ខេត្តបាត់ដំបង៖ ចោរចិត្តស្លុយម្នាក់ត្រូវបានកម្លាំងនគរបាលតាមឃាត់ខ្លួនបាននៅប៉ុន្មានម៉ោង ក្រោយពីលួចម៉ូតូមួយគ្រឿង កាលពីវេលាម៉ោង១រសៀលថ្ងៃទី១០ ឧសភា នៅភូមិថ្មី ឃុំបន្សាយត្រែង ស្រុកថ្មគោល ។
លោក ផង់ សុភាព អធិការស្រុកថ្មគោលបានឱ្យដឹងថា ជនសង្ស័យឈ្មោះ ឆាយ ឆេត អាយុ២៦ឆ្នាំ នៅភូមិស្លរខ្លាញ់ ឃុំបវេល ស្រុកបវេល។ រីឯម៉ូតូដែលជននេះ លួចម៉ាកហុងដាឌ្រីមសេ១២៥ស៊េរី២០១៦ពណ៌ខ្មៅពាក់ស្លាកលេខ បាត់ដំបង 1X.0161 របស់ជនរងគ្រោះឈ្មោះ ហន តុញ ភេទប្រុស អាយុ៣៩ឆ្នាំ រស់នៅភូមិថ្មី ឃុំបន្សាយត្រែង ស្រុកថ្មគោល។
លោកអធិការបានបញ្ជាក់ថា ក្រោយពីធ្វើសកម្មភាពរួចជនសង្ស័យបានជិះម៉ូតូគេចខ្លួន ទៅកាន់ភូមិសាស្ត្រស្រុកបវេល តែទំនងគេចមិនរួចក៏ទុកម៉ូតូចោល ហើយរត់គេចខ្លួន ។ ប៉ុន្តែត្រូវកម្លាំងមូលដ្ឋានរបស់លោកតាមឃាត់ខ្លួនបានភ្លាមៗ ។ បើតាមម្ចាស់ម៉ូតូបានប្រាប់សមត្ថកិច្ចថា ចោរចិត្តស្លុយនេះ បានចូលលួចម៉ូតូគាត់ទាំងថ្ងៃដែលគាត់ទុកខាងមុខផ្ទះ។ ប៉ុន្តែក្រោយដឹងថា បាត់ខ្លួនក៏ប្ដឹងទៅសមត្ថកិច្ចភ្លាមៗដែរ លុះប៉ុន្មានម៉ោងក្រោយក៏ត្រុវសមត្ថកិច្ចឃាត់ជនដៃដល់បាន។
លោក ផង់ សុភាព បាននិយាយថា ជាមួយនឹងការឃាត់ខ្លួន កម្លាំងជំនាញបាននាំជនសង្ស័យមកកាន់អធិការស្រុកថ្មគោល ដើម្បីសួរនាំ និង ចាត់ការតាមនីតិវិធី ។ ដោយឡែក ម៉ូតូត្រូវបានប្រគល់ជូនម្ចាស់វិញហើយ៕ ដោយ៖ ឆោម ពិសម័យ
ចែករំលែកព័តមាននេះ