រាជធានីភ្នំពេញ ៖ តារាចម្រៀង និងសម្តែង២រូប គឺលោក វេហាស៍ និងអ្នកនាង ចន ចន្ទលក្ខិណា បានផ្ទុះប្រតិកម្មទៅលើនារីខ្មែររស់នៅប្រទេសកូរ៉េមួយរូប ដែលបានបង្ហោះសារប្រើពាក្យសម្តីមិនសមរម្យមួយចំនួន ធ្វើឱ្យអ្នកទាំងពីរចាត់ទុកជាការមិនអោយតម្លៃដល់ស្ត្រីខ្មែរ ពាក់ព័ន្ធទៅការថែរក្សាសម្រស់។
ការប្រតិកម្មពីតារាទាំងពីរខាងលើ គឺសំដៅនារីម្នាក់ដែលបានដាក់ឈ្មោះនៅក្នុងគណនេយ្យហ្វេសប៊ុកថា Srong Pheavy ហើយបានសរសេរបង្ហោះបង្ហាពីយល់ការឃើញរបស់ខ្លួនសំដៅទៅលើស្ត្រីខ្មែរមួយចំនួននាពេលបច្ចុប្បន្ន។ ហើយនារីដែលត្រូវបានគេស្គាល់ថាជាកីឡាការិនីផ្នែកស្នូកឃ័រ តំណាងប្រទេសកម្ពុជា នៅប្រទេសកូរ៉េ ដែលមានឈ្មោះខាងលើ បានសរសេរបង្ហោះសារថា «ស្រីស្អាតក្នុងស្រុកយើងមួយចំនួន សុខចិត្តយកលុយដែលខ្លួនរកបាន ទិញឡេលាបខ្លួនអោយ.ស កែច្រមុះ ចាក់ចង្កា កែបបូរមាត់ និយាយរួមគឺចំណាយតែសម្រស់ និងការសប្បាយ ដើរលេងផឹកស៊ី ចូលក្លិប ដើរតាមខេត្ត ដើរស្រុកក្រៅ ហាយសូ ប្រេនៗ តែប៉ុណ្ណោះ មិនព្រមចំណាយខ្លះទៅបង់ថ្លៃសាលាចូលរៀន រៀនជំនាញ ល្អៗអោយមានចំណេះដឹង និងឧត្តមតិល្អប្រសើរជាងហ្នឹងនោះទេ» ។
នាងបញ្ជាក់ថា «ភាពស្រស់ស្អាតពិតប្រាកដ មិនមែនស្ថិតលើសម្រស់ ច្រមុះស្រួច មុខវី ចង្កាព្រែក ភ្នែកកូរ៉េ គូថធំ រាងសិចស៊ីរបស់ខ្លួនឡើយ បើអ្នកជាមនុស្សស្រី វក់តែរឿងសម្រស់ ប្រឹងតែពីរឿងតុបតែងខ្លួនស្អាតឱ្យទាក់ទាញ ឱ្យសិចស៊ី បុរសក៏ស្រឡាញ់ ចង់បានតែដងខ្លួនសិចស៊ីរបស់អ្នកមកបំពេញតណ្ហាលេងសើចប៉ុណ្ណោះ»។
នាងថា «កុំបន្ទោសបុរសថាសាវា បានខ្លួនហើយដោះដៃ មើលខ្លួនយើងផង បើគិតតែពីឆ្លុះកញ្ចក់តែងខ្លួន ខ្ចិលធ្វើការ ទៅក្រៅជាមួយតាតា បានលុយស្រួល (ការពិត អានចំកុំឈឺចាប់ ) សួរខ្លួនឯងផង !»។
ពាក់ព័ន្ធការបង្ហោះខាងលើនេះ តារាចម្រៀងក្នុងផលិតកម្មសាន់ដេ លោក វេហាស៍ បានសម្តែងការមិនយល់ស្រប ចំពោះអ្វីដែលនារីខាងលើបានសរសេរនោះឡើយ។ លោកបានឆ្លើយតបថា «មនុស្សយើងម្នាក់ៗរកលុយមកក៏ដើម្បីសេចក្តីសុខខ្លួនឯងដែរ មិនដែលក្នុងផ្ទះអត់អង្ករ សុខចិត្តយកលុយទៅកែច្រមុះទេ»។ លោកថា «គេហ៊ានចំណាយ ឬបំពេញសេចក្តីសុខខ្លួនឯង បន្ទាប់ពីបំពេញជីវភាពគេបានសមរម្យ ហើយខ្ញុំជឿថាគាត់ក៏ចង់ស្អាត ចង់ល្អដែរ មិនមែនដល់ដំណាក់កាលយើងជោគជ័យគ្រប់យ៉ាង យើងចង់និយាយមើលងាយ ឬថាអោយអ្នកណាក៏បានទេ»។
លោកបញ្ជាក់ថា «ការដាស់តឿនដែលមានសម្តីសំដៅល្អពីរោះ គឺមិនខ្វះនឹងត្រូវយកមកនិយាយទេ។ តែបើអ្នកទាំងអស់គ្នាដើរអោយទាន់សង្គមនេះបន្តិច អ្នកទាំងអស់គ្នានឹងយល់ថា (Bully) គឺជាអ្វី»។ លោកបន្ថែមថា «គាត់ជាបុគ្គលជោគជ័យម្នាក់ ជាជនគំរូរម្នាក់ ជាមនុស្សរបស់មហាជនម្នាក់ គ្រប់សម្តីនិងទង្វើរបស់គាត់តែងត្រូវបានទទួលការចាប់អារម្មណ៍ តិចក្តីច្រើនក្តីតាមលទ្ធភាពរបស់គាត់។ ទទួលស្គាល់ថា សំនេររបស់គាត់មានគំនិតអប់រំ តែឃ្លាឃ្លោងស្ទើរតែ៨០% បង្កប់ដោយកំហឹង ពាក្យអសុរសឬ Sexsule harassment ដែលវាជះឥទ្ធិពលមែនទែនដល់អ្នកអាន។ បើគាត់ចង់ដាស់តឿនមែន គឺគាត់ត្រូវយល់ពាក្យខ្មែរថា «ក្តៅស៊ីរាក់ត្រជាក់ស៊ីជ្រៅ» គាត់អាចផ្តើមពីតិចៗទៅ រហូតដល់គេយល់ពីគាត់ មិនមែនវឹបឡើង លើសបន្ទាត់180ដឺក្រេបែបនេះទេ»។
លោកបានលើកឡើងបន្ថែមថា «ខ្ញុំមិនដែលឃើញជនជាតិក្នុងប្រទេសអភិវឌ្ឍន៍ណាមួយប្រដៅកូនដោយពាក្យអសុរសដូចជានជាតិខ្មែរយើងមួយចំនួនទេ»។ លោកថា «ខ្ញុំធ្លាប់នៅកូរ៉េ៥ឆ្នាំ ធ្លាប់ទទួលបានការអប់រំច្រើនហូរហែ ធ្លាប់សិក្សាពីច្បាប់ ពីរបៀបដឹកនាំប្រទេសជាហូរហែ មិនថា ក្នុង K-Drama ឬទិដ្ឋភាពជាក់ស្តែង គឺមានតែឪពុកម្តាយគេដេញកូនអោយទៅកែសម្ភស្ស បង្កើតទាំងកុងសម្រាប់វះកាត់អោយកូនៗតាំងពីតូច ព្រោះក្នុងបរិបទប្រទេសជឿនលឿនគេយល់ច្បាស់ថា Outside looking គឺជាអ្វី គេព្យាយាមណាស់ ដើម្បីអោយកូនៗគេគេចផុតពីការ Bully»។
លោកបញ្ជាក់ថា «ទាញលែងមកហើយ គាត់អន្តោម័តតែម្នាក់ឯង គិតតែម្នាក់ឯង ថាអ្វីដែលគាត់និយាយគឺត្រូវ។ ឃ្លាគាត់លើសខ្លាំងសឹងតែមិនអាចទទួលយកបាន ដូចជាត្រង់ កែមុខកែមាត់ស្អាតដើម្បីអោយប្រុសបំពេញតណ្ហា ឬលក់ខ្លួនអោយតាៗ។ បងគិតមើលថា សមរម្យឬអត់?។
ដោយឡែកតារាសម្តែង និងជាប្រធានសមាគមសិល្បករខ្មែរអ្នកនាង ចន ច័ន្ទលក្ខិណា វិញក៏បានសម្តែងការមិនពេញចិត្តចំពោះការលើកឡើងរបស់នារីខាងលើនេះផងដែរ ខណៈពេលបញ្ហានេះក៏បានរីករាលដាលដល់អ្នកសិល្បៈ។ អ្នកនាងក៏បានបង្ហោះសារថា «ផុសម្តង ជា2ដង មិនចោលចរិតមើលងាយស្ត្រីសោះ ផុសហើយលុបវិញសរសេរម្តងទៀតមើលងាយគេលើសដើម គ្មានអ្នកណាបានឡើងធ្វើជាតារាដោយសារការធ្វើចរិតឡេឡឺដូចអ្នកនិយាយទេ»។
នាងថា «កុំមើលងាយគេពេក បើគេច្រៀងមិនពីរោះ សម្តែងមិនសម កុំស្មានថាអាចធ្វើជាតារាបាន ទស្សនិកជនគេឆ្លាតណាស់ មុននឹងគេចំណាយទឹកចិត្តមកគាំទ្រតារានីមួយៗទាល់តែតារានោះមានសមត្ថភាពអាចទាញអារម្មណ៍អោយគេគាំទ្រដែរ» ។ នាងបញ្ជាក់ថា «ខ្ញុំមិនងាយទើសអ្នកណាទេ តែចង់ប្រាប់ថា ភាពអំនួតហួសប្រមាណវានឹងធ្វើអោយខ្លួនយើងវិនាសដោយមិនដឹងខ្លួន ហើយការមើលងាយអ្នកដទៃធ្វើអោយខ្លួនឯងកាន់តែអស់តំលៃ»។
ដោយឡែកក្នុងពេលដែលមានការប្រតិកម្មពីសំណាក់អ្នកសិល្បៈ និងមហាជនមួយចំនួននោះមក នារីខាងលើក៏បានបញ្ចេញសារឆ្លើយតបវិញថា «អត្ថបទ ដែលខ្ញុំបានបង្ហោះដំបូង មិនមែនខ្ញុំខ្លាច នៅមតិគំនិតអគតិរបស់បងប្អូនមួយចំនួនតូចឡើយ ខ្ញុំលុប ព្រោះចង់សរសេរបន្ថែមឱ្យបងប្អូនខ្មែរយើងមួយចំនួនឱ្យគាត់បានយល់ ដែលមិនបានគិតឲ្យវែង បែរជាយល់ច្រលំ ហើយខ្ញុំមិនចង់ឃើញបងប្អូនខ្មែរមក យកពេលមកឈ្លោះគ្នា តាមខមិនចឹងទេ តែនេះវាជាទំលាប់អ្នកតែៗស្ករៗ ហើយក៏ស៊ែរងាប់ចោល»។
នាងបញ្ជាក់ថា «សម្តីពិតអាចមានន័យដល់ស្ត្រីគ្រប់រូប តែវាបែរជាចាក់ដោតដល់អ្នកដែលមានខ្លួន កុំខ្វល់នឹងមនុស្សគិតអគតិ ព្រោះវាមិនអាចកែប្រែសង្គមបានឡើយ កុកហើរលើមេឃគង់ធ្លាក់ដី ដើមឈើក្នុងព្រៃតែងរងខ្យល់បក់។ និយាយត្រូវក៏គេស្អប់ និយាយត្រង់ក៏គេខឹង បើធ្វើមិនដឹងគេថា យើងភ្លឺ បើធ្វើឡេឡឺ ឆាប់បានឡើងតារា… សង្គមឥឡូវគឺអញ្ចឹង»៕
ចែករំលែកព័តមាននេះ