំលែកព័តមាននេះ